ထိုင်းနိုင်ငံ၌ အလုပ်ခွင်အတွင်းသေဆုံးခဲ့သည့် မြန်မာနိုင်ငံသား ၃ ဦးအသက်အာမခံကြေးများရရှိ

0
858

ထိုင်းနိုင်ငံ၌ အလုပ်ခွင်အတွင်းသေဆုံးခဲ့သည့် မြန်မာနိုင်ငံသား ၃ ဦးအသက်အာမခံကြေးများရရှိ

ထိုင်းနိုင်ငံ(တောင်ပိုင်း)၊ပါတနီမြို့၏ ဆိပ်ကမ်းသို့ပြန်လည်ဝင်ရောက်လာသည့် ငါးဖမ်းစက်လှေပေါ်၌ ငါးများအားထုတ်ယူစဥ်(ဒေသအခေါ် ငါးပါကင်တူး)မြန်မာနိုင်ငံသား ၃ ဦး မတ် ၃၁ ရက်ညပိုင်းက တစ်ချိန်တည်းသေဆုံးခဲ့ကြောင်း သိရသည်။

အဆိုပါ ငါးဖမ်းစက်လှေသည် ပင်လယ်အတွင်း၌ ၁၀ ရက်ကျော်ခန့်ငါးများဖမ်းဆီးပြီး ဆိပ်ကမ်းသို့ပြန်လည်ဝင်ရောက်လာစဥ် ဖြစ်စဥ်ဖြစ်ပွားခဲ့ခြင်းဖြစ်ကြောင်း သိရသည်။

“ထိုင်းဖက်ရေလုပ်သားတွေခေါ်တဲ့အခေါ်ကတော့ ငါးပါကင်တူးတာပေါ့ အဲ့လိုတူးရာကနေ ငါးဂတ်စ်ဖြစ်ပြီး မြန်မာနိုင်ငံသား ၃ ယောက်သေဆုံးခဲ့တာပါ သူတို့ရဲ့ရုပ်အလောင်းတွေကို တနီမြို့က ဝပ် လမ်(မ်)နို့ခ်ဘုန်းကြီးကျောင်းမှာထားပါတယ် ဒီနေ့(ဧပြီ ၃ ရက်)မှာ ရုပ်အလောင်း ၂ ခုကိုမီးသဂြိုလ်ပြီး မနက်ဖြန်(ဧပြီ ၄ ရက်)မှာကန်တဲ့ရုပ်အလောင်းတစ်ခုကိုထပ်ပြီး မီးသဂြိုလ်ပေးသွားမှာပါ”ဟု ထိုင်းနိုင်ငံရောက် မြန်မာအလုပ်သမားများအရေးကူညီဆောင်ရွက်ပေးနေသူတစ်ဦးကပြောသည်။

သေဆုံးသွားသည့် မြန်မာနိုင်ငံသား ၃ ဦးမှာ ရခိုင် ပြည်နယ်၊မြောက်ဦးမြို့နယ်လေညှင်းတောင်ကျေးရွာနေ မောင်စံလှ၊ဗူးရွက်မညှိုးကျေးရွာနေ မောင်ညီညီနှင့်တောဗွေကျေးရွာနေ မောင်ကျော်ဝင်းမောင်တို့ဖြစ်ကြောင်း သိရသည်။

ထိုသို့ လုပ်ငန်းခွင်အတွင်းသေဆုံးခဲ့ကြသဖြင့် ထိုင်းနိုင်ငံ၏ လူမှုဖူလုံရေးဆိုင်ရာ(ပါကန်စမ်ခွမ်) ငွေစုရေးဌာနမှ အသက်အာမခံကြေးငွေအဖြစ် တစ်ဦးလျင်ထိုင်းဘတ်ငွေ ၁၈၀၀၀၀၀ ခန့်ရရှိမည်ဖြစ်ကြောင်း သိရသည်။

“အဲဒီ အသက်အာမခံရတဲ့‌ငွေတွေကို ကျန်ရစ်တဲ့မိသားစုဝင်တွေ လာရောက်ထုတ်ယူခွင့်ရှိပါတယ် ဒါ့ကြောင့် မိသားစုဝင်တွေသိနိုင်ဖို့အတွက် လက်ဆင့်ကမ်းအသိပေးစေလိုပါတယ် ထိုင်းရောက်
မြန်မာလှေလုပ်သားတွေကိုလည်း လုပ်ငန်းခွင်အတွင်းမှာ အထူးသတိထားပြီးလုပ်ကိုင်ကြဖို့ကို တိုက်တွန်းလိုပါတယ်”ဟု ထိုင်းနိုင်ငံရောက် မြန်မာအလုပ်သမားများအရေးကူညီဆောင်ရွက်ပေးနေသူတစ်ဦးကပြောသည်။

မြန်မာနိုင်ငံသား ၃ ဦးသေဆုံးရခြင်းမှာ ဖမ်းဆီးရမိသည့်ငါးများအား သိမ်းဆည်းရာတွင် ရေခဲထည့်နည်းခြင်း၊ဆားကြမ်းထည့်နည်းခြင်းနှင့်ငါးပုတ်ရေမစုတ်ထုတ် မဆေးကြောခြင်းတို့ကြောင့် ရေများပုတ်ကာ ဂတ်စ်ဖြစ်၍သေဆုံးရခြင်းဖြစ်ကြောင်း သိရသည်။


LEAVE A REPLY

Please enter your comment!
Please enter your name here