သီရိလင်္ကာတွင် သွေးလွန်တုပ်ကွေးဖြစ်ပွားမှု မြင့်တက်၊ ယခုနှစ်အတွင်း လူနာ ၄၄,၀၀၀ ကျော်နှင့် သေဆုံးသူ ၂၈ ဦးရှိ

သီရိလင်္ကာနိုင်ငံတွင် ခြင်မှတစ်ဆင့် ကူးစက်တတ်သော သွေးလွန်တုပ်ကွေးရောဂါ ဖြစ်ပွားမှု သိသိသာသာမြင့်တက်လျက်ရှိပြီး ၂၀၂၆ ခုနှစ် ဇန်နဝါရီလမှစတင်၍ ရောဂါကူးစက်ခံရသူ ၄၄,၀၀၀ ကျော်နှင့် သေဆုံးသူ ၂၈ ဦးအထိ ရှိလာကြောင်း တာဝန်ရှိသူများက ထုတ်ပြန်ခဲ့သည်။

အဆိုပါ ရောဂါဖြစ်ပွားမှု မြင့်တက်လာခြင်းကြောင့် အစိုးရဆေးရုံများတွင် လူနာများပြားလာကာ ကျန်းမာရေးစောင့်ရှောက်မှုစနစ်အပေါ် ဖိအားများ မြင့်တက်လျက်ရှိကြောင်း သိရသည်။

သီရိလင်္ကာနိုင်ငံတွင် မိုးရာသီကာလများ၌ သွေးလွန်တုပ်ကွေးရောဂါ အဖြစ်များလေ့ရှိသော်လည်း ၂၀၂၅ ခုနှစ် နိုဝင်ဘာလအတွင်း ကျွန်းနိုင်ငံကို ဝင်ရောက်တိုက်ခတ်ခဲ့သည့် ဆိုက်ကလုန်းမုန်တိုင်း “ဒစ်ဝါ” ကြောင့် ဖြစ်ပေါ်ခဲ့သော ရေဝပ်ဒေသများနှင့် ပတ်ဝန်းကျင်အပျက်အစီးများက ယခုနှစ် ရောဂါဖြစ်ပွားမှု ပိုမိုမြင့်တက်စေခဲ့ကြောင်း အာဏာပိုင်များက သုံးသပ်ထားသည်။

နိုင်ငံတော်သွေးလွန်တုပ်ကွေးထိန်းချုပ်ရေးဌာန (NDCU) ၏ အချက်အလက်များအရ ဧပြီလအတွင်း ရောဂါဖြစ်ပွားသူ ၅,၆၅၁ ဦးရှိခဲ့ရာမှ ဇွန်လ ပထမနှစ်ပတ်အတွင်း ၁၀,၆၃၈ ဦးအထိ မြင့်တက်လာခဲ့ပြီး နှစ်ဆနီးပါး တိုးလာကြောင်း သိရသည်။

“ဆိုက်ကလုန်းမုန်တိုင်းအပြီးမှာ ရောဂါဖြစ်ပွားမှု မြင့်တက်လာတာကို သတိပြုမိခဲ့ပါတယ်။ ပတ်ဝန်းကျင်မှာ အပျက်အစီးတွေနဲ့ ရေဝပ်နေရာတွေ များပြားလာတာကြောင့် ခြင်ပေါက်ဖွားမှု ပိုမိုများပြားလာခဲ့ပါတယ်” ဟု NDCU ပြောရေးဆိုခွင့်ရှိသူ ဒေါက်တာ ပရာရှီလာ ဆာမာရာဝီရာက Reuters သတင်းဌာနသို့ ပြောကြားခဲ့သည်။

၎င်းက ဆက်လက်၍ ၂၀၂၅ ခုနှစ် တစ်နှစ်လုံးတွင် သွေးလွန်တုပ်ကွေး လူနာ ၅၁,၀၀၀ ခန့်သာ မှတ်တမ်းတင်နိုင်ခဲ့သော်လည်း ယခုနှစ်တွင် နှစ်ဝက်မပြည့်မီ လူနာ ၄၄,၀၀၀ ကျော်ရှိလာခြင်းမှာ စိုးရိမ်ဖွယ်အခြေအနေဖြစ်ကြောင်း ပြောကြားခဲ့သည်။

လက်ရှိ ရောဂါကူးစက်မှုနှုန်းသည် လာမည့် နှစ်ပတ်ခန့်အတွင်း ဆက်လက်မြင့်တက်နိုင်သေးကြောင်းနှင့် ထို့နောက်မှသာ တဖြည်းဖြည်း လျော့ကျလာဖွယ်ရှိကြောင်း ကျန်းမာရေးတာဝန်ရှိသူများက ခန့်မှန်းထားသည်။

Ref: International / Reuters