ဆိုးလ်တွင် အပူလှိုင်းကြောင့် လူ ၁၆ ဦး သေဆုံး၊ ထောက်ပံ့မှုများ မြှင့်တင်ရန် အာဏာပိုင်များကို လီ တိုက်တွန်း

နိုင်ငံအတွင်း အပူလှိုင်းဒ-ဏ်ခံရသူများကို ထောက်ပံ့မှုများတိုးမြှင့်ပေးရန် သြဂုတ်လ ၄ ရက်နေ့တွင် အာဏာပိုင်များကို တောင်ကိုရီးယားသမ္မတ လီဂျေးမြောင်က တိုက်တွန်းခဲ့ပြီး အပူလှိုင်းကြောင့် သေဆုံးသူ ၁၆ ဦးအထိ များလာကြောင်းနှင့် ပြင်းထန်လွန်ကဲသော ရာသီဥတုအခြေအနေသည် မကြာခဏပိုမို ဖြစ်လာနေကြောင်း သတိပေးခဲ့သည်။
      
ပြည်သူများ၏ နေ့စဉ်လှုပ်ရှားဆောင်ရွက်မှုများကို အကာအကွယ်ပေးရန်အတွက် လိုအပ်သော အစီအမံများ ကို လုပ်ဆောင်ရန်နှင့် အဲရ်ကွန်းဝယ်လိုအား မြင့်တက်လာသည်နှင့်အမျှ ဓာတ်အားစနစ်များကို စစ်ဆေးရန် အစိုးရအဖွဲ့အစည်းအဝေးတွင် ပြောကြားရာ၌ လီက တောင်းဆိုခဲ့သည်။
       
“လွန်ကဲတဲ့ ရာသီဥတုအခြေအနေက ပုံမှန်လိုဖြစ်လာနေတာကြောင့် နိုင်ငံတော် အကျပ်အတည်းစနစ်ကို အခြေခံကျကျ ပြုပြင်ပြောင်းလဲဖို့ရာ လုပ်ငန်းစဉ်တွေချမှတ်ဖို့ လိုအပ်ပါတယ်” ဟု ၎င်းက ပြောကြားခဲ့သည်။
      
အရှေ့တောင်ပိုင်း ကုန်းတွင်းမြို့ဖြစ်သော ယန်ဆန်တွင် သြဂုတ်လ ၂ ရက်နေ့က အပူချိန် ၄၂ ဒဿမ ၅ ဒီဂရီစင်တီဂရိတ်အထိ ဖြစ်ပေါ်ခဲ့ပြီး ယင်းသည် နှစ်ပေါင်း ၁၂၂ နှစ်အတွင်း အမြင့်ဆုံးအပူချိန်ဖြစ်ကြောင်း ပြောကြားခဲ့သည်။
        
ကိုရီးယား မိုးလေဝသစီမံခန့်ခွဲရေးဌာနက သြဂုတ်လ ၃ ရက်နေ့တွင် မြို့တော်ဆိုးလ်နှင့် အိမ်နီးချင်း ဂျောင်ဂီမြို့ ဒေသများတွင် ၎င်း၏ ပထမဆုံး အပူလှိုင်းသတိပေးချက်ကို ထုတ်ပြန်ခဲ့ပြီး သြဂုတ်လ ၄ ရက်တွင်မူ သတိပေးချက်ကို မြို့တော်တခွင်လုံးအတွက် တိုးချဲ့ထုတ်ပြန်ခဲ့သည်။

Ref: သယ်စထရိတ်တိုင်းမ်စ်