အီရန်နိုင်ငံအပေါ် အမေရိကန်၏ ဒဏ်ခတ်ပိတ်ဆို့မှုမူဝါဒတွင် ပူးပေါင်းပါဝင်သည့် နိုင်ငံများမှ သင်္ဘောများကို ဟော်မုဇ်ရေလက်ကြားမှတစ်ဆင့် ဖြတ်သန်းခွင့်ပြုမည်မဟုတ်ကြောင်း အီရန်တပ်မတော် ပြောရေးဆိုခွင့်ရှိသူ မိုဟာမက် အာကရာမီးနီးယားက ပြောကြားလိုက်သည်။
“အခုချိန်ကစပြီး အမေရိကန်ရဲ့ စံနမူနာကိုလိုက်ပြီး အီရန်အစ္စလာမ်မစ်သမ္မတနိုင်ငံအပေါ် ဒဏ်ခတ်ပိတ်ဆို့မှုတွေ ချမှတ်တဲ့နိုင်ငံတွေဟာ ဟော်မုဇ်ရေလက်ကြားကို ဖြတ်သန်းရာမှာ အခက်အခဲတွေနဲ့ မလွဲမသွေ ရင်ဆိုင်ရတော့မှာ ဖြစ်ပါတယ်” ဟု IRNA သတင်းဌာနနှင့် အင်တာဗျူးတွင် သူက ပြောကြားခဲ့သည်။
အမေရိကန်နှင့် အစ္စရေးတို့နှင့် ဖြစ်ပွားနေသည့် စစ်ရေးပဋိပက္ခများကြောင့် အီရန်အနေဖြင့် “ဟော်မုဇ်ရေလက်ကြား၏ ပထဝီဝင်နိုင်ငံရေးဆိုင်ရာ အလားအလာများကို အသုံးချရန်” တွန်းအားပေးခံခဲ့ရကြောင်းနှင့် ယခုအခါ အီရန်အနေဖြင့် ထိုရေလက်ကြားအပေါ် “အချုပ်အခြာအာဏာ ကျင့်သုံးနေပြီ” ဖြစ်ကြောင်း အာကရာမီးနီးယားက အလေးပေးပြောဆိုခဲ့သည်။ ထို့အပြင် ရေလက်ကြားကို ဖြတ်သန်းလိုသည့် မည်သည့်သင်္ဘောမဆို ယခုအခါ “အီရန်နှင့် ကြိုတင်ညှိနှိုင်းဆောင်ရွက်ရမည်” ဟုလည်း သူက ဆက်လက်ပြောကြားသည်။ တပ်မတော်ပြောရေးဆိုခွင့်ရှိသူ၏ အဆိုအရ ဤလုပ်ဆောင်ချက်များသည် “အီရန်အတွက် အကျိုးကျေးဇူးများစွာ ဆောင်ကြဉ်းပေးနိုင်လိမ့်မည်” ဟု သူက ဆိုသည်။
ပြီးခဲ့သည့် မေလ ၇ ရက်နေ့နှောင်းပိုင်းက အမေရိကန်နှင့် အီရန်တို့ အပြန်အလှန် တိုက်ခိုက်မှုများ ဖြစ်ပွားခဲ့ပြီးနောက် ပင်လယ်ကွေ့ဒေသတွင် တင်းမာမှုများ တစ်ကျော့ပြန် မြင့်တက်လာခဲ့ခြင်း ဖြစ်သည်။ အီရန်နိုင်ငံပိုင် ရုပ်မြင်သံကြားသတင်းများအရ ယခုပဋိပက္ခသည် အမေရိကန်က အီရန်ရေနံတင်သင်္ဘောတစ်စီးကို စတင်တိုက်ခိုက်ခဲ့ရာမှ စတင်ခဲ့ခြင်းဖြစ်ပြီး၊ ထိုသို့တိုက်ခိုက်မှုကြောင့် အီရန်က ဟော်မုဇ်ရေလက်ကြားအနီးရှိ အမေရိကန် ဖျက်သင်္ဘော သုံးစီးကို တုံ့ပြန်တိုက်ခိုက်ခဲ့ခြင်းဖြစ်ကြောင်း သိရသည်။ ထို့နောက်တွင် အမေရိကန် ဗဟိုစစ်ဌာနချုပ် (CENTCOM) က အီရန်နိုင်ငံအတွင်းရှိ စစ်ရေးပစ်မှတ်များကို ဆက်တိုက် တိုက်ခိုက်မှုများ ပြုလုပ်ခဲ့သည်။