ရုရှားမှဂျုံတန်ချိန် ငါးသိန်းတင်သွင်းရန်ဘင်္ဂလားဒေ့ရှ်စီစဉ်

ရုရှားမှဂျုံတန်ချိန် ငါးသိန်းတင်သွင်းရန်ဘင်္ဂလားဒေ့ရှ်စီစဉ်

ဒါကာ၊ဩဂုတ် ၂၈
ကုန်ဈေးနှုန်းများမြင့်တက်လာချိန်တွင် ရိက္ခာရရှိရန်ကြိုးပမ်းနေသောဘင်္ဂလားဒေ့ရှ်သည် ရုရှားနိုင်ငံမှဂျုံတန်ချိန်ပေါင်း ၅၀၀,၀၀၀ ကိုတစ်တန်လျှင် ဒေါ်လာ ၄၃၀ နှုန်းဖြင့်တင်သွင်းရန်စီစဉ်ထားကြောင်း အဆိုပါကိစ္စနှင့်တိုက်ရိုက်ပတ်သက်သူ အစိုးရအရာရှိနှစ်ဦးကပြောကြားခဲ့သည်။

ယူကရိန်းနှင့်ရုရှားအရေးကြောင့် ဂျုံတင်ပို့ရန်ခက်ခဲနေသည့် ဒါကာသည် ၎င်း၏အကြီးမားဆုံးဂျုံတင်ပို့သူတစ်ဦးဖြစ်သည့် အိန္ဒိယမှမေလကဂျုံတင်ပို့မှုကိုပိတ်လိုက်ချိန်မှစ၍ ဂျုံတင်သွင်းရန်နည်းလမ်းများကို ရှာဖွေနေခဲ့သည်။

ရုရှားနှင့်သဘောတူညီချက်ကို ရက်အနည်းငယ်အတွင်း လက်မှတ်ရေးထိုးမည်ဖြစ်ပြီး ဇန်နဝါရီလမှစတင်ကာ အဆင့်ဆင့်တင်ပို့မည်ဖြစ်ကြောင်း အရာရှိတစ်ဦးကပြောကြားခဲ့သည်။ယခုသွင်းကုန်အတွက် ဘင်္ဂလားဒေ့ရှ်မှ ဒေါ်လာဖြင့်ပေးဆောင်ရမည်ဖြစ်ပြီး ကုန်ကျစရိတ်များတွင် ကုန်စည်ပို့ဆောင်မှု၊အာမခံနှင့်ကုန်တင်ကုန်ချလုပ်အားခများပါဝင်သည်ဟု အခြားအရာရှိတစ်ဦးကဆိုသည်။နှစ်ဖက်တာဝန်ရှိသူများက ၎င်းတို့အနေဖြင့်မီဒီယာသို့ပြောခွင့်မရှိသောကြောင့် အမည်မဖော်လိုကြောင်းပြောခဲ့သည်။

ဝန်ကြီးချုပ်၏ ပုဂ္ဂလိကစက်မှုလုပ်ငန်းနှင့် ရင်းနှီးမြှုပ်နှံမှုအကြံပေး မစ္စတာ Salman Fazlur Rahman ကလည်း ဘင်္ဂလားဒေ့ရှ်သည် ရုရှားထံမှ ဂျုံနှင့်ဓာတ်မြေဩဇာများဝယ်ယူနေကြောင်း ရိုက်တာသတင်းဌာနသို့ပြောကြားခဲ့သည်။

“ရုရှားနိုင်ငံကနေ အစားအစာနဲ့ ဓာတ်မြေဩဇာ‌ေတွတင်သွင်းတဲ့အတွက် ဒေါ်လာနဲ့ ကမ္ဘာလုံးတစ်ဝန်းမှာရှိတဲ့ဘဏ် ၂၄ ခု က‌ ေနငွေပေးချေနိုင်ပြီး အဲ့ဒီတင်သွင်းမှုတွေအတွက် ကန့်သတ်ပိတ်ပင်ထားတာမျိုးမရှိပါဘူး” ဟု ၎င်းကဆက်လက်ပြောကြားခဲ့သည်။

