မက္ကဆီကိုအသင်း ကမ္ဘာ့ဖလားပြိုင်ပွဲ၏ ရှုံးထွက်အဆင့်သို့ တက်ရောက်နိုင်ခဲ့ခြင်းအတွက် ပရိသတ်ပေါင်း ၇၀၀,၀၀၀ ကျော်က မြို့လယ်ခေါင်တွင် စုဝေးအောင်ပွဲခံခဲ့ပြီးနောက် အများပြည်သူနေရာများ၌ အရက်ရောင်းချခြင်းနှင့် လမ်းပေါ်သောက်စားခြင်းများကို ထိန်းချုပ်ရန် အစီအမံသစ်များ ချမှတ်ရန် မက္ကဆီကိုစီးတီးအစိုးရက စဉ်းစားနေကြောင်း သိရသည်။
မက္ကဆီကိုအသင်းက တောင်ကိုရီးယားအသင်းကို အနိုင်ရရှိပြီးနောက် ပရိသတ်များသည် မြို့တော်လမ်းမများပေါ်တွင် စုဝေးကာ အလံများဝှေ့ယမ်းခြင်း၊ နိုင်ငံတော်သီချင်းများ သီဆိုခြင်း၊ ဗူဗူဇလာများမှုတ်ခြင်းနှင့် မိုးရေထဲတွင် ကခုန်ခြင်းတို့ဖြင့် အောင်ပွဲခံခဲ့ကြသည်။
အောင်ပွဲခံပွဲအပြီး နောက်တစ်နေ့နံနက်တွင် မြို့တော်၏ အဓိကအထင်ကရနေရာတစ်ခုဖြစ်သည့် Reforma ရိပ်သာလမ်းမကြီးတစ်လျှောက် အမှိုက်သရိုက်များ ပြည့်နှက်နေခဲ့ပြီး မက္ကဆီကိုရိုးရာအထိမ်းအမှတ်ပန်းဖြစ်သည့် အဝါရောင် Cempasúchil ပန်းများစွာ ပျက်စီးခဲ့ကြောင်း သိရသည်။ အာဏာပိုင်များသည် သမိုင်းဝင်မြို့လယ်ဧရိယာတစ်ဝိုက်မှ အမှိုက်တန်ချိန် ၄၀ ခန့်ကို ရှင်းလင်းသိမ်းဆည်းခဲ့ရသည်။
မက္ကဆီကိုစီးတီးအစိုးရအဖွဲ့ အတွင်းရေးမှူး ဆက်ဆာ ခရာဗီယက်တိုက ကမ္ဘာ့ဖလားပြိုင်ပွဲကာလအတွင်း အများပြည်သူလုံခြုံရေးနှင့် စည်းကမ်းထိန်းသိမ်းရေးအတွက် ကြိုတင်ကာကွယ်ရေးအစီအမံများ လိုအပ်ကြောင်း ပြောကြားခဲ့သည်။
၎င်းက လမ်းဘေးတရားမဝင် အရက်ရောင်းချမှုများကို ထိန်းချုပ်သွားမည်ဖြစ်ပြီး စားသောက်ဆိုင်များနှင့် ဘားများအား ဆိုင်ပြင်ပသို့ အရက်ထုတ်ယူရောင်းချခြင်း မပြုရန် တောင်းဆိုသွားမည်ဟု ဆိုသည်။ ထို့ပြင် ကုန်စုံဆိုင်များကိုလည်း ပွဲမစမီ နာရီပိုင်းအလိုတွင် အရက်ရောင်းချမှု ယာယီရပ်နားရန် ညှိနှိုင်းသွားမည်ဖြစ်ကြောင်း ပြောကြားခဲ့သည်။
ပရိသတ်များ စုဝေးမှုကို လျှော့ချနိုင်ရန် မြို့လယ်ခေါင်ရှိ ရုပ်သံဖန်သားပြင်ကြီး ၁၂ ခုအပြင် နောက်ထပ် ၇ ခု ထပ်မံတပ်ဆင်သွားမည်ဖြစ်ပြီး လမ်းဘေးဈေးသည်များ၏ ဘီယာရောင်းချမှုကို စောင့်ကြည့်ထိန်းချုပ်ရန် ဝန်ထမ်းအင်အားများကိုလည်း တိုးချဲ့ချထားသွားမည်ဖြစ်ကြောင်း သိရသည်။
“ပရိသတ်တွေအနေနဲ့ အရက်အလွန်အကျွံ သောက်စားခြင်းမရှိဘဲ ပျော်ရွှင်စွာ အားပေးနိုင်ဖို့ ကျွန်တော်တို့ ဆက်လက်တိုက်တွန်းသွားမှာပါ” ဟု ဆက်ဆာ ခရာဗီယက်တိုက ပြောကြားခဲ့သည်။
Ref: FMT