စင်္ကာပူနှင့်ဘရူနိုင်း နားလည်မှုစာချွန်လွှာများရေးထိုး

စင်္ကာပူနှင့်ဘရူနိုင်း နားလည်မှုစာချွန်လွှာများရေးထိုး

စင်္ကာပူ၊ဩဂုတ် ၂၅

စင်္ကာပူနှင့်ဘရူနိုင်းတို့သည် နားလည်မှုစာချွန်လွှာ (MoUs) လေးခုကို လက်မှတ်ရေးထိုးခဲ့ပြီး နှစ်နိုင်ငံကြားရေရှည်တည်တံ့သောဆက်ဆံရေးကို ထပ်မံအတည်ပြုခဲ့ကြောင်း စင်္ကာပူနိုင်ငံခြားရေးဝန်ကြီးဌာန (MFA) က သြဂုတ်လ ၂၅ ရက် ကြာသပတေးနေ့က ပြောကြားခဲ့သည်။

ဘရူနိုင်းဆူလတန်ဘုရင်မင်းမြတ် Hassanal Bolkiah ၏စင်္ကာပူနိုင်ငံသို့ နှစ်ရက်ကြာနိုင်ငံတော်ခရီးစဉ်သည် ကြာသပတေးနေ့က ပြီးဆုံးခဲ့ပြီဖြစ်သည်။၎င်း၏ ခရီးစဉ်အတွင်း ဝန်ကြီးချုပ် လီရှန်လွန်းကလည်း စင်္ကာပူသို့ ပဉ္စမအကြိမ် နိုင်ငံတော်ခရီးစဉ်အဖြစ် ရောက်ရှိနေသည့် ဘရူနိုင်းဘုရင်နှင့်တွေ့ဆုံခဲ့သည်။

ဖေ့စ်ဘွတ်တွင် မစ္စတာလီက “လွန်ခဲ့တဲ့အပတ်အနည်းငယ်က ဘရူနိုင်းဘုရင်မင်းမြတ်ရဲ့(၇၆) နှစ်မြောက် မွေးနေ့ပွဲအတွက် ကျွန်တော်သွားရောက်လည်ပတ်တုန်းက နောက်ဆုံးဆုံတွေ့ထားတာဖြစ်ပြီး နှစ်နိုင်ငံဆက်ဆံရေးခိုင်မာစေဖို့ ထပ်မံအတည်ပြုခဲ့ကြပါတယ်” ဟုရေးသားထားသည်။

ဘုရင်မင်းမြတ်၏ခရီးစဉ်သည် နှစ်နိုင်ငံလုံးအတွက် ကာကွယ်ရေးနှင့်ဘဏ္ဍာရေး အပါအဝင် အစဉ်အလာမဏ္ဍိုင်များ၌ ပူးပေါင်းဆောင်ရွက်မှုကို တည်ဆောက်ရန်အထူးကောင်းမွန်သော အခါသမယဖြစ်စေခဲ့ကြောင်း နိုင်ငံခြားရေးဝန်ကြီးဌာနကပြောကြားခဲ့သည်။

“နိုင်ငံငယ်များအနေနှင့် စင်္ကာပူနှင့်ဘရူနိုင်းတို့သည် မသေချာမရေရာသောအခြေနေများအတွင်း နှစ်နိုင်ငံ၏ပြန်လည်ရုန်းထနိုင်စွမ်းကို ပိုမိုခိုင်မာစေရန် အတူတကွလုပ်ဆောင်နေကြသည်” ဟုလည်း MFA ကထပ်လောင်းပြောကြားခဲ့သည်။

ဘရူနိုင်းဘုရင်မင်းမြတ်၏ ခရီးစဉ်အတွင်း နှစ်နိုင်ငံ ပူးပေါင်းဆောင်ရွက်မှု တိုးမြှင့်ရေး နည်းလမ်းများကို ဆွေးနွေးခဲ့ကြသည်။စင်္ကာပူနှင့် ဘရူနိုင်းအေဂျင်စီများသည် စွမ်းအင်၊ပတ်ဝန်းကျင်ကိုမထိခိုက်သော စီးပွားရေး ၊ အစားအစာနှင့် ဆေးဝါးထောက်ပံ့မှုစသည့်ကဏ္ဍများတွင် ပိုမိုပူးပေါင်းဆောင်ရွကက်ရန် MoU ရေးထိုးခဲ့ကြောင်း ကုန်သွယ်ရေးနှင့်စက်မှုဝန်ကြီးဌာန (MTI) မှ ပြောကြားခဲ့သည်။

