ပေကျင်း၊ ဖေဖော်ဝါရီ ၁၃ ရက်
ဘင်္ဂလားဒေ့ရှ်နိုင်ငံ၏ အထွေထွေရွေးကောက်ပွဲကို တည်ငြိမ်ချောမွေ့စွာ ကျင်းပနိုင်ခဲ့သည်ကို အသိအမှတ်ပြုကြောင်းနှင့် ရွေးကောက်ပွဲတွင် အနိုင်ရရှိခဲ့သည့် ဘင်္ဂလားဒေ့ရှ် အမျိုးသားပါတီ (ဘီအင်န်ပီ) ကို ဂုဏ်ပြုကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူတစ်ဦးက သောကြာနေ့တွင် ပြောကြားခဲ့ကြောင်း သိရသည်။
ကြာသပတေးနေ့က ကျင်းပခဲ့သည့် ဘင်္ဂလားဒေ့ရှ်နိုင်ငံ၏ (၁၃) ကြိမ်မြောက် ပါလီမန် ရွေးကောက်ပွဲနှင့် ပတ်သက်၍ ပြောကြားပေးရန် တောင်းဆိုမှုကို ပြောရေးဆိုခွင့်ရှိသူက ယခုကဲ့သို့ ပြန်လည်ဖြေကြားခဲ့ခြင်း ဖြစ်သည်။ အကြိုရလဒ်များအရ ကြေညာပြီးစီးခဲ့သည့် တိုက်ရိုက်ရွေးကောက်တင်မြှောက်သော အမတ်နေရာ ၂၉၇ နေရာအနက် ဘီအင်န်ပီ ပါတီက ၂၀၉ နေရာဖြင့် အနိုင်ရခဲ့ခြင်း ဖြစ်သည်။
ဘင်္ဂလားဒေ့ရှ်နိုင်ငံ၏ အစဉ်အလာမိတ်ဆွေနိုင်ငံနှင့် အိမ်နီးချင်းနိုင်ငံဖြစ်သည့်အတိုင်း တရုတ်နိုင်ငံအနေဖြင့် ဘင်္ဂလားဒေ့ရှ်နိုင်ငံ၏ ပြည်တွင်းနိုင်ငံရေး လုပ်ငန်းစဉ်များ ဆက်လက်ဆောင်ရွက်မှုကို ထောက်ခံကြောင်း၊ နှစ်ရှည်လများ တည်ရှိခဲ့သော ချစ်ကြည်ရင်းနှီးမှုကို ဆက်လက်ထိန်းသိမ်းရန်၊ အရည်အသွေးမြင့် ရပ်ဝန်းနှင့် ပိုးလမ်းမ ပူးပေါင်းဆောင်ရွက်မှုနှင့် နယ်ပယ်အသီးသီးမှ လက်တွေ့ကျသော ပူးပေါင်းဆောင်ရွက်မှုများကို နက်ရှိုင်းစေရန်၊ တရုတ်-ဘင်္ဂလားဒေ့ရှ် ဘက်စုံမဟာဗျူဟာမြောက် ပူးပေါင်းဆောင်ရွက်ရေး မိတ်ဖက်ဆက်ဆံရေးကို ပိုမိုခိုင်မာစေရန်အတွက် ဘင်္ဂလားဒေ့ရှ်နှင့်အတူ လက်တွဲဆောင်ရွက်ရန် အသင့်ရှိကြောင်း ပြောရေးဆိုခွင့်ရှိသူက ပြောကြားခဲ့သည်။
Ref: ရှင်းဟွာ
