ပဲခူးတိုင်းဒေသကြီးအတွင်း မိုးတွင်းကာလတွင် ရေကြီးရေလျှံမှုများ ဖြစ်ပေါ်လာနိုင်သည့် အခြေအနေများအတွက် ကယ်ဆယ်ရေးနှင့် ထောက်ပံ့ရေးလုပ်ငန်းများကို စနစ်တကျ ကြိုတင်ပြင်ဆင်ထားကြောင်း ပဲခူးတိုင်းဒေသကြီး ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနက ပြောသည်။
မိုးသည်းထန်စွာ ရွာသွန်းလာပါက ရေကြီးရေလျှံမှုများအတွက် တိုင်းဒေသကြီးတစ်ဝန်း ကယ်ဆယ်ရေးပစ္စည်းများ ကြိုတင်စီစဉ်ထားကြောင်း သိရသည်။
ပဲခူးတိုင်းဒေသကြီး ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန ညွှန်ကြားရေးမှူး ဦးသောင်းရွှေက “မိုးများသည်းထန်စွာ ရွာသွန်းလာပါက ရေကြီးရေလျှံမှုများ ဖြစ်ပေါ်နိုင်သည့် ဒေသများတွင် ကယ်ဆယ်ရေးနှင့် ထောက်ပံ့ရေးလုပ်ငန်းများ အဆင်သင့်ဖြစ်စေရန် ကြိုတင်ပြင်ဆင်ထားရှိပြီး ဖြစ်သည်” ဟု ပြောကြားသည်။
ဇွန်လ ၆ ရက်နေ့တွင် ပဲခူးတိုင်းဒေသကြီးအတွင်း မိုးရွာသွန်းခဲ့ပြီးနောက် ပဲခူးမြစ်ရေသည် မူလမြစ်ရေအဆင့်ထက် ၃၀၀ စင်တီမီတာမှ ၆၀၀ စင်တီမီတာအထိ မြင့်တက်ခဲ့ကြောင်း သိရသည်။ ပဲခူးမြို့ရှိ ပဲခူးမြစ်၏ စိုးရိမ်ရေအမှတ်ကို ၈၈၀ စင်တီမီတာ သတ်မှတ်ထားကြောင်းလည်း ထုတ်ပြန်ထားသည်။
သို့သော် ဇွန်လ ၈ ရက်မှစတင်ကာ ပဲခူးမြစ်ရေသည် တဖြည်းဖြည်း ကျဆင်းလာပြီး လက်ရှိအချိန်တွင် မြစ်ရေကြီးမှု မရှိသေးကြောင်း ဌာနဆိုင်ရာက ဆိုသည်။
တိုင်းဒေသကြီးအတွင်း မိုးများသည်းထန်စွာ ရွာသွန်းလာပါက ရေကြီးရေလျှံမှုများကို တုံ့ပြန်နိုင်ရန် စက်တပ်လှေ ၇၉ စီး၊ မီးစက် ၂၀ လုံးနှင့် ရေစုပ်စက် ၁၈ လုံးကို ကြိုတင်ပြင်ဆင်ထားကြောင်း သိရသည်။
ပဲခူးမြို့သည် မိုးရာသီကာလတွင် ရေကြီးရေလျှံမှုများ မကြာခဏ ကြုံတွေ့ရသည့် ဒေသတစ်ခုဖြစ်ပြီး ၂၀၂၃ ခုနှစ်တွင် ရေနှစ်ကြိမ်ကြီးခဲ့ရာ အိမ်ထောင်စုပေါင်း ၃၀,၀၀၀ ခန့် ထိခိုက်ခဲ့ကာ ကယ်ဆယ်ရေးစခန်း ၄၀ နီးပါး ဖွင့်လှစ်ခဲ့ရကြောင်း ဒေသဆိုင်ရာ အချက်အလက်များအရ သိရသည်။
ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနက မိုးလေဝသသတိပေးချက်များကို စဉ်ဆက်မပြတ် စောင့်ကြည့်ကြရန်နှင့် ရေကြီးရေလျှံနိုင်သည့် မြေနိမ့်ပိုင်းဒေသများတွင် နေထိုင်သူများအနေဖြင့် လိုအပ်သည့် ကြိုတင်ပြင်ဆင်မှုများ ဆောင်ရွက်ထားကြရန် တိုက်တွန်းထားသည်။
ပုံစာ-၂၀၂၃ ခုနှစ်က ရေကြီးမှုဖြစ်ပွားခဲ့သည့် ပဲခူးမြို့မြင်ကွင်းများ