ပြီးခဲ့သည့် နိုဝင်ဘာလအတွင်းက ဂျီဒီပီ ကို ၆ ဒဿမ ၅ ရာခိုင်နှုန်းမှ ၇ ရာခိုင်နှုန်း တိုးတက်ရန် အတည်ပြုထားခဲ့သော ၂၀၂၅ ခုနှစ်အတွက် ရည်မှန်းချက်ကို အနည်းဆုံး ၈ ရာခိုင်နှုန်းအထိ တိုးမြှင့်ပြင်ဆင်ချက်ကို ဗီယက်နမ် လွှတ်တော်က ဗုဒ္ဓဟူးနေ့တွင် မဲခွဲအတည်ပြုလိုက်ကြောင်း သိရသည်။
၂၀၂၆ မှ ၂၀၃၀ ပြည့်နှစ်အရောက်တွင် ဂျီဒီပီတိုးတက်မှု ဂဏန်းနှစ်လုံးသို့ ရောက်ရှိရန်နှင့် ၂၀၄၅ ခုနှစ်တွင် ဝင်ငွေမြင့်မားသော နိုင်ငံတစ်ခုဖြစ်လာစေရန်အတွက် စီးပွားရေးအရှိန်အဟုန်ကို ဖန်တီးရန် ယခုနှစ်တွင် တိုင်းပြည်၏ စီးပွားရေးအားကောင်းစေရေး ကြိုးပမ်းနေစဉ် ယခု ဆုံးဖြတ်ချက်ထွက်လာခြင်းဖြစ်သည်။
ပြီးခဲ့သည့်နှစ်တွင် ဗီယက်နမ်၏ ဂျီဒီပီ သည် ၇ ဒဿမ ၀၉ ရာခိုင်နှုန်း တိုးတက်ခဲ့ပြီး အာရှတွင် အလျင်မြန်ဆုံး တိုးတက်မှုနှုန်းတစ်ခုဖြစ်ခဲ့သည်။ ယင်း တိုးတက်မှုနှုန်းသည် အာရှဖွံဖြိုးရေးဘဏ်နှင့် နိုင်ငံတကာငွေကြေးရန်ပုံငွေအဖွဲ့တို့အပါအဝင် အထင်ကရ နိုင်ငံတကာ ပညာရှင်အများစု၏ ခန့်မှန်းချက်များကိုလည်း ကျော်တက်သွားခဲ့သည်။
သီတင်းတစ်ပတ်ကြာ အစည်းအဝေးကာလအတွင်း လွှတ်တော်သည် နိုင်ငံ၏ မြင့်မားသော တိုးတက်မှုရည်မှန်းချက်ကို ပံ့ပိုးမည့် မူဝါဒအမျိုးမျိုးကိုလည်း တရားဝင် အတည်ပြုခဲ့သည်။
နောက်ဆုံးအစီအစဉ်များအရ ဗီယက်နမ်သည် ၂၀၃၅ ခုနှစ်တွင် ၎င်း၏ အကြီးဆုံးမြို့ကြီးနှစ်ခု၌ မြို့ပြရထားလိုင်း ၁၇ ခုအတွက် ရထားလမ်းအရှည် ၇၅၂ ကီလိုမီတာတိုးချဲ့ရန်နှင့် နိုင်ငံ၏ ပထမဆုံး နျူကလီးယားဓါတ်အားပေးစက်ရုံကို ၂၀၃၁ ခုနှစ် အစောဆုံးထား၍ ပြီးစီးရန် ရည်ရွယ်ထားသည်။
ပါလီမန်သည် ဗီယက်နမ်နှင့် တရုတ်နိုင်ငံတို့ကို ဆက်သွယ်ပေးမည်ဖြစ်ကာ နိုင်ငံ၏ အဓိကကုန်ထုတ်လုပ်မှု အချက်အချာနေရာအချို့ကိုလည်း ဖြတ်သန်းမည့် မြန်နှုန်းမြင့် မီးရထားလမ်းစီမံကိန်းအတွက် အမေရိကန်ဒေါ်လာ ၈ ဒဿမ ၄ ဘီလျံ ရင်းနှီးမြုပ်နှံရေး ရင်းနှီးမြုပ်နှံမှု မူဝါဒကိုလည်းလည်း အတည်ပြုခဲ့သည်။
၂၀၃၀ ပြည့်နှစ်တွင် အပြီးသတ်ရန် ရည်မှန်းသော အဆိုပါ ရထားလမ်းအတွက် နိုင်ငံတော် ဘတ်ဂျက်၊ တရုတ်အစိုးရက ပံ့ပိုးသော နိုင်ငံခြားချေငွေများနှင့် အခြား တရားဝင်အရင်းအမြစ်များမှ ဘဏ္ဍာငွေထောက်ပံ့သွားမည်ဖြစ်သည်။
Ref: သည်စထရိတ်တိုင်းမ်စ်