Kpay သုံးစွဲသူများကို ပစ်မှတ်ထား လိမ်လည်မှုများ ပိုမိုများပြာလာ

0
763

Kpay သုံးစွဲသူများကို ပစ်မှတ်ထား လိမ်လည်မှုများ ပိုမိုများပြာလာ

ယခုရက်ပိုင်းအတွင်း မြန်မာပြည်တွင်းက Kpay အသုံးပြုကာ ငွေရေး ကြေးရေး သုံးစွဲသူများကို ပစ်မှတ်ထား လိမ်လည်သည့် လိမ်လည်းမှုများ ပိုမိုများပြား လာနေကြောင်း စုံစမ်းသိရှိရသည်။

အဆိုပါ လိမ်လည်သူများသည် သက်ကြီး ရွယ်အိုများနှင့် နည်းပညာအားနည်းသူများကို ပစ်မှတ်ထားကာ Face book, Viber အစရှိသည့် လူမှုကွန်ရက် စာမျက်နှာများမှ တဆင့်သော်လည်းကောင်း၊ ဖုန်း SMS မှသော်လည်းကောင်း ချဉ်းကပ်၍ လိမ်လည်နေကြခြင်းဖြစ်သည်။

ယင်းသို့ လိမ်လည်ခံရသူများထဲတွင် အချို့တွင် နာ မည်ကြီးသူများနှင့် အနုပညာရှင် အချို့ပါ ဝင်နေကြောင်းလည်း စုံစမ်းသိရသည်။

ပြီးခဲ့သည့် ရက်ပိုင်းအတွင်းကလည်း မြန်မာနိုင်ငံ ရုပ်ရှင်အ စည်းအရုံး ဒုတိယ ဥက္ကဋ္ဌ သရုပ်ဆောင် ဦးဝင်းမြိုင် ယင်းကဲ့သို့ လိမ်လည်ခံရပြီး ၎င်း၏ KPay အတွင်းမှ ငွေကြေးအချို့ ဆုံးရှုံး သွားခဲ့ကြောင်း သိရသည်။

” ဒီအသက်အရွယ်တွေက IT နည်းပညာကို သိပ်ပြီးတော့ လက်လှမ်းမမီကဘူး။ များသောအားဖြင့်က၊ ရုတ်တရက်ကျတော့ သတိလွတ်တယ်။ သတိလွတ်တော့ အဲဒီ ဂဏန်း (၆) လုံးကို ပြောလိုက်မိတယ်။ ကိုယ့်ဆီမှာ K pay ရှိတယ် ၊ Wave pay ရှိတယ် ဆိုရင် သက်ဆိုရာက ကျလာတဲ့ Pin Code ကို ဘယ်သူ့ကိုမှ မပြော မိပါစေနဲ့လို အထပ်ထပ် အခါခါ ပြောချင်တယ်” ဟု ဦးဝင်းမြိုင်က သတိပေးစကား ပြော သည်။

၎င်းအနေဖြင့် Kpay အကောင့်မှ ငွေများ လိမ်လည်ခံရ‌သော်လည်း အကောင့်အတွင်း ငွေအများအပြား ထည့်သွင်းထားခြင်း မရှိသည့်အတွက် ၄၀၀၀၀ ကျပ်သာ ပါသွားကြောင်းလည်း ၎င်းက ဆိုသည်။

မြန်မာနိုင်ငံအတွင်း မိုဘိုင်းဖုန်းအသုံးပြုကာ အသုံး ပြု၍ရသည့် ငွေကြေး သုံးစွဲမှုများကို အသုံးပြုသူ သန်းနှင့်ချီ ရှိနေပြီး ယင်းအသုံးပြုသူများထဲမှ နည်းပညာ အားနည်းသူများကို အဓိက ပစ်မှတ်ထား လိမ် လည်နေကြခြင်းဖြစ်ပြီး အရေးယူနိုင်မှု အားနည်းနေကြောင်း ကျွမ်းကျင်သူများက ဆိုသည်။

” မြန်မာနိုင်ငံမှာ Wave Money, Kpay, AYA Pay, CB Pay စဖြင့်ပေါ့ အဲဒါသုံးတဲ့သူတွေ သန်းနဲ့ချီရှိတယ်။ အဓိက အလိမ်ခံနေရတဲ့သူတွေက နည်းပညာ မကျွမ်းကျင်တဲ့သူတွေ၊ ကျေးလက်နေ ပြည်သူတွေနဲ့ သက်ကြီးရွယ်အိုတွေကပေါ့။ ရန်ကုန် မန္တလေးလို မြို့ကြီးတွေက လူတွေလည်း ပါတော့ ပါတယ်။ အလိမ်ခံရတဲ့သူတွေ မှာ တချို့ဆို တော်တော် နစ်နာကြရတယ်။ ဒါပေမဲ့ အရေးယူနိုင်မှုကြတော့ တော် တော် အားနည်းတယ်။ ပါသွားရင် ဆုံးတာက များတယ်”ဟု နည်းပညာကျွမ်းကျင်သူ ကိုကျော်စွာစိုးက သုံးသပ်ပြောဆိုသည်။

