ပြည်ပ၏ ကူညီထောက်ပံ့မှုများကို မှီခိုမှုများခြင်း၊ပြည်တွင်းစီးပွားရေးကိုအားပေးမှုမရှိခြင်း တို့သည် နိုင်ငံ့ စီးပွားရေးကျဆင်းခဲ့မှုအ​ကြောင်းတရားထဲပါဝင်

နစက ဥက္ကဋ္ဌ၊ ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ဇန်နဝါရီ ၆ ရက်က ပြည်ထောင်စုဝန်ကြီးများ၊နေပြည်တော်ကောင်စီဥက္ကဋ္ဌ၊တိုင်းနှင့် ပြည်နယ်ဝန်ကြီးချုပ်များ၊ကိုယ်ပိုင်အုပ်ချုပ်ခွင့်ရဒေသနှင့်တိုင်းဥက္ကဋ္ဌများအား တွေ့ဆုံလမ်းညွှန် အမှာစကားပြောစဥ် ထည့်သွင်းပြောကြားခဲ့ခြင်းဖြစ်သည်။

မြန်မာနိုင်ငံ၏ စီးပွားဖွံ့ဖြိုးတိုးတက်ရေးနှင့်ပတ် သက်၍ တပ်မတော်အစိုးရလက်ထက်ကပင် ဈေးကွက်စီးပွားရေးစနစ်အား လမ်းခင်းဆောင် ရွက်ပေးခဲ့ပြီး ၂၀၁၁ ခုနှစ် ဒီမိုကရေစီစနစ်စတင် လျှောက်လှမ်းချိန်တွင်လည်း ဈေးကွက်စီးပွား ရေးစနစ်အား ဆက်လက်ကျင့်သုံးခဲ့​ကြောင်း၊ အစိုးရပထမသက်တမ်း ၅ နှစ်အတွင်း နိုင်ငံ၏ GDP တိုးတက်မှု ၈ ဒသမ ၄ ရာခိုင်နှုန်းအထိရှိခဲ့ပြီး ဒုတိယအစိုးရသက်တမ်းတွင် ၃ ဒသမ ၂ ရာခိုင် နှုန်းအထိကျဆင်းခဲ့၍ စီးပွားရေးကဏ္ဍမှတာဝန်ရှိသူများက လေ့လာရန်လိုသည်ဟု ဆိုသည်။

“စီးပွားရေးကျဆင်းခဲ့မှုတွေမှာ ပြည်ပရဲ့ကူညီ ထောက်ပံ့မှုတွေကို မှီခိုမှုများတာ၊ပြည်တွင်းစီး ပွားရေးကိုအားပေးမှုမရှိတာ စီမံခန့်ခွဲမှုအားနည်းတာတွေကြောင့် စီးပွားရေးကျဆင်းခဲ့တာလို့ ယူဆပါတယ်”ဟု နစက ဥက္ကဋ္ဌကပြောသည်။

နစက မှ နိုင်ငံတော်တာဝန်များအား စတင်ထမ်းဆောင်ချိန်တွင် ယခင်အစိုးရလက်ထက်မှ စီးပွား ရေးကျဆင်းခဲ့မှု၊ ကိုဗစ်(၁၉)ရောဂါဖြစ်ပွားမှုနှင့် ကမ္ဘာ့စီးပွားရေးကျဆင်းခဲ့မှုများကြောင့် အနုတ် ၅ ဒသမ ၉ ရာခိုင်နှုန်းအထိ ကျဆင်းခဲ့သည်။

“ဒါပေမယ့် မိမိတို့အနေနဲ့ ကိုဗစ်(၁၉)ရောဂါထိန်း ချုပ်ရေးလုပ်ငန်းတွေ ဆောင်ရွက်ခြင်းနဲ့ပြည် တွင်းစီးပွားရေးလုပ်ငန်းတွေကို အားပေးဆောင် ရွက်ခဲ့ရာမှာ ၂၀၂၁-၂၀၂၂ ခုနှစ် ပထမ ၆ လတာ ကာလအတွင်း အပေါင်း ၂ ဒသမ ၄ ရာခိုင်နှုန်းကို ပြန်ရောက်လာခဲ့တာကြောင့် နိုင်ငံရဲ့စီးပွားရေး ၈ ရာခိုင်နှုန်းခန့် ပြန်လည်တိုးတက်လာပါတယ်”ဟု နစက ဥက္ကဋ္ဌကပြောသည်။

၂၀၂၁-၂၀၂၂ ခုနှစ် ဒုတိယ ၆ လတာကာလတွင် ၃ ဒသမ ၄ ရာခိုင်နှုန်းအထိ ပြန်လည်တိုးတက်လာခဲ့ပြီး ထိုသို့ တိုးတက်လာခြင်းမှာ ပြည်တွင်းစီး ပွားရေးလုပ်ငန်းများကို အားပေးခြင်း၊ပြည်တွင်း၌ရှိသည့် ရေသယံဇာတ၊မြေသယံဇာတများ၊လယ်ယာ၊သားငါးကဏ္ဍများ၊သစ်တောကဏ္ဍများ၊လူသားအရင်းအမြစ်များ၏ ဆောင်ရွက်နိုင်မှုများကို အသုံးချနိုင်မှုကြောင့် နိုင်ငံစီးပွားရေးတိုးတက်လာခြင်းဖြစ်သည်ဟု ဆိုသည်။

 MSME လုပ်ငန်းသည် နိုင်ငံစီးပွားဖွံ့ဖြိုး တိုးတက်ရေးအတွက်များစွာအရေးပါ၍ MSME လုပ်ငန်းများဖွံ့ဖြိုးတိုးတက်လာပါက ပြည်ပသွင်း ကုန်များကို အစားထိုးနိုင်မည်ဖြစ်ပြီး ယင်းမှတစ်ဆင့် ပြည်တွင်းထုတ်ကုန်များကို အရည်အသွေးကောင်းမွန်စွာထုတ်လုပ်၍ ပြည်ပသို့တင်ပို့လာနိုင်မည်ဟု ဆိုသည်။

“ပြည်တွင်းမှာ ထုတ်လုပ်နိုင်တဲ့ ထုတ်ကုန်တွေကိုထုတ်လုပ်ပြီး ပြည်ပကသွင်းကုန်တွေကို လျှော့ချနိုင်မယ်ဆိုရင် နိုင်ငံတော်အတွက်များစွာအ ထောက်အကူပြုနိုင်မှာဖြစ်ပါတယ်”ဟု နစက ဥက္ကဋ္ဌကပြောသည်။

မွေးမြူရေးလုပ်ငန်းများအား စနစ်တကျဆောင်ရွက်ခြင်းဖြင့် စိုက်ပျိုးရေးလုပ်ငန်းများအတွက် လိုအပ်သည့် ဇီဝမြေဩဇာများကို ရရှိစေမည်ဖြစ်ကာ MSME လုပ်ငန်းများကိုလည်း များစွာအထောက်အကူပြုမည်ဖြစ်ပြီး ဝင်ငွေများရရှိမည်ဖြစ်၍ ဒေသတွင်းနှင့်နိုင်ငံစီးပွားဖွံ့ဖြိုးတိုးတက်ရေးကိုများစွာအထောက်အကူပြုစေမည်ဖြစ်သဖြင့် ဒေသအလိုက်စနစ်တကျဆောင်ရွက်ရန်လိုသည်ဟု နစက ဥက္ကဋ္ဌက မှာကြားခဲ့သည်။