နေပြည်တော်၊ ပျဉ်းမနားမြို့နယ်၊ ကျီးအင်းကျေးရွာရှိ Myanmar Agri Foods Co., Ltd ၏ အေးခဲဟင်းသီးဟင်းရွက် ထုတ်လုပ်တင်ပို့နေမှုလုပ်ငန်းများကို နိုင်ငံတော်သမ္မတ ဦးမင်းအောင်လှိုင်က မေ ၂၃ ရက်တွင် သွားရောက်ကြည့်ရှုစစ်ဆေးခဲ့ကြောင်း သိရသည်။
အဆိုပါကုမ္ပဏီသည် ကန်ထရိုက်လယ်ယာစိုက်ခင်းများမှ ရရှိသည့် ကုန်ကြမ်းများကို ၉၉ ရာခိုင်နှုန်းအထိ အသုံးပြု၍ ရုံးပတီသီး၊ ဟင်းနုနွယ်၊ ဘိုစားပဲ၊ သရက်သီးနှင့် ပဲမျိုးစုံအပါအဝင် ဟင်းသီးဟင်းရွက်မျိုးစုံကို အေးခဲထုတ်ကုန်အဖြစ် ထုတ်လုပ်ကာ ပြည်ပဈေးကွက်သို့ တင်ပို့ရောင်းချလျက်ရှိကြောင်း ကုမ္ပဏီတာဝန်ရှိသူများက ရှင်းလင်းတင်ပြခဲ့သည်။
ထို့ပြင် အခြေခံလူတန်းစားများ၏ တစ်ဦးချင်းဝင်ငွေတိုးတက်လာစေရေး ဆောင်ရွက်ပေးနိုင်မှု၊ ကုန်ကြမ်းသီးနှံများကို ဒေသတွင်းမှ အဓိကရယူအသုံးပြုနေမှု၊ ထုတ်ကုန်အသစ်များ ဖန်တီးထုတ်လုပ်နိုင်ရေး လုပ်ငန်းစဉ်များနှင့် လက်ရှိဈေးကွက်အခြေအနေများအပြင် အာရှနှင့် ဥရောပဈေးကွက်များသို့ တိုးချဲ့တင်ပို့နိုင်ရေး အစီအစဉ်များကို ၎င်း သွင်းကုန်အစာထိုးစားသောက်ကုန်များကိုလဲ စတင်ထုတ်လုပ်လျက်ရှိမူအား တင်ပြခဲ့ကြောင်းသိရှိရပါသည်။
ယင်းနောက် နိုင်ငံတော်သမ္မတက နိုင်ငံ့စီးပွားရေးအတွက် အကျိုးပြုသည့်လုပ်ငန်းဖြစ်သဖြင့် လက်ရှိရရှိထားသည့် ဈေးကွက်များကို အခြေခံကာ ထုတ်လုပ်မှုနှင့် တင်ပို့မှုများ တိုးချဲ့ဆောင်ရွက်သင့်ကြောင်း ပြောကြားခဲ့သည်။
ထို့အပြင် Green House စနစ်ဖြင့် ဟင်းသီးဟင်းရွက်များကို ရာသီမရွေး စိုက်ပျိုးထုတ်လုပ်နိုင်ရေး သုတေသနပြုဆောင်ရွက်ပါက ကုန်ကြမ်းသီးနှံများ ပိုမိုရရှိနိုင်မည်ဖြစ်ပြီး ထုတ်ကုန်များ ပိုမိုတိုးမြှင့်ထုတ်လုပ်ကာ ပြည်တွင်း၊ ပြည်ပဈေးကွက်များသို့ ပိုမိုတင်ပို့ရောင်းချနိုင်သဖြင့် နိုင်ငံခြားဝင်ငွေ ပိုမိုရရှိလာနိုင်မည်ဖြစ်ကြောင်း ပြောကြားခဲ့သည်။
ထို့ပြင် ကုန်ထုတ်လုပ်မှုလုပ်ငန်းများတွင် ကုန်ကြမ်းမှ စ၍ သုံးစွဲသူလက်ဝယ်သို့ ရောက်ရှိသည်အထိ ထောက်ပံ့ရေးကွင်းဆက် (Supply Chain) ကို စနစ်တကျ စီမံတွက်ချက်ဆောင်ရွက်ရန်နှင့် စိုက်ပျိုးမြေများကို အကျိုးရှိစွာ အသုံးချနိုင်ရေး အလေးထားဆောင်ရွက်ရန်လည်း အကြံပြုခဲ့သည်။
နိုင်ငံတော်သမ္မတသည် စက်ရုံအတွင်း အေးခဲဟင်းသီးဟင်းရွက်များ ထုတ်လုပ်နေသည့် လုပ်ငန်းစဉ်အဆင့်ဆင့်ကိုလည်း လှည့်လည်ကြည့်ရှုစစ်ဆေးခဲ့ကြောင်း သိရသည်။
