နိုင်ငံတော်သမ္မတ ဦးမင်းအောင်လှိုင်က တရုတ်နိုင်ငံ၊ ဟန်ကျိုးမြို့ရှိ လျှပ်စစ်ကား(EV)များထုတ်လုပ်လျက်ရှိသော Leapmotor ကုမ္ပဏီ၏ EV ကားထုတ်လုပ်နေမှုများကို ဇွန် ၁၉ ရက်နံနက်ပိုင်းကကြည့်ရှုလေ့လာခဲ့ရာ မြန်မာနိုင်ငံတွင်လည်း နည်းပညာမြင့်မားသော EV ကားများထုတ်လုပ် တင်သွင်းရန်အခွင့်အလမ်းများရရှိလာနိုင်တော့မည့်အခြေအနေဖြစ်လာနိုင်သည်ဟုယူဆရသည်။
EV ၏အောင်မြင်မှုသည် လျပ်စစ်ကဏ္ဍနှင့်လည်း များစွာ ဆက်စပ်နေသည်။
လက်ရှိအချိန်တွင် လျှပ်စစ်ကားများ ခေတ်စားလာသော်လည်း အိမ်သုံးလျှပ်စစ်မီးကို အလှည့်ကျစနစ်ဖြင့် ပေးနေရသည့် မြန်မာနိုင်ငံတွင် လျှပ်စစ်ကားကဏ္ဍ အောင်မြင်ရန်အတွက် လျှပ်စစ်စွမ်းအင်မျိုးစုံ လိုအပ်မည်ဖြစ်သည်။ အထူးသဖြင့် လတ်တလောတွင် နိုင်ငံတော်မဟာဓာတ်အားလိုင်းကို ဝန်ထုပ်ဝန်ပိုးမဖြစ်စေဘဲ လျှပ်စစ်ဓာတ်အား ရရှိနိုင်မည့် နည်းလမ်းများကိုပါ ထည့်သွင်းစဉ်းစားရမည် ဖြစ်သည်။
နေရောင်ခြည်စွမ်းအင်သုံး အားသွင်းရုံများ
၎င်းနည်းလမ်းသည် အထိရောက်ဆုံးဖြစ်ပြီး လျှပ်စစ်ကားအားသွင်းရုံများကို နိုင်ငံတော်မဟာဓာတ်အားလိုင်းနှင့် မချိတ်ဆက်ဘဲ ၎င်းတို့၏ အမိုးပေါ်တွင် နေရောင်ခြည်စွမ်းအင်သုံး ဆိုလာပြားများနှင့် ဧရာမဘက်ထရီသိုလှောင်မှုစနစ်များကို တွဲဖက်တပ်ဆင်ထားခြင်း ဖြစ်သည်။ နေ့ဘက်တွင် နေရောင်ခြည်မှတစ်ဆင့် ဘက်ထရီထဲသို့ လျှပ်စစ်စွမ်းအင် သိုလှောင်ပြီး ကားများကို ပြန်လည်အားသွင်းပေးခြင်းကြောင့် နိုင်ငံတော်မီးကို လုံးဝဝန်ထုပ်ဝန်ပိုး မဖြစ်စေတော့ပေ။
မြန်မာနိုင်ငံတွင် လက်ရှိအသုံးပြုနေပြီး ရရှိနိုင်သည့် စွမ်းအင်အရင်းအမြစ်များ၏ ကောင်းကွက်များနှင့် အားနည်းချက်များကို လေ့လာ၍ မိမိတို့အတွက် အဆင်ပြေမည့် စွမ်းအင်များကို ထုတ်လုပ်နိုင်မည်ဖြစ်သည်။
၁။ သဘာဝဓာတ်ငွေ့
ကောင်းကွက်
မြန်မာနိုင်ငံတွင် ကမ်းလွန်ဓာတ်ငွေ့စီမံကိန်းကြီးများ (ဥပမာ – ရတနာ၊ ဇောတိက၊ ရွှေ) ရှိနေသဖြင့် ပြည်တွင်းလျှပ်စစ်ထုတ်လုပ်ရေးနှင့် စက်မှုဇုန်များအတွက် အဓိကအားထားရသည့် ရေရှည်တည်ငြိမ်သော စွမ်းအင်ဖြစ်သည်။
အားနည်းချက်
ကုန်ခမ်းလွယ်သည့် ရုပ်ကြွင်းလောင်စာဖြစ်ပြီး နှစ်ရှည်အသုံးပြုလာ၍ အချို့တွင်းဟောင်းများတွင် ဓာတ်ငွေ့ထွက်နှုန်း ကျဆင်းလာနေသည်။ ထို့ပြင် ကမ္ဘာ့ဈေးကွက်အပြောင်းအလဲပေါ်မူတည်၍ စီးပွားရေးအရ ရိုက်ခတ်မှုရှိနိုင်သည်။
၂။ ဇီဝလောင်စာ (စပါးခွံ၊ ကြံဖတ်၊ ဇီဝဓာတ်ငွေ့)
ကောင်းကွက်
