ကျွမ်းကျင်လုပ်သားများနှင့်ရင်းနှီးမြုပ်နှံသူများကိုထိုင်းကဆယ်နှစ်ဗီဇာပေးမည်

0
196

ကျွမ်းကျင်လုပ်သားများနှင့်ရင်းနှီးမြုပ်နှံသူများကိုထိုင်းကဆယ်နှစ်ဗီဇာပေးမည်

ဘန်ကောက်၊ဩဂုတ် ၄

ထိုင်းနိုင်ငံသည် ကျွမ်းကျင်လုပ်သားများနှင့် ရင်းနှီးမြှုပ်နှံသူများကို ဆွဲဆောင်သည့်အနေဖြင့် ၁၀ နှစ်ဗီဇာကိုလာမည့်စက်တင်ဘာလတွင်စတင်ထုတ်ပေးသွားမည်ဖြစ်ပြီး ယခုအစီစဉ်သည်နောက်ငါးနှစ်အတွင်း ဂျပန်နိုင်ငံနှင့် အခြားအဆင့်မြင့်စီးပွားရေးနိုင်ငံများကို ခေါ်ယူရန်ရည်ရွယ်သည့် လုပ်‌ေဆာင်မှုတစ်ခုဖြစ်သည်။

မော်တော်ကား၊ အီလက်ထရွန်းနစ်နှင့် ဇီဝနည်းပညာကဲ့သို့သော အဓိကကဏ္ဍများကို ယှဉ်ပြိုင်နိုင်စေရန်အတွက် ရေရှည်ဗီဇာကို ထုတ်ပေးခြင်းဖြစ်သည်။

ထိုင်းရင်းနှီးမြှုပ်နှံမှုဘုတ်အဖွဲ့ (BOI) ဒုတိယအထွေထွေအတွင်းရေးမှူး Narit Therdsteerasukdi အား နစ်ကေးအေးရှားကတွေ့ဆုံမေးမြန်းရာတွင် ရေရှည်နေထိုင်ခွင့်ဗီဇာသည် မြင့်မားသောစွမ်းရည်နှင့် ကျွမ်းကျင်မှုရှိသော နိုင်ငံခြားသားလူ့စွမ်းအားအရင်းအမြစ်များကို ရည်မှန်းကာလုပ်ဆောင်ခြင်းဖြစ်ပြီး စက်တင်ဘာ (၁) ရက်တွင် စတင်လျှောက်ထားနိုင်မည်ဟုပြောကြားခဲ့သည်။

ထိုင်းနိုင်ငံသည် လျှပ်စစ်ကားများ၊အီလက်ထရွန်းနစ်၊ဆေးဝါး၊ကာကွယ်ရေး အပါအဝင် စက်မှုနှင့်နည်းပညာ အမျိုးအစား ၁၀ မျိုးကျော်တွင်ပါဝင်သည့် ကုမ္ပဏီ သို့မဟုတ်သုတေသနအဖွဲ့အစည်းများနှင့် သက်ဆိုင်သည့်ကျွမ်းကျင်သူများကို ရှာဖွေနေခြင်းဖြစ်သည်။

အဝေးမှအလုပ်လုပ်လိုသော နိုင်ငံခြားကုမ္ပဏီများမှ အလုပ်သမားများလည်း ဗီဇာအစီအစဉ်အသစ်အတွက် လျှောက်ထားနိုင်ပြီး ထိုင်းနိုင်ငံသို့ ပြောင်းရွှေ့နေထိုင်နိုင်သည်။ပင်စင်ကဲ့သို့ ခိုင်မာသော၀င်ငွေရှိသည့် အသက် ၅၀ နှစ်အထက်ရှိသော အငြိမ်းစားများနှင့် ဒေါ်လာတစ်သန်းထက်ပိုသော ငွေကြေးပိုင်ဆိုင်မှုရှိသူများလည်း လျှောက်ထားနိုင်သည်။

လျှောက်ထားမှုအောင်မြင်သူများအား ဒစ်ဂျစ်တယ် အလုပ်ပါမစ်ပေးမည်ဖြစ်သည်။အစိုးရသည် ဗီဇာအမျိုးအစား‌ ပေါင်းစုံအတွက် တခါတရံ ၃၅% မှ ၁၇% ထိရှိသည့် ဝင်ငွေခွန်နှုန်းကိုလည်း လျှော့ချပေးမည်ဖြစ်သည်။

ဗီဇာအသစ်ကိုင်ဆောင်သူများကိုအလုပ်ခန့်ထားသည့်ကုမ္ပဏီများအတွက်လည်း ထိုင်းနိုင်ငံသားလေးဦးကို အလုပ်ခန့်ပြီးမှ နိုင်ငံခြားအလုပ်သမားတစ်ဦး အလုပ်ခန့်ရမည်ဟူသော စည်းမျဉ်းများမှ ကင်းလွတ်ခွင့်ပေးမည်ဖြစ်သည်။

