အီရန်နှင့် သဘောတူညီချက်ရယူမည့် အချက်တစ်ခုအကြောင်း မိမိကို ပြောပြထားသော်လည်း တိကျသည့် စကားလုံးအသုံးအနှုန်းများကို စောင့်ဆိုင်းနေကြောင်းနှင့် အီရန်ဘက်က အပြုအမူ မလျော်ကန်ပါက ထိုနိုင်ငံအပေါ် တို-က်ခိုက်မှုများ ပြန်လည်စတင်နိုင်ခြေ ရှိနေသေးကြောင်း အမေရိကန်သမ္မတ ဒေါ်နယ်ထရန့်က စနေနေ့တွင် ပြောကြားခဲ့သည်။
အီရန်အဆင့်မြင့်အရာရှိတစ်ဦးက စနေနေ့တွင် ပြောကြားရာ၌ ယခုအချိန်အထိ ထရန့်ဘက်က ငြင်းပယ်ထားသည့် အီရန်၏ အဆိုပြုချက်သည် ဟော်မုဇ် ရေလက်ကြားအတွင်း သင်္ဘောသွားလာမှုများကို ဖွင့်ပေးမည်ဖြစ်ပြီး အမေရိကန်၏ အီရန်အပေါ် ရေလမ်းပိတ်ဆို့မှုကို အဆုံးသတ်စေမည်ဖြစ်ကြောင်း၊ အီရန်၏ နျူကလီးယား အစီအစဉ်နှင့် ပတ်သက်သည့် ဆွေးနွေးမှုများကိုမူ နောက်ပိုင်းမှ လုပ်ဆောင်ရန် ချန်ထားခဲ့မည်ဖြစ်ကြောင်း သိရသည်။
ဖလော်ရီဒါပြည်နယ်၊ West Palm Beach ရှိ မိုင်ယာမီသို့ ပျံသန်းမည့် လေယာဉ်ပေါ်သို့ မတက်မီ အီရန်၏ အဆိုပြုချက်နှင့် ပတ်သက်၍ မေးမြန်းရာတွင် ထရန့်က “သဘောတူညီချက်ရဲ့ အယူအဆကို ကျွန်တော့်ကို ပြောပြထားပါတယ်။ အခု သူတို့က ကျွန်တော့်ကို တိကျတဲ့ စကားလုံးအသုံးအနှုန်းတွေ ပေးပါလိမ့်မယ်” ဟု ပြန်လည်ဖြေကြားခဲ့သည်။
သူ၏ လူမှုကွန်ရက်စာမျက်နှာတွင် ထပ်လောင်းပြောကြားရာ၌မူ အဆိုပါ အဆိုပြုချက်များသည် လက်ခံနိုင်ဖွယ်ရှိလိမ့်မည်ဟု မိမိအနေဖြင့် စိတ်ကူး၍မရကြောင်းနှင့် အီရန်သည် သူတို့လုပ်ဆောင်ခဲ့သမျှအတွက် ထိုက်တန်သည့် ရင်းနှီးပေးဆပ်မှုမျိုး ယခုအချိန်အထိ မပေးဆပ်ရသေးကြောင်း ပြောကြားခဲ့သည်။
အီရန်အပေါ် တိုက်ခိုက်မှုများ ပြန်လည်စတင်နိုင်ခြေ ရှိ၊ မရှိ မေးမြန်းရာတွင် ထရန့်က “အဲဒါကိုတော့ ကျွန်တော် မပြောချင်ပါဘူး။ ဆိုလိုတာက သတင်းထောက်တစ်ယောက်ကို ကျွန်တော် အဲဒါမျိုး ပြောလို့မရဘူးလေ။ အကယ်၍ သူတို့ အပြုအမူ မလျော်ကန်ဘူးဆိုရင်၊ မကောင်းတာတစ်ခုခု လုပ်မယ်ဆိုရင်တော့ အခုလောလောဆယ် စောင့်ကြည့်ရမှာပေါ့။ ဒါပေမဲ့ တိုက်ခိုက်မယ်ဆိုတာကလဲ ဖြစ်လာနိုင်တဲ့ အလားအလာတစ်ခုပါပဲ” ဟု ဖြေကြားခဲ့သည်။
ထို့ပြင် ထရန့်က သောကြာနေ့တွင် ပြောကြားရာ၌လည်း “လူသားချင်းစာနာမှုအရ” မိမိအနေဖြင့် စစ်ရေးအရ အရေးယူမှုကို ဦးစားမပေးလိုကြောင်းနှင့် အပ-စ်အခတ်ရပ်စဲရေးကြောင့် ရန်လိုမှုများ “ပြီးဆုံးသွားပြီ” ဖြစ်သောကြောင့် စစ်ပွဲကို သတ်မှတ်ထားသည့် နောက်ဆုံးရက်ထက် ကျော်လွန်သက်တမ်းတိုးရန် လွှတ်တော်ခေါင်းဆောင်များ၏ ခွင့်ပြုချက် မလိုကြောင်း ပြောကြားခဲ့သေးသည်။