အိန္ဒိယမှတင်ပို့မှုကိုတားမြစ်လိုက်ပြီးနောက် ယခုနှစ်အစောပိုင်းက သုံးနှစ်အတွင်းအနိမ့်ဆုံးဖြစ်သွားသည့် အစိုးရစတော့များကိုထိန်းညိှရန် နိုင်ငံတကာတင်ဒါများမှကြိုးပမ်းခဲ့သော်လည်း တည်ငြိမ်မှုမရှိသောကမ္ဘာ့ဈေးကွက်တွင် အလွန်မြင့်မားနေသည့်ဈေးနှုန်းများကြောင့် တင်ဒါအချို့ကိုဖျက်သိမ်းခဲ့ရသည်ဟုဆိုသည်။

ဘင်္ဂလားဒေ့ရှ်သည် ဟိုယခင်ကပင်လယ်နက်ဂျုံကိုအဓိကတင်သွင်းသူတစ်ဦးဖြစ်သော်လည်း ရုရှားကယူကရိန်းသို့ကျူးကျော်ခဲ့သည့် ဖေဖော်ဝါရီလနှောင်းပိုင်းမှစကာ နိုင်ငံသို့တင်သွင်းမှုမရှိတော့ချေ။ပုဂ္ဂလိကကုန်သည်များသည်  ရုရှား၊ယူကရိန်းနှင့်ဘူလ်ဂေးရီးယားတို့မှ ပင်လယ်နက်ဂျုံကို စတင်တင်သွင်းနေပြီဖြစ်သည်ဟု စက်မှုလုပ်ငန်းဆိုင်ရာ သတင်းရင်းမြစ်တစ်ဦးကပြောကြားခဲ့သည်။အိမ်နီးချင်း အိန္ဒိယနိုင်ငံသည်ဂျုံတင်ပို့မှုတားမြစ်ချက်ကိုရုတ်သိမ်းရန်မဖြစ်နိုင်သောကြောင့် ယခုလိုဝယ်ယူရခြင်းဖြစ်သည်ဟုဆိုသည်။

ဘင်္ဂလားဒေ့ရှ်သည် ၂၀၂၁ ခုနှစ် ဇွန်လအထိဂျုံတန်ချိန်ပေါင်း ၅ ဒသမ ၄ သန်းတင်သွင်းခဲ့ပြီး အိန္ဒိယမှ ၂၄ ရာခိုင်နှုန်း၊ရုရှားမှ ၂၁ ရာခိုင်နှုန်းနှင့် ယူကရိန်းမှ ၁၇ ရာခိုင်နှုန်းတို့ဖြစ်သည်။ဘင်္ဂလားဒေ့ရှ်သည် ပြည်တွင်းဂျုံလိုအပ်ချက်ကိုကာမိရန် တင်သွင်းမှုကိုသာမှီခိုနေရခြင်းဖြစ်သည်။နိုင်ငံ၏အထွက်နှုန်းမှာ တန်ချိန်တစ်သန်းခန့်အထိသာထွက်ရှိပြီးတန့်နေသောကြောင့်ဖြစ်သည်။

ကုန်ဈေးနှုန်းကြီးမြင့်မှု၏ သက်ရောက်မှုကိုထိန်းချုပ်ရင်ဆိုင်နေရသောအစိုးရသည် ယခုလအစောပိုင်းတွင် ရေနံဈေးကို ၅၁ ဒသမ ၇ ရာခိုင်နှုန်းအထိမြှင့်တင်လိုက်သောကြောင့် အခြားပြဿနာများနှင့်ပါရင်ဆိုင်ရနိုင်သည်ဟုဆိုသည်။

ဘင်္ဂလားဒေ့ရှ်နိုင်ငံသည် အနောက်နိုင်ငံများ၏ပိတ်ဆို့ဒဏ်ခတ်ခြင်းခံထားရသည့် ရုရှားထံမှဈေးနှုန်းသက်သက်သာသာဖြင့် လောင်စာဆီတင်သွင်းနိုင်မည်ဟူသည့် ရုရှား၏ကမ်းလှမ်းချက်က ဒါကာအတွက် စိန်ခေါ်မှုတစ်ရပ်ဖြစ်နေသော်လည်း အဆိုပါကမ်းလှမ်းချက်ကို ပြန်လည်သုံးသပ်နေကြောင်းတာဝန်ရှိသူများကပြောကြားခဲ့သည်။

Source၊ ရိုက်တာ