ဝါရှင်တန်၊ဒီဇင်ဘာ ၂၁
ယူကရိန်းသမ္မတဗလာဒီမာဇလန်းစကီးသည် ကန်သမ္မတဘိုင်ဒင်နှင့်တွေ့ဆုံရန် ယနေ့တွင်ဝါရှင်တန်သို့ရောက်ရှိမည်ဖြစ်ကြောင်း အမေရိကဘက်မှအတည်ပြုပြောကြားခဲ့သည်။ယခုခရီးစဉ်သည် စစ်ပွဲစတင်ကတည်းက သမ္မတဇလန်းစကီး၏ ပထမဆုံးပြည်ပခရီးစဉ်ဖြစ်ပြီး အမေရိကထံမှ စစ်ရေးနှင့်စီးပွားရေးအကူအညီများရယူရန် ကြိုးပမ်းမည်ဟုမျှော်မှန်းထားကြသည်။
“ယူကရိန်းရဲ့ ခံနိုင်ရည်နဲ့ကာကွယ်ရေးစွမ်းရည်အတွက် အခုအမေရိကကိုသွားနေပါပြီ” ဟုလည်း ၎င်း၏တွစ်တာပို့စ်တွင်ရေးသားထားသည်။
ယခုခရီးစဉ်အား လျှို့ဝှက်စီစဉ်ခဲ့ခြင်းဖြစ်ပြီး အင်္ဂါနေ့ညအထိ မသေချာမရေရာသေးသည့် ခန့်မှန်းချက်တစ်ခုအဖြစ်သာရှိနေခဲ့သည်။သမ္မတဘိုင်ဒင်အနေဖြင့် ယခုခရီးစဉ်အတွင်းကန်ဒေါ်လာ နှစ်ဘီလျံနီးပါးတန်ဖိုးရှိသည့် လက်နက်အကူအညီကိုလည်း ကြေငြာမည်ဟုကန်အကြီးတန်းအရာရှိတစ်ဦးကပြောကြားခဲ့သည်။
အဆိုပါအစီအစဉ်၌ ကိဗ်အားမော်စကို၏လေကြောင်းတိုက်ခိုက်မှုမှ ကာကွယ်နိုင်စေမည့် Patriot ဒုံးကျည်ယူနစ်ပါဝင်မည်ဖြစ်ကြောင်းသိရှိရသည်။ယခုခရီးစဉ်အား ယူကရိန်းအပေါ်ထားရှိသည့် အမေရိက၏ကတိကဝတ်ကို ထုတ်ဖော်ပြသနိုင်ရန် သမ္မတဘိုင်ဒင်က သမ္မတဇလန်းစကီးအားဖိတ်ခေါ်ခဲ့ခြင်းဖြစ်သည်ဟုလည်း အိမ်ဖြူတော်၏ထုတ်ပြန်ချက်၌ဖော်ပြထားသည်။
၄င်းအပြင် အမေရိကအနေဖြင့် ယူကရိန်းသမ္မတအား ရုရှားနှင့်ညှိနှိုင်းဆွေးနွေးရန်အတွက် အတင်းအကျပ်တိုက်တွန်းမည်မဟုတ်ဟုလည်း ဖော်ပြထားသည်။စစ်ပွဲကာလတစ်လျှောက် ဆယ်လတာကာလအတွင်း၌လည်း အမေရိကသည်ယူကရိန်းအားတောက်လျှောက်ကူညီပေးခဲ့ပြီး ရုရှားပိတ်ဆို့မှုများပြုလုပ်ခဲ့သော်လည်း တိုက်ရိုက်ပါဝင်ပတ်သက်ခြင်းမျိုးမရှိခဲ့ပေ။
ဘိုင်ဒင်အစိုးရသည် ယခုအချိန်အထိ လက်နက်ပစ္စည်းမျိုးစုံအား ယူကရိန်းသို့ထောက်ပံ့ပေးခဲ့သည်မှာ ကန်ဒေါ်လာ ၂၀ ဘီလျံနီးပါးရှိပြီဟုလည်းသိရှိရသည်။
Source : WION