ထိုင်ဝမ်ခရီးစဉ်ကြောင့် လစ်သူယေးနီးယား ဒုဝန်ကြီးအား တရုတ်ကဒဏ်ခတ်ပိတ်ဆို့

0
138

ထိုင်ဝမ်ခရီးစဉ်ကြောင့် လစ်သူယေးနီးယား ဒုဝန်ကြီးအား တရုတ်ကဒဏ်ခတ်ပိတ်ဆို့

ပေကျင်း၊ဩဂုတ် ‌၁၃

 

ထိုင်ဝမ်သို့ သွားရောက်ခဲ့သည့် လစ်သူယေးနီးယား ပို့ဆောင်ရေးနှင့်ဆက်သွယ်ရေး ဒုတိယဝန်ကြီး အေနင်ဗာဆယ်ကဗချီတာအပေါ် ပိတ်ဆို့အရေးယူမှုများ ချမှတ်ခဲ့သည်ဟု တရုတ်နိုင်ငံခြားရေးဝန်ကြီးဌာနက သြဂုတ် ၁၂ ရက်တွင် ပြောကြားခဲ့သည်။

 

ဆက်လက်၍လည်း လစ်သူယေးနီးယား ဝန်ကြီး ဗာဆယ်ကဗချီတာ၏ဝန်ကြီးဌာနနှင့်လက်တွဲဆောင်ရွက်မည့် ပို့ဆောင်ရေးဆိုင်ရာ သဘောတူညီမှုအားလုံးကိုလည်း တရုတ်နိုင်ငံဘက်မှ ဆိုင်းငံ့ထားမည်ဖြစ်ကြောင်း နိုင်ငံခြားရေးဝန်ကြီးဌာနကကြေငြာခဲ့သည်။

 

လစ်သူယေးနီးယားနိုင်ငံ၏ ပို့ဆောင်ရေးနှင့် ဆက်သွယ်ရေးဝန်ကြီးဌာန၏ ကြေညာချက်တွင်မူ တရုတ်နိုင်ငံ၏ကြေငြာချက်အတွက်အတွက် စိတ်မကောင်းဖြစ်မိကြောင်း ပြောကြားခဲ့သည်။

 

“ယခုလုပ်ရပ်သည် ပေကျင်းအနေဖြင့် (အီးယူ) အဖွဲ့ဝင်နိုင်ငံအပေါ် ဥပဒေနှင့်မညီ‌သော လုပ်ရပ်များဆက်လက်အရှိန်မြှင့်လုပ်ဆောင်ရန် ရွေးချယ်လိုက်ခြင်းပင်ဖြစ်သည်” ဟု လစ်သူယေးနီးယား ဝန်ကြီးဌာနကရိုက်တာ သို့‌ပေးပို့သည့်ကြေညာချက်တွင်ဖော်ပြထားသည်။

 

“ဒါဟာတရုတ်နိုင်ငံနဲ့ ဒီမိုကရေစီနိုင်ငံတွေရဲ့ ဆက်ဆံရေးတိုးတက်မှုကို ပျက်စီးစေရုံသာမက၊ ကမ္ဘာ့စီးပွားရေးအတိုးတက်ဆုံးနိုင်ငံများထဲမှ တစ်နိုင်ငံဖြစ်သည့် ထိုင်ဝမ်နှင့် အပြန်အလှန်အကျိုးရှိစေမည့် ဆက်ဆံမှု ဖွံ့ဖြိုးတိုးတက်ရေးကို အဟန့်အတားမဖြစ်စေရေးဟူသည့် ပေကျင်း၏ကိုယ်ပိုင်မူဝါဒကိုပါ ပြောင်းပြန်လှန်လိုက်ခြင်းပင်ဖြစ်သည်” ဟုဆိုသည်။

 

လစ်သူယေးနီးယား၏ မကြာသေးမီက ထိုင်ဝမ်နှင့် ဆက်ဆံရေးအားကောင်းလာမှုက ပေကျင်းကိုဒေါသအမျက်‌ေချာင်း‌ေချာင်းထွက်စေခဲ့ပြီး ယခုနှစ် ပထမသုံးလပတ်အတွင်း တရုတ်နိုင်ငံသို့ လစ်သူယေးနီးယားကုန်တင်ပို့မှုကို လုံးဝမရှိတော့သလောက်နီးပါးအထိ ကျဆင်းသွားစေခဲ့သည်။

 