စိုက်ပျိုးရေးနိုင်ငံဖြစ်သည့်အတွက် စပါးခွံ၊ ကြံဖတ်နှင့် စိုက်ပျိုးရေးဘေးထွက်ပစ္စည်းများ အလွယ်တကူရရှိနိုင်ပြီး ကျေးလက်ဒေသ အသေးစားစက်မှုလုပ်ငန်းများနှင့် လျှပ်စစ်ဓာတ်အားပေးစက်ရုံငယ်များအတွက် ကုန်ကျစရိတ်အသက်သာဆုံး ပြန်လည်ပြည့်ဖြိုးမြဲစွမ်းအင်ဖြစ်သည်။
အားနည်းချက်
စနစ်တကျ မီးမရှို့ပါက လေထုထဲသို့ မီးခိုးငွေ့နှင့် အမှုန်အမွှားများ ထွက်ရှိစေနိုင်သည်။ ထို့ပြင် ကုန်ကြမ်းရရှိမှုမှာ ရာသီအလိုက် စိုက်ပျိုးထုတ်လုပ်မှုအပေါ်တွင် တည်မှီနေသည်။
၃။ ရေအားလျှပ်စစ်
ကောင်းကွက်
ဧရာဝတီ၊ ချင်းတွင်း၊ သံလွင်မြစ်ဝှမ်းများနှင့် တောင်ကုန်းတောင်တန်း ထူထပ်သဖြင့် မြန်မာနိုင်ငံတွင် အလားအလာအကောင်းဆုံးနှင့် ကုန်ကျစရိတ် အသက်သာဆုံး စွမ်းအင်ဖြစ်သည်။ ဖန်လုံအိမ်ဓာတ်ငွေ့ လုံးဝမထွက်ရှိသည့် သန့်စင်စွမ်းအင် ဖြစ်သည်။
အားနည်းချက်
ရေဝေရေလဲဂေဟစနစ် ထိခိုက်ခြင်းတို့ ရှိနိုင်သည်။ ထို့ပြင် နွေရာသီတွင် အချို့မြစ်များ၌ ရေမျက်နှာပြင်ကျဆင်း၍ လျှပ်စစ်ထုတ်လုပ်နိုင်စွမ်း သိသိသာသာ ကျဆင်းတတ်သည်။
၄။ နေရောင်ခြည်စွမ်းအင်
ကောင်းကွက်
မြန်မာနိုင်ငံအလယ်ပိုင်း မိုးခေါင်ရေရှားဒေသများတွင် တစ်နှစ်ပတ်လုံး နေရောင်ခြည် အလွန်ကောင်းမွန်သဖြင့် အလားအလာကြီးမားသည်။ မဟာဓာတ်အားလိုင်းပြင်ပရှိ ကျေးလက်ဒေသများနှင့် အိမ်သုံး၊ လျှပ်စစ်ကားအားသွင်းရုံများအတွက် လျင်မြန်စွာ တပ်ဆင်အသုံးပြုနိုင်သော စိမ်းလန်းစွမ်းအင် ဖြစ်သည်။
အားနည်းချက်
ညဘက်နှင့် မိုးအုံ့သည့်ရက်များတွင် လျှပ်စစ်မထုတ်နိုင်သဖြင့် စွမ်းအင်သိုလှောင်ရန် ဧရာမဘက်ထရီစနစ်များ လိုအပ်ပြီး မတည်ရင်းနှီးမြှုပ်နှံမှု ကုန်ကျစရိတ် မြင့်မားမည်ဖြစ်သည်။ ထို့ပြင် သက်တမ်းကုန်သွားသည့် ဆိုလာပြားများနှင့် ဘက်ထရီအဟောင်းများအား စနစ်တကျ စွန့်ပစ်ရန် နည်းပညာများသုံးစွဲရမည်။
အနှစ်ချုပ်
မြန်မာနိုင်ငံ၏ စွမ်းအင်ကဏ္ဍရေရှည်အောင်မြင်ရန်အတွက် စွမ်းအင်တစ်ခုတည်းကိုပဲ အားကိုးခြင်းမျိုးမဟုတ်ဘဲ ရာသီဥတုအလိုက် တည်ငြိမ်မှုရှိစေရန် ရေအား၊ နေရောင်ခြည်၊ လေအားနှင့် သဘာဝဓာတ်ငွေ့တို့ကို မျှတစွာ ပေါင်းစပ်အသုံးပြုသည့် စနစ်ကို ဦးတည်လုပ်ဆောင်သွားခြင်းဖြင့် တိုးတက်လာမည့် လျှပ်စစ်ကား (EV) စနစ်ကိုပါ အောင်မြင်အောင် ထိရောက်စွာ ပံ့ပိုးပေးနိုင်မည် ဖြစ်သည်။
လျှပ်စစ် အပြင် ယခုလို မိုးတွင်းကာလ တွင် ရေတင်တတ်သော လမ်းများ ၏ ရေစီးရေလာ ပိုကောင်းမွန်စေခြင်းကလည်း EV ကားများ မိုးကြီးချိန် မထွက်ရဲခြင်းကို ပြေပျောက်ကာ EV အောင်မြင်မှုကိုဖြစ်စေမည်။