အောင်ဆန်းကွင်း ဂိတ်များမှ လူမဲ့တန်ဆာ ပို့၍မရသော်လည်း မြို့တွင်းရှိ ဂိတ်ခွဲများမှ ပို့ဆောင်၍ရကြောင်း ခရီးသည်ပို့ဆောင်ရေးယာဥ်လိုင်းအချို့ပြော
ရန်ကုန်မြို့တွင်း အောင်ဆန်းအားကစားကွင်းပတ်လည်က ကားဂိတ်များတွင် လူမဲ့တန်ဆာ ပို့၍မရတော့သော် လည်း မြို့တွင်းရှိ ဂိတ်ခွဲများတွင် လူမဲ့တန်ဆာလက်ခံပေးကြောင်း အဝေးပြေး ယာဉ်လိုင်းအချို့မှ သိရသည်။
ဩဂုတ်လ(၄)ရက်မှ စတင်ကာ အောင်ဆန်းကွင်းဂိတ်များမှ တန်ဆာကုန်ပစ္စည်း ပို့ဆောင်ခြင်းကို ပိတ်လိုက်ကြောင်း သတင်းများထွက်ပေါ်နေမှုနှင့် ပတ်သက် ၍ စုံစမ်းမေးမြန်းစဉ် ယာဉ်လိုင်းတာဝန်ရှိသူအချို့က ပြန် လည်ဖြေကြားခဲ့ခြင်း ဖြစ်သည်။
” အောင်ဆန်းကွင်းမှာတော့ ပို့လို့ မရတော့ဘူး ။ ဒါပေမဲ့ မြို့တွင်းက ဗိုလ်အောင်ကျော်လမ်းအထက်ဘလောက်၊ အနော်ရထာလမ်းနဲ့ ဗိုလ်ချုပ်လမ်းအတွင်းမှာရှိတဲ့ ဂိတ်ခွဲတွေမှာ ပို့လို့ရပါတယ်။ ၀န်ထမ်းတွေလဲရှိပါတယ်၊ ဂိတ်ခွဲတစ်ခုဖွင့်ထားပါတယ်၊ အဲဒီမှာ လက်ခံပေးနေပါတယ်” ဟု အဝေးပြေး ယာဉ်လိုင်း တစ်ခုမှ တာဝန်ရှိသူတစ်ဦးက ပြောသည်။
လက်ရှိတွင် အောင်ဆန်းကွင်းရှိ ဂိတ်များ၌ လူစီး လက် မှတ်များ ရောင်းချပေးနေသေးပြီး ပစ္စည်း ပို့ခွင့်ကို မည်သည့်အချိန်ထိ ပိတ်ထားဦးမည်ကို မသိရှိသေးကြောင်းနှင့် မည်သည့်အတွက်ကြောင့် ယခုကဲ့သို့ ပစ္စည်းပို့ခွင့်ကို တားမြစ်သည်ကိုလည်း မသိရှိရကြောင်း အဆိုပါ ယာဉ်လိုင်း တာဝန်ရှိသူက ပြောသည်။
အတည်မပြုနိုင်သေးသည့် သတင်းများအရ အောင်ဆန်း အားကစားကွင်း အဆင့်မြှင့်တင်မှု လုပ်ငန်းများ လုပ် ဆောင်ရန်ရှိနေသည့်အတွက် ယခုလို ပိတ်ခိုင်းခြင်းဟု သတင်းများ ထွက်ပေါ်နေသော်လည်း တရားဝင် ထုတ်ပြန်ခြင်း မရှိသေးပေ။ အောင်ဆန်းကွင်းဂိတ် ပိတ်ခိုင်းခြင်းနှင့် ပတ်သတ်၍ မေးမြန်းရာ “ရေရေရာရာ ဘာမှမသိသေးဘူး၊ ပိတ်တော့မှာလားဆိုတာကို” ဟုဂိတ်တာဝန်ခံတစ်ဦးမှ ပြောကြားသည်။
လက်ရှိတွင် မြို့တွင်းရှိ ကျောက်တံတားမြို့နယ်အတွင်းရှိ ဂိတ်ခွဲအချို့တွင် တန်ဆာပစ္စည်း လက်ခံခြင်းကို လုပ်ဆောင်ပေးနေပြီး ယခင်က ကန့်သတ်ထားသည့် ကန့် သတ်ပစ္စည်းများကိုတော့ တင်ပို့ခွင့် လက်ခံမည် မဟုတ်ကြောင်းလည်း သိရသည်။
အဝေးပြေးယာဥ်များဖြင့် တန်ဆာပစ္စည်းတင်ပို့ရာတွင် ဒရုန်း၊ မှန်ဘီလူး၊ သံထည်ပစ္စည်းများအပါအဝင် ပစ္စည်း (၁၉) မျိုးအား တင်ပို့ခွင့် ကန့်သတ်ထားခြင်း ဖြစ်သည်။
ထို့အပြင် အမြန်လမ်းအသုံးပြုသည့် အဝေးပြေး ယာဉ်လိုင်းများအနေဖြင့်လည်း ကုန်ပစ္စည်း တင်ဆောင်ရာတွင် လူစီး ယာဉ်အပေါ်ပိုင်းများ၌ ကုန်ပစ္စည်း တင်ဆောင်ခြင်းမပြုဘဲ ယာဉ်ဝမ်းဗိုက်များအတွင်း၌သာ တင်ဆောင်ခွင့်ပြုမည်ဖြစ်ကြောင်းသိရသည်။
” အစ်ကိုတို့ကိုတော့ ယာဉ်အပေါ်မှာ ပစ္စည်းတင်လို့မရဘူး ။ အောက်မှာပဲ တင်ပါ။ အပေါ်မှာ တင်ရင် ဖမ်းမယ်လို့တော့ သတိပေးထားတယ်” ဟု အဝေးပြေးယာဉ်လိုင်း ပိုင်ရှင် တစ်ဦးက ပြောသည်။
အောင်ဆန်းကွင်းရှိ ဂိတ်များကို ပြီးခဲ့သည့် ဇွန်လအတွင်းကလည်း ရက်အတန်ကြာ ပိတ်ခိုင်းထားပြီး ပြန်လည်ရောင်းချခွင့်နှင့် ပစ္စည်းတင်ပို့ခွင့် ပြုထားသည်မှာ လပိုင်းသာ ရှိသေးကြောင်း သိရသည်။
