အာဆီယံဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီးဦးအောင်မျိုးမြင့်နှင့် အာဆီယံဆိုင်ရာ ဘရာဇီးလ်သံအမတ်ကြီး၊ ဆားဘီးယားသံအမတ်ကြီးတို့တွေ့ဆုံ   မြန်မာ-ဘရာဇီးလ်၊ မြန်မာ-ဆားဘီးယား နှစ်နိုင်ငံများကြား ပူးပေါင်းဆောင်ရွက်မှုများမြှင့်တင်ရန်ဆွေးနွေး

အာဆီယံဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီးဦးအောင်မျိုးမြင့်သည် အာဆီယံဆိုင်ရာ ဘရာဇီးလ်သံအမတ်ကြီး H.E. Henrique Archanjo Ferraro ၊ အာဆီယံဆိုင်ရာ ဆားဘီးယားသံအမတ်ကြီး H.E Ivana Golubovic Duboka တို့နှင့် သီးခြားစီတွေ့ဆုံခဲ့သည်။

အာဆီယံဆိုင်ရာ ဘရာဇီးလ်သံအမတ်ကြီး H.E. Henrique Archanjo Ferraro နှင့် ဧပြီ ၂၇ ရက်ကတွေ့ ဆုံ၍ မြန်မာ-ဘရာဇီးလ်နှစ်နိုင်ငံကြား ရှိရင်းစွဲချစ် ကြည်ရင်းနှီးမှုနှင့် အပြန်အလှန်အကျိုးဖြစ်ထွန်းစေမည့်ပူးပေါင်းဆောင်ရွက်မှုများအရှိန်မြှင့်တင်ရေး၊ အာဆီယံနှင့် ဘရာဇီးလ်နိုင်ငံကြား ကဏ္ဍအလိုက်ဆွေးနွေးဖက်/မိတ်ဖက်ဆက်ဆံရေးအောက်ရှိ ပူးပေါင်းဆောင်ရွက်မှုများ ခိုင်မာအားကောင်းစေရေးနှင့် အနာဂတ်ပူးပေါင်းဆောင်ရွက်မှုနယ်ပယ်များ ပိုမိုတိုးမြှင့်နိုင်ရေးတို့ကို ဆွေးနွေးခဲ့ကြသည်။

ထို့ပြင် မြန်မာအမြဲတမ်းကိုယ်စားလှယ်က အာဆီယံဆိုင်ရာ ဘရာဇီးလ်သံအမတ်ကြီးအား မြန်မာနိုင်ငံ၏ ပြည်တွင်းဖြစ်ပေါ်တိုးတက်မှုများကို ရှင်းလင်းပြောကြားခဲ့သည်။

ထို့အတူ ဧပြီ ၆ ရက်ကလည်း အာဆီယံဆိုင်ရာ ဆားဘီးယားသံအမတ်ကြီး H.E Ivana Golubovic Duboka နှင့်တွေ့ဆုံ၍ ဆားဘီးယားနိုင်ငံအနေဖြင့် အာဆီယံနှင့် နှစ်ဖက်အကျိုးရှိစေမည့်ကဏ္ဍများတွင် ပူးပေါင်းဆောင်ရွက်မှုမြှင့်တင်ရန်၊ အာဆီယံနှင့် ဆက်စပ်အဖွဲ့အစည်းများတွင် ပူးပေါင်းဆောင်ရွက်ရန် အလားအလာရှိသည်များကို ဆွေးနွေးခဲ့ကြသည်။

ထို့ပြင် မြန်မာအမြဲတမ်းကိုယ်စားလှယ်က မြန်မာနိုင်ငံနှင့် ဆားဘီးယားနှစ်နိုင်ငံကြား ပူးပေါင်းဆောင်ရွက်မှု ပိုမိုမြှင့်တင်နိုင်မည့်အခြေအနေများကိုလည်း ဆွေးနွေးပြောကြားခဲ့သည်။