ရောဂါဆိုး သုံးမျိုးတိုက်ဖျက်ရေးအတွက် ထောက်ပံ့ငွေဘီလီယံချီပေးအပ်ရန် ကမ္ဘာ့ခေါင်းဆောင်များကတိပြု

ရောဂါဆိုး သုံးမျိုးတိုက်ဖျက်ရေးအတွက် ထောက်ပံ့ငွေဘီလီယံချီပေးအပ်ရန် ကမ္ဘာ့ခေါင်းဆောင်များကတိပြု
September 22, 2022 Popular Journal

ရောဂါဆိုး သုံးမျိုးတိုက်ဖျက်ရေးအတွက် ထောက်ပံ့ငွေဘီလီယံချီပေးအပ်ရန် ကမ္ဘာ့ခေါင်းဆောင်များကတိပြု

ကမ္ဘာ့ခေါင်းဆောင်များသည် ရောဂါိ ဆိုးများဖြစ်သည့် အေ့ဒ်စ်၊တီဘီနှင့်ငှက်ဖျားရောဂါများကို တိုက်ဖျက်ရန်ကြိုးပမ်းနေကြစဉ် ကိုဗစ်ကပ်ရောဂါကြောင့် တိုးတက်မှုလမ်းကြောင်းလွဲသွားပြီးနောက် အဆိုပါရောဂါများတိုက်ဖျက်ရေး ကမ္ဘာ့ရန်ပုံငွေအဖွဲ့က စက်တင်ဘာ ၂၁ ရက်နေ့က ကန်ဒေါ်လာ ၁၄ ဒသမ ၂၅ ဘီလီယံအား သုံးစွဲရန်ကတိပြုခဲ့သည်။

ကုလသမဂ္ဂအထွေထွေညီလာခံပြင်ပ၌ ယခုဆွေးနွေးမှုအားဦးဆောင်ကျင်းပသည့် ကန်သမ္မတဂျိုးဘိုင်ဒင်ကလည်း အဆိုပါရန်ပုံငွေသည် ရောဂါများကိုတိုက်ဖျက်ရန်အရေးကြီးသည်ဟုပြောကြားခဲ့သည်။

“အခုအစီအစဉ်ဟာ လူပေါင်းသန်း ၂၀ ရဲ့အသက်ကိုကယ်တင်မယ့်ရင်းနှီးမြှုပ်နှံမှုတစ်ခုဖြစ်ပြီး လာမယ့်လေးနှစ်အတွင်းမှာ ဒီရောဂါတွေကြောင့်အသက်ဆုံးရှုံးရသူ ၆၄ ရာခိုင်နှုန်းလောက်ကိုလျှော့ချနိုင်မှာဖြစ်ပါတယ်” ဟု သမ္မတဘိုင်ဒင်ကထပ်မံပြောကြားခဲ့သည်။

အမေရိကန်ပြည်ထောင်စုအနေဖြင့်လည်း နောက်ထပ်ရန်ပုံ ငွေကန်ဒေါ်လာ ၆ ဘီလီယံကို ကတိပြုသွားမည်ဟုလည်း ယခင်ကပြောကြားခဲ့သည်။ဂျီနီဗာအခြေစိုက် အစိုးရ၊ပုဂ္ဂလိကမဟာမိတ်အဖွဲ့ဖြစ်သည့် အဆိုပါရန်ပုံငွေအဖွဲ့သည် အစိုးရများ၊အရပ်ဘက်အဖွဲ့အစည်းများနှင့် ပုဂ္ဂလိကကဏ္ဍတို့မှလာမည့်သုံးနှစ်အတွက် ရန်ပုံငွေကန်ဒေါ်လာ ၁၈ ဘီလီယံကိုရှာဖွေနေခြင်းဖြစ်ပြီး ဗုဒ္ဓဟူးနေ့ညီလာခံမတိုင်မီပင် စုစုပေါင်းလိုအပ်နေသည့်ပမာဏ၏ သုံးပုံတစ်ပုံထက်ပို၍ရရှိထားပြီးဖြစ်သည်။