လစ်သူယေးနီးယားဝန်ကြီး ဗာဆယ်ကဗချီတာကမူ၎င်းသည် ထိုင်ဝမ်ရှိမြို့သုံးမြို့နှင့် ဆိပ်ကမ်းနှစ်ခုသို့သွားရောက်ခဲ့ပြီး ငါးရက်တာခရီးစဥ်အတွင်း အစည်းအဝေး ၁၄ ကြိမ် ပြုလုပ်ခဲ့ကြောင်း သောကြာနေ့ကတွစ်တာတွင်ရေးသားခဲ့သည်။

 

ထပ်မံ၍လည်း “ထိုင်ဝမ်ကိုသွားခဲ့တဲ့ တစ်ပတ်အတွင်း အင်မတန်အကျိုးရှိခဲ့ပါတယ်၊ထိုင်ဝမ်ရေကြောင်းပို့ဆောင်ရေး၊ သင်္ဘော၊လေကြောင်းကုမ္ပဏီများနှင့် လစ်သူယေးနီးယား သယ်ယူပို့ဆောင်ရေး ပူးပေါင်းဆောင်ရွက်မှုဆိုင်ရာ နည်းလမ်းသစ်များကိုလည်း ရှာဖွေနေပါတယ်” ဟု တွစ်တာတွင်ရေးသားခဲ့သည်။ထိုသို့ရေးသားရာတွင် ထိုင်ဝမ်အစား (TW) ဟုလည်းကောင်း၊ လစ်သူယေးနီးယားအစား (LT) ဟုလည်းကောင်း အတိုကောက်စကားလုံးများကိုသာသုံးစွဲခဲ့သည်။

 

လစ်သူယေးနီးယားနိုင်ငံ၏ စီးပွားရေးနှင့် ဆန်းသစ်တီထွင်မှုဆိုင်ရာ ဒုဝန်ကြီး ရိုဗိုက်တာ နိုပရှီရန်နယ် သည် ဇွန်လကတိုင်ပေသို့ သွားရောက်လည်ပတ်ခဲ့စဉ်ကလည်း လစ်သူယေးနီးယားအနေဖြင့် စက်တင်ဘာလ၌ ထိုင်ဝမ်တွင် ကိုယ်စားလှယ်ရုံးဖွင့်လှစ်ရန် စီစဉ်ထားကြောင်း ပြောကြားခဲ့သည်။

 

လစ်သူယေးနီးယားသည် ထိုင်ဝမ်အမည်ဖြင့် ၎င်း၏မြို့တော် ဗေးနီးယက်စ်တွင် သံရုံးဖွင့်လှစ်ခွင့်ပြုရန် ယမန်နှစ်ကဆုံးဖြတ်ခဲ့ပြီး ထိုဆုံးဖြတ်ချက်ကို ပြန်လည်ပြင်ဆင်ရန်လည်း တရုတ်၏ဖိအားပေးခြင်းကိုခံနေရသည်။တရုတ်သည် လစ်သူယေးနီးယားနိုင်ငံနှင့် သံတမန်ဆက်ဆံရေးကို လျှော့ချခဲ့ပြီး ၎င်းနှင့် ဆက်ဆံရေးဖြတ်တောက်ရန်လည်း ကျန်နိုင်ငံပေါင်းစုံကို ဖိအားပေးခဲ့သည်။

ဇန်နဝါရီလကလည်း ဥရောပသမဂ္ဂသည် တရုတ်အနေဖြင့် လစ်သူယေးနီးယားအပေါ် ကုန်သွယ်မှုကျင့်ထုံးများကို ဖောက်ဖျက်ကာ ကမ္ဘာ့ကုန်သွယ်ရေးအဖွဲ့၏ ဈေးကွက်ခိုင်မာမှုကို ခြိမ်းခြောက်နေခဲ့သည်ဟုစွပ်စွဲခဲ့ပြီး စိန်ခေါ်မှုတစ်ရပ်ကိုစတင်ခဲ့သည်။

တရုတ်နိုင်ငံသည် WTO ၏စည်းမျဉ်းများကို အမြဲလိုက်နာခဲ့ပြီး ယခုလစ်သူယေးနီးယားပြဿနာသည် နိုင်ငံရေးသဘောသဘာဝအရဖြစ်ပြီး စီးပွားရေးနှင့်မဆိုင်ဟုပြောကြားခဲ့သည်။

 

Source – Reuters/nh


LEAVE A REPLY

Please enter your comment!
Please enter your name here