ဆူနာမီ ဖြစ်ပေါ်နိုင်သည့် အလားအလာ နည်းသော် လည်း ကြိုတင်ပြင်ဆင်မှုများ လုပ်ဆောင်ထားသင့်ဟု ငလျင်ပညာရှင်ပြော
ကပ္ပလီပင်လယ်ပြင်အတွင်းရှိ ကျောက်လွှာထုများ လှုပ်ရှား နေမှုကြောင့် ငလျင်ငယ်များ အဆက်မပြတ်လှုပ်ခတ်နေသော်လည်း ဆူနာမီဖြစ်ပေါ်လာနိုင်ခြေ နည်းပါးကြောင်း မြန်မာနိုင်ငံ ငလျင်ကော်မတီမှ ငလျင်ပညာရှင် ဒေါ်လှလှအောင်ကပြောသည်။
ယခုရက်ပိုင်းအတွင်း မြန်မာနိုင်ငံ ကုန်းတွင်းပိုင်း ဒေ သများနှင့် ကပ္ပလီပင်လယ်ပြင်တို့တွင် ငလျင်လှုပ်ခတ်မှုများ အကြိမ်ရေ ခပ်စိပ်စိပ်ဖြစ်ပေါ်နေသည့်အပေါ် စိုးရိမ် မှုများ မြင့်တက်နေခြင်း ဖြစ်သည်။
” ဆူနာမီမလာနိုင်ပါဘူးလို့ တို့အနေနဲ့ ပြောဖို့က သိပ်မသင့်တော်ဘူး။ ဒီမှာ လှုပ်နေတဲ့ ငလျင်တွေရဲ့ သဘော သဘာဝအရတော့ နည်းတယ်။ ပင်လယ်ရေဆိုတာကလည်း သိတဲ့အတိုင်းပဲ။ လေပြင်းရင်တောင် ကမ်းပေါ်တက်တာ။ ခုအနေအထား အရတော့ ဆူနာမီဖြစ်နိုင်လောက်တဲ့ အနေအထားတော့ မရှိဘူး ။ သို့သော်လည်းပဲ သိပ်ပြင်းလာရင်တော့ ဆူနာမီအနေနဲ့ လာနိုင်စရာတော့ ရှိတယ်ပေါ့” ဟု ဒေါ်လှလှအောင်က ပြောသည်။
ဇူလိုင်လ လဆန်းပိုင်းမှ စတင်ကာ မြန်မာနိုင်ငံ ကုန်းတွင်းပိုင်းနှင့် ကပ္ပလီပင်လယ်ပြင်တို့တွင် ငလျင်များ နေ့စဉ် လှုပ်ခတ်နေပြီး ပြင်းအား ၁.၀ ရစ်(ခ်)တာစကေး မှ ၅.၆ ရစ်(ခ်)တာစကေးအထိ အမြင့်ဆုံး လှုပ်ခတ်ခဲ့ကြောင်း သိရသည်။
လက်ရှိတွင် လှုပ်ခတ်နေသည့် ငလျင်များသည် ကပ္ပလီပင်လယ်ဗဟိုပြု၍ လှုပ်ခတ်မှု အများဆုံး ဖြစ်နေပြီး ယင်းသို့ ဖြစ်ရခြင်းမှာ ကျောက်လွှာချပ်များ ရွေ့လျားခြင်းကြောင့် ဖြစ်ပေါ်လာသည့် ငလျင်အမျိုးအစားများ ဖြစ်ကြောင်း သိရသည်။
ပင်လယ်ပြင်အောက် ကျောက်လွှာချပ်များ အင်းအားပြင်းစွာ လှုပ်ခပ်ရွေ့လျားမှုဖြစ်ပေါ်ပါက ဆူနာမီများကို ဖြစ်စေနိုင်သောလည်း လက်ရှိရွေ့လျားနေသည့် အမျိုးအစားအရ ဆူနာမီလာနိုင်ချေ နည်းကြောင်း ငလျင်ပညာရှင် ဒေါ်လှလှအောင်က ပြောသည်။
” ဆူနာမီ ဖြစ်နိုင်တဲ့ သဘောသဘာဝက အပေါ်အောက် တွန်းတင်တဲ့ လှုပ်ရှားမှုမျိုးမှာ ဖြစ်တတ်တာပါ။ တစ်ခုက တွန်းတင်မယ် တစ်ခုက အောက်ကို ဆင်းသွားမယ် ဆိုတဲ့ ပုံစံမျိုးမှာပဲ ဆူနာမီက ဖြစ်တတ်တယ်။အခုဖြစ်နေတာက ဒီလိုမဟုတ်ဘူး။ ကွာ ကွာ ပြီးတော့ သွားတော့သွားတာ။ အဲဒီလို ဟာမျိုးကနေ ဆူနာမီဖြစ်တာ အရင်တုန်းကတော့ မရှိဘူး” ဟု ၎င်းက ပြောသည်။
သို့သော် လက်ရှိ လှုပ်ခတ်နေသည့် ငလျင်များထက် ပြင်းအားများသည့် ငလျင်များ ကပ္ပလီပင်လယ်ပြင် ဗဟိုပြု လှုပ်ခတ်လာမည် ဆိုပါက ဆူနာမီဖြစ်လာနိုင်သည့် အလားအလာရှိသည့်အတွက် မြန်မာ့ကမ်းရိုးတန်း အနီးအနိမ့်ပိုင်း နေထိုင်သူများ အနေဖြင့် ကြိုတင်ပြင်ဆင်မှုများ ပြုလုပ်ထားသင့်ကြောင်း ၎င်းကပြောသည်။
ထို့ကြောင့် မြန်မာ့ ကမ်းရိုးတန်း ဒေသများဖြစ်သည့် ဧရာ ဝတီတိုင်းအတွင်း ပင်လယ် ကမ်းစပ်ရှိ ဒေသများ၊ မွန် ပြည်နယ်၊ ရခိုင်ပြည်နယ်နှင့် တနင်္သာရီတိုင်း အတွင်းရှိ ပင်လယ်နှင့် နီးသည့် ဒေသများတွင် နေထိုင်သူများ အနေဖြင့် ဆူနာမီအတွက် ကြိုတင်ပြင်ဆင်မှုများ လုပ်ဆောင်ထားသင့်ကြောင်းလည်း ၎င်းကဆိုသည်။
