အာဆီယံသံအမတ်ကြီးများနှင့် International Energy Agency (IEA) အမှုဆောင်ဒါရိုက်တာတို့ကြား အလုပ်သဘောနေ့လယ်စာစားပွဲကို မေ ၂၀ ရက်က Paris မြို့၌ ကျင်းပခဲ့ရာ မြန်မာသံရုံး၊ ပါရီမြို့မှ သံရုံးယာယီတာဝန်ခံ/သံအမတ်ကြီး ဦးကျော်ညွန့်ဦး တက်ရောက်ခဲ့ကြောင်း သိရသည်။
အဆိုပါ အလုပ်သဘောနေ့လယ်စာစားပွဲကို ပါရီမြို့ရှိ Singapore သံအမတ်ကြီး H.E. Mr. Umej Bhatia ဦးဆောင်ကျင်းပခဲ့ပြီး ဒေသတွင်း စွမ်းအင်အကျပ်အတည်းနှင့် စွမ်းအင်လုံခြုံရေးဆိုင်ရာ ကိစ္စရပ်များကို ဆွေးနွေးခဲ့ကြသည်။
ဆွေးနွေးပွဲတွင် ကမ္ဘာလုံးဆိုင်ရာနှင့် ဒေသတွင်း စွမ်းအင်ဖွံ့ဖြိုးတိုးတက်မှုများ၊ လက်ရှိ စွမ်းအင်အကျပ်အတည်းနှင့် Southeast Asia ဒေသအပေါ် သက်ရောက်မှုများ၊ IEA နှင့် အရှေ့တောင်အာရှဒေသအကြား ပူးပေါင်းဆောင်ရွက်မှု တိုးမြှင့်ရေး၊ ပါရီမြို့ရှိ အာဆီယံသံရုံးများနှင့် IEA တို့အကြား စွမ်းအင်ကဏ္ဍဆိုင်ရာ ပိုမိုနီးကပ်စွာ ပူးပေါင်းဆောင်ရွက်နိုင်ရေးတို့ကို အဓိကထား ဆွေးနွေးခဲ့ကြသည်။
IEA ကို ၁၉၇၄ ခုနှစ်တွင် စတင်တည်ထောင်ခဲ့ပြီး Paris မြို့တွင် အခြေစိုက်ကာ စွမ်းအင်လုံခြုံရေး၊ သန့်ရှင်းသောစွမ်းအင်အသုံးပြုရေးနှင့် ရေရှည်တည်တံ့သော စွမ်းအင်စနစ်များ ဖော်ဆောင်ရေးတို့အတွက် နိုင်ငံများကို ပံ့ပိုးကူညီပေးနေသည့် နိုင်ငံတကာစွမ်းအင် ပူးပေါင်းဆောင်ရွက်ရေးအဖွဲ့အစည်းတစ်ခုဖြစ်သည်။
ထို့ပြင် ဒေသတွင်း ပူးပေါင်းဆောင်ရွက်မှု ပိုမိုတိုးမြှင့်နိုင်ရေးအတွက် ၂၀၂၅ ခုနှစ်တွင် Singapore မြို့၌ IEA ၏ ပထမဆုံး ဒေသဆိုင်ရာပူးပေါင်းဆောင်ရွက်မှုစင်တာကို တည်ထောင်ခဲ့ကြောင်း သိရသည်။
