ပြန်ပေးဆွဲခံရဟန်ဆောင်၍ မိဘထံမှ သိန်း(၁၀၀)ငွေလိမ်တောင်းခဲ့သည့် သားဖြစ်သူနှင့် ရည်းစားဖြစ်သူ ဖမ်းဆီးခံရ

ရန်ကုန်၊ ဇူလိုင် ၁

ပြန်ပေးဆွဲခံရဟန်ဆောင်ကာ မိဘများထံမှ ငွေကျပ်သိန်း(၁၀၀) လိမ်လည်တောင်းခံပြီး ငွေမပေးပါက ပြည်သူ့စစ်မှုထမ်းစာရင်းတွင် ထည့်သွင်းခံရမည်ဟု ခြိမ်းခြောက်ပြောဆိုခဲ့သည့် သားဖြစ်သူနှင့် ၎င်း၏ရည်းစားဖြစ်သူကို သက်ဆိုင်ရာတာဝန်ရှိသူများက ဇွန် ၃၀ ရက်တွင် ဖမ်းဆီးရမိခဲ့ကြောင်း သိရသည်။

စုံစမ်းသိရှိရသည့်အချက်များအရ ဇွန် ၂၅ ရက်တွင် ရန်ကုန်တိုင်းဒေသကြီး၊ သင်္ကန်းကျွန်းမြို့နယ်နေ မောင်ငြိမ်းချမ်းဦးသည် အလုပ်သွားစဉ် မိသားစုနှင့် အဆက်အသွယ်ပြတ်တောက်ခဲ့သဖြင့် မိသားစုဝင်များက လူပျောက်ကြော်ငြာများကို လူမှုကွန်ရက်မှတစ်ဆင့် ဖြန့်ဝေခဲ့ရာ သက်ဆိုင်ရာတာဝန်ရှိသူများက စုံစမ်းစစ်ဆေးမှုများ ဆောင်ရွက်ခဲ့ကြောင်း သိရသည်။

ယင်းသို့ စစ်ဆေးနေစဉ် ဇွန် ၂၇ ရက်တွင် အမျိုးသားတစ်ဦးက ငြိမ်းချမ်းဦး၏ မိခင်ထံ ဖုန်းဆက်၍ ငြိမ်းချမ်းဦးကို ပြန်ပေးဆွဲထားကြောင်း၊ လူပျောက်ကြော်ငြာများကို ပြန်ဖျက်ပေးရမည်ဖြစ်ပြီး ပြန်လည်လွှတ်ပေးစေလိုပါက ငွေကျပ်သိန်း(၁၀၀) ပေးရမည်ဟု တောင်းဆိုခဲ့ကြောင်း သိရသည်။

ထို့အပြင် ငြိမ်းချမ်းဦး၏ ရည်းစားဖြစ်သူ ဒေါက်တာခိုင်ဆုရည်ကလည်း ငြိမ်းချမ်းဦး၏ အဒေါ်ထံ ဆက်သွယ်ခဲ့သဖြင့် ဆက်သွယ်အသုံးပြုခဲ့သည့် ဖုန်းနံပါတ်များကို စစ်ဆေးရာ ဒေါက်တာခိုင်ဆုရည်အမည်ဖြင့် မှတ်ပုံတင်ထားကြောင်း တွေ့ရှိခဲ့ပြီး ဆက်လက်စုံစမ်းဖော်ထုတ်မှုများ ပြုလုပ်ခဲ့ကြောင်း သိရသည်။

ထို့နောက် ဇွန် ၃၀ ရက် နံနက်ပိုင်းတွင် ငြိမ်းချမ်းဦးက အသံဖျက်၍ ထပ်မံဆက်သွယ်ကာ ငွေမလွှဲပေးပါက ပြည်သူ့စစ်မှုထမ်းစာရင်းတွင် ပါဝင်သွားမည်ဟု ခြိမ်းခြောက်ပြောဆိုပြီး ငွေကျပ်သိန်း(၁၀၀)ကို ၎င်း၏ KBZ Pay အကောင့်သို့ လွှဲပေးရန် တောင်းဆိုခဲ့သဖြင့် တာဝန်ရှိသူများက ဖမ်းဆီးနိုင်ရေး ဆောင်ရွက်ခဲ့ကြောင်း သိရသည်။

ယင်းနောက် ဇွန် ၃၀ ရက် မွန်းတည့်ပိုင်းတွင် တာမွေမြို့နယ်ရှိ ဟိုတယ်တစ်ခု၌ ငြိမ်းချမ်းဦးနှင့် ဒေါက်တာခိုင်ဆုရည်တို့ကို ဖမ်းဆီးရမိခဲ့ပြီး စစ်ဆေးဖော်ထုတ်ချက်အရ ရည်းစားဖြစ်သူနှင့် အချိန်ကြာမြင့်စွာ တွေ့ဆုံနေထိုင်လိုသည့်အတွက် မိသားစုနှင့် အဆက်အသွယ်ဖြတ်ကာ ပြန်ပေးဆွဲခံရဟန်ဆောင်၍ ငွေလိမ်လည်တောင်းခံခဲ့ခြင်းဖြစ်ကြောင်း ပေါ်ပေါက်ခဲ့သဖြင့် ၎င်းတို့အား ဥပဒေနှင့်အညီ ထိရောက်စွာ အရေးယူနိုင်ရေး ဆက်လက်ဆောင်ရွက်လျက်ရှိကြောင်း သိရသည်။