မေလ ၄ ရက်
ဒုတိယကမ္ဘာစစ် အောင်ပွဲနေ့ (Victory Day) စစ်ရေးပြအခမ်းအနား ကို ကျင်းပရန် ပြင်ဆင်နေချိန်တွင် မော်စကိုမြို့လယ်အနီးရှိ အဆင့်မြင့်လူနေရပ်ကွက်မှ အဆောက်အအုံတစ်ခုကို ဒရုန်းတစ်စင်း ထိမှန်ခဲ့သည်။
ယူကရိန်းဘက်မှ လွှတ်တင်လိုက်သော ဒရုန်းနှစ်စင်းကို မော်စကိုမြို့၏ လေကြောင်းရန်ကာကွယ်ရေးစနစ်က ပစ်ချနိုင်ခဲ့သော်လည်း နောက်ထပ် ဒရုန်းတစ်စင်းမှာ မူ မော်စဖလန်းမော့စကာယာ လမ်းပေါ်ရှိ အဆောက်အအုံတစ်ခုပေါ်သို့ ကျရောက်ထိမှန်ခဲ့ကြောင်း မော်စကိုမြို့တော်ဝန် ဆာဂေး ဆိုဘျာနင် က တနင်္လာနေ့တွင် ရေးသားဖော်ပြခဲ့သည်။ အဆိုပါနေရာသို့ အရေးပေါ်ကယ်ဆယ်ရေးအဖွဲ့များ စေလွှတ်ထားပြီး လူထိခို-က်ဒ-ဏ်ရာရရှိမှု သတင်းများ မရှိသေးကြောင်း သိရသည်။
အဆိုပါ မော်စဖလန်းမော့စကာယာလမ်းသည် ခရမ္မလင်နန်းတော် ၏ အနောက်ဘက် ၆ ကီလိုမီတာမှ ၈ ကီလိုမီတာခန့် (၄ မိုင်မှ ၅ မိုင်ခန့်) အကွာတွင် တည်ရှိပြီး ဒေသတွင်းမီဒီယာများ၏ ဖော်ပြချက်အရ အဆင့်မြင့်လူနေအဆောက်အအုံ၏ အပေါ်ဆုံးထပ်များတွင် ထိခို-က်ပျ-က်စီးမှုများ ရှိခဲ့ကြောင်း သိရသည်။ မော်စကိုမြို့၏ လေကြောင်းရန်ကာကွယ်ရေးစနစ်သည် ပုံမှန်အားဖြင့် ဒရုန်းများကို မြို့တော်အပြင်ဘက် သို့မဟုတ် ဆင်ခြေဖုံးရပ်ကွက်များတွင်သာ ကြားဖြတ်ဖျ-က်ဆီးလေ့ရှိသဖြင့် ယခုကဲ့သို့ မြို့လယ်အနီးသို့ ဒရုန်းကျရောက်ထိမှန်ခြင်းမှာ ဖြစ်လေ့ဖြစ်ထမရှိသော ဖြစ်စဉ်တစ်ခုဖြစ်သည်။
ယခုဖြစ်စဉ်သည် နာဇီဂျာမနီကို အောင်နိုင်ခဲ့သည့် ဒုတိယကမ္ဘာစစ် အောင်ပွဲအထိမ်းအမှတ်အဖြစ် မေလ ၉ ရက်နေ့တွင် ကျင်းပမည့် အစဉ်အလာ စစ်ရေးပြအခမ်းအနားအတွက် မော်စကိုမြို့က ပြင်ဆင်နေစဉ်အတွင်း ဖြစ်ပွားခဲ့ခြင်း ဖြစ်သည်။
လုံခြုံရေးဆိုင်ရာ ခြိမ်းခြောက်မှုများကြောင့် ယခုနှစ် စစ်ရေးပြအခမ်းအနားကို ၂၀၀၇ ခုနှစ်နောက်ပိုင်း ပထမဆုံးအကြိမ်အဖြစ် စစ်ဘက်ဆိုင်ရာ အကြီးစားစစ်လက်နက်ပစ္စည်းများ ထည့်သွင်းပြသခြင်းမရှိဘဲ ကျင်းပသွားမည်ဖြစ်ကြောင်း ရုရှားကာကွယ်ရေးဝန်ကြီးဌာနက ပြီးခဲ့သည့်အပတ်က ကြေညာထားခဲ့သည်။
ရုရှားနိုင်ငံကို ၂၅ နှစ်ကျော်ကြာ အုပ်ချုပ်လာခဲ့သည့် သမ္မတ ဗလာဒီမာ ပူတင်သည် အဆိုပါ အောင်ပွဲနေ့ စစ်ရေးပြအခမ်းအနားတွင် မိန့်ခွန်းပြောကြားရန် အစီအစဉ်ရှိသည်။ ပူတင်သည် အောင်ပွဲနေ့ကို ၎င်း၏ အုပ်ချုပ်မှုသက်တမ်းအတွင်း အဓိကမဏ္ဍိုင်တစ်ခုအဖြစ် အသုံးချလေ့ရှိပြီး ယူကရိန်းစစ်ပွဲ ဆင်နွှဲနေခြင်းကို တရားဝင်ကြောင်း ပြသရန်အတွက်လည်း အဆိုပါနေ့ထူးနေ့မြတ်ကို အသုံးပြုရန် ကြိုးပမ်းလေ့ရှိသည်။
Ref: ဆော့သ်ချိုင်းနားမောနင်းပို့စ်