အဆိုပါ လိမ်လည်မှုများမှာ ပြီးခဲ့သည့် နှစ်များအတွင်းကတည်းက ဖြစ်ပေါ်နေခြင်း ဖြစ်ပြီး Wave Money သုံးစွဲသူများ အများဆုံး အလိမ်ခံခဲ့ရသော်လည်း ယခု ရက်ပိုင်းအတွင်း Kpay သုံးစွဲသူများကြား လိမ်လည်ခံရမှု ခပ်စိပ်စိပ် ဖြစ်ပွားနေခြင်း ဖြစ်သည်။

ပြီးခဲ့သည့် ရက်ပိုင်းအတွင်းကလည်း ရန်ကုန်မြို့တွင် နေထိုင်သည့် အမျိုးသမီးတစ်ဦးအား FB မက်ဆင်ဂျာမှ တဆင့် KPay မှ တာဝန်ရှိသူ ယောင်ဆောင်ကာ လိမ်လည်ရန် ကြိုးပမ်းမှု တစ်ခု ဖြစ်ပွားခဲ့ကြောင်း သိရသည်။

” မှတ်ပုံတင် နံပါတ်လာတောင်းတယ်။ မ‌ပေးရင် အကောင့်ကို တစ်လ ပိတ်မယ်တဲ့။မယုံလို့မ​ပေးလိုက်ဘူး။ အားမရသေးလို့ ဘဏ်ကို သွားပြီးမေးကြည့်တော့ သမီးတို့ဆီက ပို့တာ မဟုတ်ဘူး။ အန်တီမပေးလိုက်တာ ကံ ကောင်းတယ်လို့ ပြန်ပြောတယ်။ အဲဒီလို အလိမ်ခံနေရတာ အများကြီးလို့ ပြောတယ်” ဟု အဆိုပါ အမျိုးသမီးက ၎င်း၏ လူမှုကွန်ရက်တွင် ရေးသားထားသည်။သူမအား လိမ်လည်​တောင်းဆိုထားသည့် SS ကိုပုံတွင်ကြည့်ရူ့နိုင်ပါသည်။

အဆိုပါ လိမ်လည်မှုများ မကြုံရစေရန် သက်ဆိုင် ရာ ကုမ္ပဏီနှင့် ဘဏ်တာဝန်ရှိသူများအနေဖြင့် အ သိပညာ ဖြန့်ဝေမှုများကို ပိုမိုကျယ်ပျံ့စွာ လုပ် ဆောင်သင့်ပြီး အလွယ်တကူ တိုင်ကြားနိုင်ရန် ဆောင်ရွက်ပေးခြင်း ၊ လျှင်မြန်စွာ တာဝန်ယူဆောင်ရွက်ပေးခြင်းတို့ကို အားစိုက် လုပ်ဆောင်ပေးသင့်ကြောင်းလည်း ကျွမ်းကျင်သူများက အကြံပြု ပြောကြားသည်။

“အခုနောက်ပိုင်း နေ့စဉ်ရက်ဆက် ကြားလာရတာပဲ။ တာဝန်ရှိတဲ့သူတွေ ဘက်က အသိပညာပေးတဲ့ကိစ္စတွေကို ပိုပြီးကျယ်ကျယ်ပျံ့ပျံ့ဖြစ်အောင် နည်းလမ်းရှာသင့်တယ်။ မသိတဲ့နားမလည်တဲ့သူတွေ မခံရအောင်ပေါ့။ ပါသွားပြီဆိုရင်လည်း ဘယ်လို ပြန်ရအောင်လုပ်မလဲ။ လိမ်တဲ့သူရဲ့ လိုကေးရှင်းကို ရှာပြီး အမြန် အကောင့်ပိတ် ပစ်တာမျိုးပေါ့ ၊ ဒါမျိုးတွေကို ဖိဖိစီးစီးပို လုပ်သင့်တယ် ” ဟု ကိုကျော်စွာစိုးက ပြောသည်။

 


LEAVE A REPLY

Please enter your comment!
Please enter your name here