ဂျိုးဘိုင်ဒင် ဒုသမ္မတအဖြစ် တာဝန်ထမ်းဆောင်ခဲ့စဉ်ကာလက သူ၏ရုံးခန်းကို တာဝန်ရှိသူတို့က ရှာဖွေစစ်ဆေးခဲ့ရာတွင် ယူကရိန်း၊ အီရန်နှင့် ဗြိတိန်နိုင်ငံတို့နှင့် သက်ဆိုင်သည့် အမေရိကန်ထောက်လှမ်းရေးမှတ်စုများနှင့်၊ စာရွက်စာတမ်းများအပါအဝင် အမျိုးအစား ၁၀ ခုခွဲခြားထားသော အထူးကန့်သတ်ထားသည့် ထိပ်တန်းလျှို့ဝှက် စာရွက်စာတမ်းများကို တွေ့ရှိခဲ့ကြောင်း CNN သတင်းဌာနက သတင်းရေးသားဖော်ပြထားသည်။
ယင်းတို့နှင့်ပတ်သက်၍ စာရွက်စာတမ်းများ စုံစမ်းစစ်ဆေးခြင်းဆိုင်ရာ ပဏာမ အစီရင်ခံစာကို လက်ခံရရှိထားပြီးဖြစ်ကာ၊ ယင်းစုံစမ်းစစ်ဆေးမှုနှင့်ပတ်သက်၍ အမှုဖွင့်ရန် ရှိမရှိအပါအဝင် မည်သို့ဆက်လက်ဆောင်ရွက်ရမည်ဆိုသည်တို့အပေါ် အရေးကြီးသည့် ဆုံးဖြတ်ချက်ချရန်ကို ရင်ဆိုင်နေရပြီဖြစ်ကြောင်း အမေရိကန်ပြည်ထောင်စု ရှေ့နေချုပ် Merrick Garland ကပြောကြားသည်။
အဆိုပါ စာရွက်စာတမ်းများသည် ၂၀၁၃ နှင့် ၂၀၁၆ ခုနှစ်များအကြား ရက်စွဲများဖြင့်ဖြစ်ကြပြီး၊ ၎င်းတို့ကို သမ္မတမှတ်တမ်းအက်ဥပဒေအရ အမျိုးအစားမခွဲခြားရသေးသော အခြားစာရွက်စာတမ်းများထည့်သွင်းထားသည့် သေတ္တာ ၃ လုံး(သို့) ၄ လုံးအတွင်းတွင်လည်း တွေ့ရှိခဲ့သေးကြောင်း ယုံကြည်ရသည့် သတင်းရင်းမြစ်က CNN သို့ပြောကြားသည်။
ယင်းစာရွက်စာတမ်းများနှင့်အတူ ဘိုင်ဒင်မိသားစု၏ ကိုယ်ရေးကိုယ်တာဆိုင်ရာ စာရွက်စာတမ်းများကိုလည်း ရောနှောလျှက်တွေ့ရှိရကြောင်းသိရသည်။
ရှေ့နေချုပ် Merrick Garland သည် ယင်းကိစ္စကို စုံစမ်းစစ်ဆေးရန် ချီကာဂိုတရားရေးဌာနမှ ရှေ့နေဖြစ်သူJohn Lausch Jrကို တာဝန်ပေးအပ်ခဲ့ကြောင်း CNN က ဖော်ပြထားသည်။ Garland သည် အမျိုးသား မော်ကွန်းတိုက်နှင့် မှတ်တမ်းများ စီမံခန့်ခွဲရေးထံမှ စာရွက်စာတမ်းများ လွှဲပြောင်းပေးပို့မှုကို တရားဝင် လက်ခံရရှိပြီးနောက်ပိုင်းတွင် ယခုကဲ့သို့ လုပ်ဆောင်ခဲ့ခြင်း ဖြစ်ကြောင်း သိရသည်။