ယူကရိန်းတွင် ရွေးကောက်ပွဲများ ကျင်းပရန် ငြင်းဆန်သည့်အတွက် ဇယ်လင်စကီးကို ထရမ့်က “အာဏာရှင်” ဟု ခေါ်ဝေါ်သုံးနှုန်း

ယူကရိန်းတွင် သမ္မတရွေးကောက်ပွဲများ ကျင်းပရန် ငြင်းဆန်သည့်အတွက် ဗလာဒီမာ ဇယ်လင်စကီးကို အမေရိကန်သမ္မတ ဒေါ်နယ်ထရမ့်က ဝေဖန်ပြစ်တင်ခဲ့သည်။

“ရွေးကောက်ပွဲမလိုတဲ့ အာဏာရှင်၊ ဇယ်လင်စကီး မြန်မြန်ဆန်ဆန် ဆင်းသင့်တယ်၊ မဟုတ်ရင် သူ့မှာ နိုင်ငံဆိုတာ ကျန်မှာမဟုတ်တော့ဘူး” ဟု ထရမ့်က သူ၏ Truth ဆိုရှယ်မီဒီယာစာမျက်နှာတွင် ရေးသားခဲ့သည်။

ထို့အပြင် အမေရိကန်သည် ဥရောပနှင့်မတူဘဲ ရုရှားနှင့် “အောင်မြင်စွာ ညှိနှိုင်းဆွေးနွေး” နေကြောင်း၊ ဥရောပသည် “ငြိမ်းချမ်းရေးယူဆောင်လာရန် ပျက်ကွက်” ကြောင်းတို့ကိုပါ သူက ထည့်သွင်းပြောကြားခဲ့သည်။

ဒေါ်နယ်ထရမ့်နှင့် ဗလာဒီမာ ပူတင်တို့သည် ဖေဖော်ဝါရီလ ၁၂ ရက်နေ့တွင် ဖုန်းဖြင့် စကားပြောဆိုခဲ့ကြသည်။ ခေါင်းဆောင်နှစ်ဦးသည် ယူကရိန်းရှိ စစ်ပွဲရပ်စဲရေး၊ နှစ်နိုင်ငံဆက်ဆံရေးနှင့် အခြားကိစ္စရပ်များကို ဆွေးနွေးခဲ့ကြသည်။ ထို့အပြင် ဆက်သွယ်ဆက်ဆံရေးများကို ဆက်လက်ထိန်းသိမ်းထားရန်နှင့် မျက်နှာချင်းဆိုင်တွေ့ဆုံပွဲတစ်ခု စီစဉ်ရန် သဘောတူညီခဲ့ကြသည်။ ရုရှားအစိုးရ ပြောရေးဆိုခွင့်ရှိသူ ဒီမီထရီ ပက်စကော့ဗ်က ခေါင်းဆောင်နှစ်ဦးကြား စကားပြောဆိုမှုသည် “ရင်းနှီးသောမိတ်ဆွေနှစ်ဦး တည်ဆောက်ရေးလုပ်ငန်းများကို ဆောင်ရွက်နေကြခြင်း” ဖြစ်ကြောင်း အလေးပေး ပြောကြားခဲ့သည်။

ဖေဖော်ဝါရီလ ၁၈ ရက်နေ့တွင် ရုရှားနှင့် အမေရိကန် ကိုယ်စားလှယ်အဖွဲ့များသည် ဆော်ဒီအာရေဗျနိုင်ငံ ရီယာ့ဒ်မြို့တွင် ၄နာရီခွဲခန့် ကြာမြင့်သော ဆွေးနွေးပွဲများ ပြုလုပ်ခဲ့ကြသည်။ ရုရှားအစိုးရဖက်မှ ကိုယ်စားလှယ်အဖွဲ့ အတွင်းရေးမှူး ယူရီ ဥူရှာကော့ဗ်က ကိုယ်စားလှယ်အဖွဲ့များသည် ရုရှားနှင့် အမေရိကန်တို့၏ သဘောထားများ နီးစပ်လာခြင်းနှင့် ယူကရိန်းနှင့်ပတ်သက်သည့် ဆက်သွယ်မှုများအပါအဝင် ၎င်းတို့ကိုင်တွယ်လိုသည့် ကိစ္စရပ်များအားလုံးနှင့်ပတ်သက်၍ လေးနက်သော ဆွေးနွေးမှုများ ပြုလုပ်ခဲ့ကြောင်း ပြောကြားခဲ့သည်။

ဇယ်လင်စကီး၏ သမ္မတ သက်တမ်း ငါးနှစ်သည် ၂၀၂၄ ခုနှစ် မေလတွင် ကုန်ဆုံးခဲ့ပြီဖြစ် သော်လည်း၊ ရုရှားနှင့် စစ်ဖြစ်နေစဉ်ကာလအတွင်း ယူကရိန်း၌ စစ်အုပ်ချုပ်ရေးပြဌာန်း ခဲ့သည့်အချိန်မှစ၍ သမ္မတရွေးကောက်ပွဲများကို ရွှေ့ဆိုင်းထားခဲ့ခြင်းဖြစ်သည်။