သမ္မတဟောင်း ဘိုင်ဒင်က သူ၏ သမ္မတသက်တမ်းနောက်ဆုံးမိနစ်များတွင် ပေးခဲ့သောလွတ်ငြိမ်းချမ်းသာခွင့်များသည် သူကိုယ်တိုင် လက်မှတ်ရေးထိုးထားခြင်းမဟုတ်သဖြင့်”ပျက်ပြယ်” သည်ဟု ယုံကြည်ကြောင်း သမ္မတထရမ့်က လူမှုကွန်ရက်ပို့စ်တစ်ခုတွင် ပြောကြားခဲ့သည်။ အဘယ်ကြောင့်ဆိုသော် ၎င်းတို့ကို Autopen ဖြင့် လက်မှတ်ရေးထိုးထားသောကြောင့် ဖြစ်သည်။
Autopen (သို့မဟုတ် လက်မှတ်ရေးထိုးစက်) ဆိုသည်မှာ လက်မှတ်ကို အလိုအလျောက်ရေးထိုးရန် အသုံးပြုသည့် ကိရိယာတစ်ခုဖြစ်သည်။ ထင်ရှားကျော်ကြားသော နာမည်ကြီးပုဂ္ဂိုလ်များ၊ ဆယ်လီများသည် တစ်နေ့တာလုံး လက်မှတ်တောင်းခံရမှုများစွာကို ရင်ဆိုင်ရနိုင်သည်။ ထို့ကြောင့်၊ ထင်ရှားကျော်ကြားသော နာမည်ကြီးပုဂ္ဂိုလ်များ၊ လူသိများသော ဆယ်လီပုဂ္ဂိုလ်များစွာတို့သည် သူတို့၏ လက်မှတ်ကို လူကိုယ်တိုင်တိုက်ရိုက်ရေးထိုးစရာမလိုဘဲ လိုအပ်သည့်အချိန်တွင် အလိုအလျောက်ရိုက်နှိပ်နိုင်ရန် Autopen စက်ကို အသုံးပြုလေ့ရှိသည်။
“အိပ်ငိုက်နေသော ဂျိုးဘိုင်ဒင်က နိုင်ငံရေးလူဆိုးများ နှင့် အခြားသူများအား ပေးအပ်ခဲ့သော ‘လွတ်ငြိမ်းချမ်းသာခွင့်များ’ သည် Autopen ဖြင့် လက်မှတ်ရေးထိုးထားခြင်းသာဖြစ်သောကြောင့် ယခုအခါ ပျက်ပြယ်သွားပြီဖြစ်ပြီး၊ နောက်ထပ်အာဏာသက်ရောက်မှု မရှိတော့ပါ” ဟု ထရမ့်ကက Truth Social တွင် တနင်္လာနေ့အစောပိုင်းက ရေးသားပြောကြားခဲ့သည်။
ဇန်နဝါရီလက ထရမ့် သမ္မတအဖြစ် ကျမ်းသစ္စာကျိန်ဆိုမှုမတိုင်မီအချိန်တွင်၊ ဘိုင်ဒင်သည် ထရမ့်၏ နိုင်ငံရေးရန်သူများကို လွတ်ငြိမ်းချမ်းသာခွင့်များ လက်မှတ်ရေးထိုးပေးခဲ့သည်။ ထိုသူများတွင် ၂၀၂၁ ခုနှစ် ဇန်နဝါရီ ၆ ရက်နေ့က အမေရိကန်လွှတ်တော်အဆောက်အဦး၌ ဖြစ်ပွားခဲ့သော အဓိကရုဏ်းကို စုံစမ်းစစ်ဆေးခဲ့သည့် အောက်လွှတ်တော်ကော်မတီအဖွဲ့ဝင်များ၊ ဘိုင်ဒင် ၏ မိသားစုဝင်များ နှင့် ဗိုလ်ချုပ်ကြီး မာ့ခ်မီလီ တို့ ပါဝင်သည်။