ဧရာဝတီဆက်သွယ်ရေးကွန်ရက် ဘုံအခြေခံအဆောက်အအုံ (AFCI-Port Sharing) စီမံကိန်းကို တည်ဆောက်၊ လုပ်ကိုင်၊ လွှဲပြောင်း (B.O.T) စနစ်ဖြင့် အကောင်အထည်ဖော်ဆောင်ရွက်ရန် ဧရာဝတီတိုင်းဒေသကြီးအစိုးရအဖွဲ့နှင့် Horizon Telecom International Co., Ltd တို့ သဘောတူစာချုပ် ချုပ်ဆိုခဲ့ကြောင်း သိရသည်။
သဘောတူစာချုပ်ချုပ်ဆိုပွဲကို မေ ၂၂ ရက် မွန်းလွဲပိုင်းက ဧရာဝတီတိုင်းဒေသကြီးအစိုးရအဖွဲ့ရုံး အစည်းအဝေးခန်းမ(၁)၌ ကျင်းပခဲ့ရာ တိုင်းဒေသကြီးဝန်ကြီးချုပ် ဦးအေးကျော်၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာတာဝန်ရှိသူများနှင့် Horizon Telecom International Co., Ltd မှ တာဝန်ရှိသူများ တက်ရောက်ခဲ့ကြသည်။
အခမ်းအနားတွင် ဝန်ကြီးချုပ် ဦးအေးကျော်က Horizon Telecom International Co., Ltd အနေဖြင့် ဧရာဝတီတိုင်းဒေသကြီးအတွင်း မြို့ပြနှင့် ကျေးလက်ဒေသများရှိ ပြည်သူများအတွက် လက်လှမ်းမီပြီး ဈေးနှုန်းသက်သာသော အင်တာနက်ဝန်ဆောင်မှုများ ရရှိနိုင်ရေး ဆောင်ရွက်သွားရမည်ဖြစ်ကြောင်း ပြောကြားခဲ့သည်။
ထို့ပြင် စီမံကိန်းလုပ်ငန်းများအား ဆက်သွယ်ရေးညွှန်ကြားမှုဦးစီးဌာန၏ ဥပဒေ၊ နည်းဥပဒေများနှင့်အညီ ဆောင်ရွက်ရမည်ဖြစ်ပြီး ဆက်သွယ်ရေးဆိုင်ရာ Right of Way စီမံခန့်ခွဲမှုများကိုလည်း စာချုပ်ပါ စည်းကမ်းချက်များနှင့်အညီ တာဝန်ယူဆောင်ရွက်ရမည်ဖြစ်ကြောင်း သိရသည်။
အဆိုပါ စီမံကိန်းအကောင်အထည်ဖော်ခြင်းဖြင့် ဧရာဝတီတိုင်းဒေသကြီးအတွင်း အုပ်ချုပ်ရေး၊ လုံခြုံရေး၊ စီးပွားရေးနှင့် ဆက်သွယ်ရေးကဏ္ဍများ ပိုမိုထိရောက်လျင်မြန်လာမည်ဖြစ်ကြောင်း ဝန်ကြီးချုပ်က ပြောကြားခဲ့သည်။
ထို့အတူ 5G စနစ် အကောင်အထည်ဖော်ရာတွင် အဆင်သင့်ဖြစ်စေရန်နှင့် ဖိုက်ဘာကေဘယ်လ်လမ်းကြောင်းတစ်လျှောက် တိုင်များ၊ ကြိုးများ ရှုပ်ထွေးစွာ တပ်ဆင်ထားမှုများကို စနစ်တကျ ပြုပြင်နိုင်မည်ဖြစ်ကာ မြို့ပြအင်္ဂါရပ်နှင့်ညီညွတ်သည့် Smart City များ ဖော်ဆောင်ရာတွင် အထောက်အကူပြုမည့် စီမံကိန်းတစ်ရပ်ဖြစ်ကြောင်းလည်း ၎င်းက ဆိုသည်။
ဝန်ကြီးချုပ်က သက်ဆိုင်ရာဌာနများအနေဖြင့် Horizon Telecom International Co., Ltd ၏ စီမံကိန်းအကောင်အထည်ဖော်ဆောင်ရွက်မှုများကို စာချုပ်ပါအချက်များနှင့်အညီ စဉ်ဆက်မပြတ် ကြီးကြပ်ပေါင်းစပ် ဆောင်ရွက်သွားရန်လည်း မှာကြားခဲ့ကြောင်း သိရသည်။