ယခုနှစ် ထိုင်း- မြန်မာနယ်စပ်အတွင်း ရေကြီးရေလျှံမှုမဖြစ်ပေါ်စေရေး မယ်ဆိုင်ဘက်ခြမ်း ချောင်းရိုးတလျှောက် ပြင်ဆင်မှုများ ဆောင်ရွက်နေကြောင်း ဒေသခံသတင်းရင်းမြစ်တစ်ဦးထံက သိရသည်။
ယမန်နေ့မှစတင်ကာ မယ်ဆိုင်မြို့ ထိုင်းအာဏာပိုင်အဖွဲ့က ယန္တယားစက်ကြီးများဖြင့် ယာယီသဲအိပ်များကို အဆင့်ဆင့်ကာရံ၍ ရေစုပ်စက်ကြီးများကိုလည်း အရံသင့်ပြင်ဆင်ထားပြီး၊ မယ်ဆိုင်ချောင်းရိုးတလျှောက်တွင်ရှိ စွန့်ပစ်အမှိုက်များကိုလည်း ဆယ်ယူရှင်းလင်းလျက်ရှိကြောင်း သိရသည်။
အဆိုပါ ထိုင်း-မြန်မာနယ်စပ် တာချီလိတ်မြို့(မြန်မာ)နှင့် မယ်ဆိုင်မြို့ (ထိုင်း)ဘက်ခြမ်း၌ နှစ်စဉ် မိုးရွာသွန်း၍ တောင်ကျရေကြောင့် မယ်ဆိုင်ချောင်း ရေကြီးရေလျှံဖြစ်ပွားရာမှ နှစ်နိုင်ငံမြို့များအတွင်း ရေနစ်မြှပ်မှုဖြစ်ပွားလျက်ရှိသည်။
ပြီးခဲ့သည့် မေလ(၂၄) ရက် နံနက်ပိုင်းအချိန်၌ မယ်ဆိုင်ချောင်းရေ မြင့်တက်လာခြင်းနှင့်အတူ အမှိုက်များမျောပါ လာသဖြင့် ရှင်းလင်းဖယ်ရှားရန် ထိုင်း -မြန်မာ အမှတ်(၁) ချစ်ကြည်ရေးတံတားကို ယာယီပိတ်၍ နှစ်နိုင်ငံ ရှင်းလင်းဖယ်ရှားမှုများဆောင်ရွက်ခဲ့ရသေးသည်။
ဓာတ်ပုံ – ကိုစည်သူမောင်