အလှူငွေများပိုမိုမျှော်လင့်ထားသောကြောင့် ကန်ဒေါ်လာ ၁၄ ဒသမ ၂၅ ဘီလီယံပမာဏသို့တိုးလာနိုင်ဖွယ်ရှိသည်ဟု Global Fund ကပြောကြားခဲ့သည်။

“မာလာဝီအစိုးရနဲ့ပြည်သူတွေအတွက်ကတော့ ဒါဟာညီလာခံတစ်ခုမဟုတ်ပဲ အသက်ကယ်အစီအစဉ်တစ်ခုပါပဲ” ဟု မာလာဝီသမ္မတ Lazarus Chakwera ကပြောကြားခဲ့ပြီး ကန်ဒေါ်လာ ၁ သန်းပါဝင်မည်ဟုလည်း ကတိပြုခဲ့သည်။UNAIDS ၏အဆိုအရ ၂၀၂၁ ခုနှစ်၌ မာလာဝီတွင် အရွယ်ရောက်ပြီးသူနှင့်ကလေးပေါင်း ၉၉၀,၀၀၀ တွင် HIV ရောဂါပိုးရှိနေကြောင်းသိရှိရပြီး တီဘီရောဂါသည်လည်း မာလာဝီ၏အဓိကပြည်သူ့ကျန်းမာရေးပြဿနာတစ်ခုဖြစ်သည်ဟုသိရှိရသည်။

ဥရောပကော်မရှင်အကြီးအကဲ အူစလာဗွန်ဒယ်လီရန် ကလည်းရန်ပုံငွေအတွက် ယူရို ၇၁၅ သန်း၊ပြင်သစ်သမ္မတအမန်နူရယ်မာခရွန်က နောက်ထပ်ယူရိုသန်း ၃၀၀ ထပ်မံပါဝင်ခဲ့ပြီး စုစုပေါင်းပြင်သစ်၏ထည့်ဝင်ငေွ ၁ ဒသမ ၆ ဘီလီယံအထိဖြစ်လာခဲ့သည်။နိုင်ဂျီးရီးယားမှ ကန်ဒေါ်လာ ၁၃ ဒသမ ၂ သန်းနှင့် နယ်သာလန်မှ ယူရို သန်း ၁၈၀ အပါအဝင် အင်ဒိုကလည်း ကန်ဒေါ်လာ ၁၅ ဒသမ ၅ သန်းအသီးသီးပေးအပ်ခဲ့ကြသည်။

ရန်ပုံငွေအဖွဲ့၏ ၂၀၂၂ ခုနှစ်အစီရင်ခံစာအရ ကုသမှုနှင့်ကာကွယ်ရေးကြိုးပမ်းမှုများရောက်ရှိမှုကြောင့် ၂၀၂၀ ပြည့်နှစ်က လူနာဦးရေသည် အနှစ် ၂၀ နီးပါးအတွင်း ပထမဆုံးအကြိမ်ကျဆင်းသွားခဲ့သော်လည်း ကိုဗစ်ကြောင့်ထိထိမိမိဆက်လက်မလုပ်ဆောင်နိုင်ခဲ့သဖြင့် မနှစ်ကပြန်လည်မြင့်တက်လာခဲ့ကာ ကမ္ဘာကြီးသည်လည်း အဆိုပါရောဂါများကိုအမြစ်ပြတ်ချေမှုန်းနိုင်သည့်လမ်းကြောင်းပေါ်မရောက်သေးဟုပြောကြားခဲ့သည်။

သို့သော်အဆိုပါရန်ပုံငွေအဖွဲ့စတင်တည်ထောင်ချိန် ၂၀၀၂ ခုနှစ်မှစကာ လူပေါင်းသန်း ၅၀ ခန့်အားအသက်ကယ်တင်နိုင်ခဲ့သည်ဟုဖော်ပြထားသည်။

Source –Reuters/ec

Comments (0)

Leave a reply

Your email address will not be published. Required fields are marked *

*