ကင်းလွတ်ခွင့်သည် အသေးစားနှင့် အလတ်စားကုမ္ပဏီများအပြင် ယခုမှစတင်လုပ်ငန်းပျိုးထောင်သူများအတွက်ပါ ဗီဇာအစီအစဉ်အသစ်ကို အသုံးပြုနိုင်စေရန်သတ်မှတ်ထားသည်။

ဗီဇာအသစ်သည် ကျွမ်းကျင်ပညာရှင်များ နှင့် ရင်းနှီးမြှုပ်နှံသူများကို ဆွဲဆောင်ရန် ထိုင်းနိုင်ငံမှရည်ရွယ်သည့် တတိယမြောက်နည်းလမ်းဖြစ်သည်။လက်ရှိအစီအစဥ်နှစ်ခုတွင် ဗီဇာအလုပ်ပါမစ်ပံ့ပိုးကူညီမှုအစီအစဉ်သည် လွန်ခဲ့သည့်နှစ်ပေါင်း ၆၀ အတွင်း ဂျပန်၊ တရုတ်၊ တောင်ကိုရီးယားနှင့် အခြားနိုင်ငံများမှ ကုမ္ပဏီအမှုဆောင်များနှင့် ကျွမ်းကျင်ပညာရှင် ၅၀,၀၀၀ ကိုခေါ်ယူနိုင်ခဲ့သည်။

အများဆုံးလေးနှစ်အထိ နေထိုင်ခွင့်ပေးသည့် Smart Visa အစီအစဉ်သည် ၂၀၁၈ ခုနှစ်၌ ပွဲဦးထွက်စတင်ခဲ့ပြီး လူပေါင်း ၁၂၀၀ ခန့်ကိုဗီဇာထုတ်ပေးခဲ့သည်။ထိုလူအများစုသည် ဒစ်ဂျစ်တယ်ကျွမ်းကျင်မှုရှိသော ရင်းနှီးမြှုပ်နှံသူများ နှင့် စွန့်ဦးတီထွင်သူများဖြစ်ပြီး အမေရိကနှင့် ဥရောပတို့မှဖြစ်သည်။

BOI မှမစ္စတာ Narit ကမူ နှစ်ရှည်ဗီဇာအသစ်လျှောက်ထားသူများသည် ဂျပန်၊ တောင်ကိုရီးယား၊ တရုတ်၊အမေရိကနှင့် ဥရောပတို့မှ လာမည်ဟုမျှော်လင့်ထားကြောင်း ပြောကြားခဲ့သည်။

အစီအစဉ်၏ စီးပွားရေး အကျိုးသက်ရောက်မှုများအပေါ် အသေးစိတ် ခန့်မှန်းချက်များကို ထုတ်ဖော်ပြောကြားခြင်း မရှိသော်လည်း ပျမ်းမျှအားဖြင့် ဗီဇာအသစ်ကိုင်ဆောင်သူများသည် လူတစ်ဦးလျှင် ဘတ် ၁ သန်း သုံးစွဲရန် ခန့်မှန်းထားပြီး ကာလတိုအတွင်း စုစုပေါင်း ထိုင်းဘတ်ငွေ ၁ ထရီလီယံ (ဒေါ်လာ ၂၇ ဒသမ ၆ ဘီလီယံ) သုံးစွဲမှုနှင့်ရင်းနှီးမြှုပ်နှံမှုများရနိုင်မည်ဟု ဘုတ်အဖွဲ့ကမျှော်မှန်းထားသည်။

စက်မှုလုပ်ငန်းနှင့် ထောက်ပံ့ရေးကွင်းဆက်အသစ်များဖန်တီးရန် ဒေသတွင်း၌ ပြိုင်ဆိုင်မှုပြင်းထန်လာချိန်တွင် ထိုင်းနိုင်ငံ၏ နှစ်ရှည်ဗီဇာအသစ်များ ထုတ်ပေးမှုထွက်ပေါ်လာခြင်းဖြစ်သည်။

ကပ်ရောဂါဘေးမှ အပြင်းအထန်ရိုက်ခတ်လာသော ခရီးသွားလုပ်ငန်းကို ကျောထောက်နောက်ခံပြုသူများကလည်း ဗီဇာအစီအစဉ်အသစ်ကို လက်ခံကျင့်သုံးရန် နိုင်ငံတော်ကိုတွန်းအားပေးခဲ့ကြသည်။

Source – Nikkei Asia


LEAVE A REPLY

Please enter your comment!
Please enter your name here