ထားဝယ်-မြိတ် ကားလမ်းပေါ်၌ ခရီးသည်တင်ယာဉ်တစ်စီး မိုင်းဖောက်ခွဲတိုက်ခိုက်ခံရ၊ ယာဉ်မောင်းနှင့် ခရီးသွားပြည်သူ ၁ ဦး မိုင်းစထိမှန်
ထားဝယ်-မြိတ် ကားလမ်းပေါ်၌ ကော့သောင်းမြို့မှ ထားဝယ်မြို့သို့ မောင်းနှင်လာသော ခရီးသည်တင်ယာဉ်တစ်စီးသည် မိုင်းဖောက်ခွဲတိုက်ခိုက်ခံခဲ့ရပြီး ယာဉ်မောင်းနှင့် ခရီးသွားပြည်သူ ၁ ဦး ထိခိုက်ဒဏ်ရာရရှိခဲ့ကြောင်း သတင်းရရှိသည်။
စက်တင်ဘာ ၂၀ ရက် နံနက် ၁၀ နာရီအချိန်ခန့်တွင် ကော့သောင်းမြို့မှ ထားဝယ်မြို့သို့ ယာဉ်မောင်း အောင်ဌေး(ခ)မင်းမင်း (ဘ)ဦးအောင်မင်း မောင်းနှင်၍ ယာဉ်နောက်လိုက် ဇော်လွင် (ဘ)ဦးမြင့်လွင်နှင့် ကော့သောင်းမြို့မှ ခရီးသည် ကျား ၄ ဦး၊ မ ၁ ဦး၊ ပေါင်း ၅ ဦး လိုက်ပါလာသည့် ယူတင်အိုအေစစ် အမည်ရှိ ခရီးသည်တင် Townace အမျိုးအစား ယာဉ်သည် ထားဝယ်-မြိတ် ကားလမ်း မိုင်တိုင်အမှတ် ၁၀၂ နှင့် ၁၀၃ အကြားတွင် အမည်မသိလက်နက်ကိုင်များက လက်လုပ်မိုင်း ၁ လုံးဖြင့် ဖောက်ခွဲတိုက်ခိုက်ခဲ့ခြင်း ဖြစ်သည်ဟု သိရသည်။
ထိုသို့ ဖောက်ခွဲတိုက်ခိုက်မှုကြောင့် ယာဉ်အနည်းငယ်ထိခိုက်ပျက်စီးခဲ့ပြီး ယာဉ်မောင်းဖြစ်သူ အောင်ဌေးနှင့် ခရီးသည် မခက်ခက်လှိုင်(ဘ) ဦးတင်ဝင်း တို့တွင် မိုင်းစထိမှန်ဒဏ်ရာများ ရရှိခဲ့သည့်အတွက် မြိတ်ပြည်သူ့ဆေးရုံသို့ ပို့ဆောင်ပေးခဲ့ရသည်။
အများပြည်သူ သွားလာအသုံးပြုလျက်ရှိသည့် လမ်းမကြီးများပေါ်တွင် သွားလာလျက်ရှိသည့် ယာဉ်များအား အကြောင်းမဲ့ မိုင်းဖောက်ခွဲတိုက်ခိုက်ခဲ့သူများအား ဥပဒေနှင့်အညီ ထိရောက်စွာအရေးယူနိုင်ရေးအတွက် လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သိရသည်။