ထိုင်းက၂၀၂၈ မှစ၍ ဖော်မြူလာဝမ်းပြိုင်ပွဲများ လက်ခံကျင်းပရန် မျှော်မှန်း

ထိုင်းနိုင်ငံသည် ၂၀၂၈ ခုနှစ်မှစ၍ ဖော်မြူလာဝမ်း ကားမောင်းပြိုင်ပွဲများကို လက်ခံကျင်းပသွားရန် မျှော်မှန်းထားပြီး ကမ္ဘာ့အဆင့်မီ ပြိုင်ပွဲများ ကျင်းပရာနေရာတစ်ခုအဖြစ် ရပ်တည်ရန် ကြိုးပမ်းနေသည့် အရှေ့တောင်အာရှနိုင်ငံအတွက် အဓိကမှတ်တိုင်တစ်ခုဖြစ်ကြောင်း ဝန်ကြီးချုပ် ပေတုံတန်ရှင်နာဝပ်ထရာက ပြောကြားလိုက်သည်။

ရင်းနှီးမြုပ်နှံမှု လိုအပ်ချက်၊ ထိုင်းနိုင်ငံအတွက် အကျိုးအမြတ်များနှင့် ပတ်လမ်းကားမောင်းပြိုင်ပွဲ ကျင်းပရန် ဖြစ်နိုင်ခြေနှင့်ပတ်သက်၍ အစိုးရက လေ့လာသွားမည်ဖြစ်သည်ဟု မတ် ၁၈ ရက်က ဘန်ကောက်တွင် F1 အမှုဆောင်အရာရှိချုပ် Stefano Domenicali နှင့် တွေ့ဆုံအပြီး၌ ဆိုရှယ်မီဒီယာပေါ်တင်ခဲ့သော ပို့စ်တွင် မစ္စပေတုံတန်က ပြောကြားခဲ့သည်။

ထိုင်းနိုင်ငံသည် ခရီးသွားလာရေး ဗဟိုချက်အဖြစ် နိုင်ငံ၏ အဆင့်အတန်းကို မြှင့်တင်ရန်နှင့် အသုံးစရိတ်မြင့်မားသော ခရီးသွားများကို ဆွဲဆောင်ရာတွင် အထောက်အကူဖြစ်စေရန် ဘန်ကောက်မြို့တွင် ပြိုင်ပွဲပတ်လမ်း သတ်မှတ်ခဲ့သည်။

ယင်းနောက် F1 အမှုဆောင်အရာရှိများသည် ဘန်ကောက်မြို့တော်ကို သွားရောက်ကာ ပြိုင်ပွဲအတွက် လမ်းကြောင်းများကို လေ့လာခဲ့ကြသည်။

ပြီးခဲ့သည့် သီတင်းပတ်ကုန်ပိုင်းက မဲလ်ဘန်းတွင် ရာသီအဖွင့်ပြိုင်ပွဲဖြင့် စတင်ခဲ့သော ၂၀၂၅ ရာသီအတွက် F1 ပြိုင်ပွဲ ၂၄ ပွဲအနက် သုံးပုံတစ်ပုံကို ကားလမ်း သို့မဟုတ် ပေါင်းစပ်ပတ်လမ်းတွင် ယှဉ်ပြိုင်ရန် စီစဉ်ထားသည်။

ပတ်လမ်းကားမောင်းပြိုင်ပွဲများကို အများပြည်သူသုံး ကားလမ်းများကို အလုံးစုံဖြစ်စေ တစ်စိတ်တစ်ပိုင်းဖြစ်စေ ပိတ်၍ အတိုချူံး ကားမောင်းပြိုင်ကွင်းများအဖြစ် အသွင်ပြောင်းထားသော လမ်းများတွင် ယှဉ်ပြိုင်လေ့ရှိသည်။ ယင်းပြိုင်ကွင်းများသည် တစ်နာရီ ၃၂၂ ကီလိုမီတာနှုန်းကျော်ဖြင့် မောင်းနှင်နိုင်သည့် နည်းပညာမြင့် ပြိုင်ကားများအတွက် အသုံးပြုသည်။

စင်ကာပူနိုင်ငံသည် F1 ပြိုင်ပွဲကို မြို့၏ ကမ်းနဖူးပေါ်တွင်ရှိသည့် Marina Bay ပတ်လမ်းတွင် လက်ခံကျင်းပသည်။

မစ္စပေတုံတန်၏ အစိုးရသည် နိုင်ငံကို ကမ္ဘာ့ထိပ်တန်း အနုပညာရှင်များနှင့် ပွဲတော်များကို လက်ခံကျင်းပရာ အကောင်းဆုံးနေရာတစ်ခုအဖြစ်နှင့် ခရီးသွားလုပ်ငန်းကို အားကိုးအားထားပြုသော နိုင်ငံအဖြစ် ရပ်တည်ရာတွင် ယခင်ဝန်ကြီးချုပ် ဆရက်ထာ ထဝီဆင်း၏ ကြိုးပမ်းအားထုတ်မှုများကို အခြေခံထားသည်။

ထိုင်းနိုင်ငံသည် MotoGP ကားမောင်းပြိုင်ပွဲကို အိမ်ရှင်အဖြစ် လက်ခံကျင်းပထားခဲ့သည်။

F1 ပြိုင်ပွဲကို အိမ်ရှင်အဖြစ် လက်ခံကျင်းပခွင့် ရရှိခြင်းသည် မြို့တော်၏ အခြေခံအဆောက်အဦ ဖွံ့ဖြိုးတိုးတက်ရန် အခွင့်အလမ်းကိုသာမက ခရီးသွားအများအပြားကိုလည်း ဆွဲဆောင်နိုင်မည်ဖြစ်ကြောင်း ဝန်ကြီးချုပ်က ပြောသည်။ ထိုပြိုင်ပွဲသည် အလုပ်အကိုင်အခွင့်အလမ်းအသစ်များကို ဖန်တီးပေးနိုင်သကဲ့သို့ ဝန်ဆောင်မှုကဏ္ဍနှင့် အခြားကဏ္ဍများအတွက်လည်း ဝင်ငွေအရင်းအမြစ်သစ်များ ကို ဖြစ်ပေါ်စေနိုင်သည်ဟုသူက ပြောကြားခဲ့သည်။

Ref: သည်စထရိတ်တိုင်းမ်စ်