“စွမ်းအင်၊Green economy ၊အစားအစာနှင့် ဆေးဘက်ဆိုင်ရာ ထောက်ပံ့မှု၌ပြန်လည်ရုန်းထနိုင်ရေးတို့၌ နှစ်နိုင်ငံပူးပေါင်းဆောင်ရွက်မှုများ အားကောင်းစေရန် MoU ရေးထိုးခြင်းသည် နှစ်နိုင်ငံလုံးအတွက် ပိုမိုရေရှည်တည်တံ့ခိုင်မြဲသောအနာဂတ်ကိုရရှိ‌စေပြီး အပြန်အလှန်အကျိုးရှိစေသည်” ဟု စင်္ကာပူကုန်သွယ်ရေးနှင့်စက်မှုဝန်ကြီး Gan Kim Yong ကပြောကြားခဲ့သည်။

“စင်္ကာပူသည် ဘရူနိုင်းနှင့်အထူးချစ်ကြည် ရင်းနှီးကာ အနာဂတ်အတွက် ပိုမိုကောင်းမွန်အောင်ပြင်ဆင်ပေးမည့် ပူးပေါင်းဆောင်ရွက်မှုနယ်ပယ်များကို ရှာဖွေရန် မိတ်ဖက်များအဖြစ် ဆက်လက် ဆောင်ရွက်သွားမည်ဖြစ်သည်” ဟုထပ်လောင်းပြောကြားခဲ့သည်။

နှစ်နိုင်ငံသည် ပညာသင်ဆုအပါအဝင် ဘရူနိုင်း-စင်္ကာပူပြည်သူ့ဝန်ဆောင်မှုစွမ်းရည်များ ဖွံ့ဖြိုးတိုးတက်စေသည့် ပူးပေါင်းဆောင်ရွက်ရေးဆိုင်ရာ MoU များလည်းလက်မှတ်ရေးထိုးခဲ့သည်။

ဘုရင်သည် Sembawang လေတပ်စခန်းသို့လည်းသွားရောက်လည်ပတ်ခဲ့ပြီး ကာကွယ်ရေးဝန်ကြီး Ng Eng Hen ကတွေ့ဆုံဧည့်ခံခဲ့သည်။အဆိုပါခရီးစဉ်တွင် ယဉ်ကျေးမှု၊ရပ်ရွာနှင့်လူငယ်ရေးရာ ဝန်ကြီး Edwin Tong၊ တပ်မတော် ကာကွယ်ရေးဦးစီးချုပ် ဒုတိယဗိုလ်ချုပ်ကြီး Melvyn Ong နှင့် လေတပ်ဦးစီးချုပ် ဗိုလ်ချုပ် Kelvin Khong တို့ တက်ရောက်ခဲ့ကြသည်။

ထို့နောက် ဘုရင်မင်းမြတ်သည် စင်္ကာပူသမ္မတနိုင်ငံလေတပ်စခန်း (RSAF) သို့သွားရောက်ခဲ့ပြီး Aster 30 ဒုံးခွင်းဒုံးစနစ်ကိုလည်းကြည့်ရှုခဲ့ကြောင်း ကာကွယ်ရေးဝန်ကြီးဌာနမှပြောကြားခဲ့သည်။

ဝန်ကြီးချုပ် လီရှန်လွန်းနှင့်ဇနီးတို့သည် ဘရူနိုင်းဘုရင်မင်းမြတ်၏ ၇၆ နှစ်မြောက် မွေးနေ့ပွဲကိုတက်ရောက်ရန် ဇူလိုင်လကလည်း ဘရူနိုင်းသို့သွားရောက်ခဲ့သေးသည်။ထိုခရီးစဉ်အတွင်း မစ္စတာလီနှင့်ဇနီးတို့အား နိုင်ငံတော်ဂုဏ်ပြုဆုများလည်း ပေးအပ်ခဲ့သည်ဟုသိရှိရသည်။

Source – CNA/rc(mi)