နှစ်သစ်တွင် နိုင်ငံတော်ကဆက်လက်လျှောက်လှမ်းမည့် ပါတီစုံဒီမိုကရေစီဖော်ဆောင်မှု၌ နိုင်ငံသူ၊နိုင်ငံသားအားလုံး ပူးပေါင်းပါဝင်ဆောင်ရွက်ကြရန် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဧပြီ ၁၇ ရက်(မြန်မာနှစ်သစ်ကူး/နှစ်ဆန်းတစ်ရက်နေ့)တွင် နှစ်သစ်ကူးနှုတ်ခွန်းဆက်စကားပြောကြားရာ၌ ထည့်သွင်းပြောကြားခဲ့သည်။
” နှစ်ဟောင်းမှာ ကျွန်တော်တို့ကြုံတွေ့ခဲ့တဲ့ ဘေးဒုက္ခတွေ၊ အခက်အခဲတွေ၊ စိန်ခေါ်မှုတွေကနေ အားနည်းချက်တွေကို သင်ခန်းစာယူဖော်ထုတ်ပြီး နှစ်သစ်မှာ အတွေးသစ်၊ အမြင်သစ်နဲ့ နိုင်ငံတော်က ဆက်လက်လျှောက်လှမ်းမယ့် ပါတီစုံဒီမိုကရေစီဖော်ဆောင်မှုမှာ နိုင်ငံသူနိုင်ငံသားများအားလုံးပူးပေါင်းပါဝင်ဆောင်ရွက်ကြပါလို့တိုက်တွန်းလိုပါတယ်”ဟု နစက ဥက္ကဋ္ဌက ပြောသည်။
ထို့ပြင် နိုင်ငံတော်တွင် စစ်မှန်စည်းကမ်းပြည့်ဝသည့် ပါတီစုံဒီမိုကရေစီစနစ်ခိုင်မာစေရေး၊ ဒီမိုကရေစီနှင့် ဖက်ဒရယ်စနစ်ကိုအခြေခံသည့် ပြည်ထောင်စု တည်ဆောက်ရေးကို နစက အစိုးရမှ ရည်မှန်းချက်ထားဆောင်ရွက်လျက်ရှိရာ ပြည်သူလူထုလိုလားသော ပါတီစုံဒီမိုကရေစီစနစ်ကို အမြန်ဆုံးပြန်လည်အကောင်အထည်ဖော်ပေးနိုင်ရန် လာမည့် ဒီဇင်ဘာလအတွင်း၌ လွတ်လပ်ပြီးတရားမျှတမှုအပြည့်ရှိသည့် ပါတီစုံဒီမိုကရေစီအထွေထွေရွေးကောက်ပွဲကျင်းပပေးနိုင်ရန် ကြိုးပမ်းဆောင်ရွက်လျက်ရှိသည်ဟု ပြောသည်။
” ပါတီစုံဒီမိုကရေစီစနစ်ကို အမှန်တကယ်လိုလားတယ်ဆိုရင် အဓိကဖြစ်တဲ့ ရွေးကောက်ပွဲအောင်အောင်မြင်မြင်ပြီးမြောက်နိုင်ဖို့အတွက် မိဘပြည်သူတွေအနေနဲ့ ပူးပေါင်းပါဝင်ဆောင်ရွက်ပေးကြဖို့ မေတ္တာရပ်ခံလိုပါတယ်။ ကျွန်တော်တို့အစိုးရအနေနဲ့ နိုင်ငံတော်နဲ့ နိုင်ငံသား အားလုံးရဲ့ အကျိုးစီးပွားကို အကောင်းဆုံးဖော်ဆောင်ပေးနိုင်ဖို့ အစဉ်သဖြင့် ကြိုးပမ်းဆောင်ရွက်နေပါတယ်”ဟု နစက ဥက္ကဋ္ဌက ပြောသည်။
ထို့အတူ နိုင်ငံတော်ဖွံ့ဖြိုးတိုးတက်ရန် တည်ငြိမ်အေးချမ်းမှုလိုအပ်၍ ရေရှည်တည်တံ့ပြီးစစ်မှန်သည့် ငြိမ်းချမ်းရေးရရှိအောင် ကြိုးပမ်းဖော်ဆောင်နေကာ လက်ရှိဖြစ်ပေါ်နေသော ပဋိပက္ခများအဆုံးသတ်နိုင်ရန် နစက အစိုးရမှ နိုင်ငံရေး ပြဿနာအား နိုင်ငံရေးနည်းဖြင့်သာဖြေရှင်းကြရန်ဖိတ်ခေါ်ကမ်းလှမ်းထားပြီးဖြစ်၍ ပြည်ထောင်စုစိတ်ဓာတ်ကိုရင်ဝယ်ပိုက်ပြီး ပူးပေါင်းပါဝင် ဆောင်ရွက်နိုင်ကြလိမ့်မည်ကိုယုံကြည်သည်ဟု နစက ဥက္ကဋ္ဌကပြောကြားခဲ့သည်။