သစ္စ-ာဖောက်သည်ဆိုသော စွပ်စွဲချက်များကို မဟာသီယာ ငြင်း

မလေးရှားဝန်ကြီးချုပ်ဟောင်း မဟာသီယာ မိုဟာမက်က သူသည် တိုင်းပြည်အပေါ် သစ္စာဖောက်ခဲ့သည်ဆိုသော စွပ်စွဲချက်များကို ငြင်းဆန်သွားခဲ့သည်။ ၂၀၁၈ ခုနှစ်က အငြင်းပွား‌ေန‌ေသာကျွန်းငယ်နှစ်ကျွန်းနှင့်ပတ်သက်၍ ရပ်တည်ချက်ကို စွန့်လွှတ်ရန် အစိုးရက ဆုံးဖြတ်ခဲ့မှုအပေါ် ရာဇဝတ်ကြောင်းအရ စုံစမ်းစစ်ဆေးရန် တော်ဝင်စုံစမ်းရေးကော်မရှင်က တောင်းဆိုခဲ့ပြီးနောက် သူ၏ ငြင်းဆိုချက်ထွက်လာခြင်းဖြစ်သည်။

ပြီးခဲ့သည့် သီတင်းပတ်တွင် ထုတ်ပြန်ခဲ့သည့် အစီရင်ခံစာအရ ၎င်း ဝန်ကြီးချုပ်တာဝန်ထမ်းဆောင်စဉ်က မလေးရှားနှင့် စင်ကာပူနိုင်ငံအကြားရှိ Pedra Brabca ကျွန်းငယ်၏ အချုပ်အခြာပိုင်မှုဆိုင်ရာ ကမ္ဘာ့တရားရုံး၏ စီရင်ချက် ပျက်ပြယ်စေရေးတွင် မလေးရှား၏ တရားရေးပြိုင်ဆိုင်မှုကို ရုပ်သိမ်းရန် ဆုံးဖြတ်ခဲ့သည့်အတွက် အသက် ၉၉ နှစ်အရွယ် မဟာသီယာကို စုံစမ်းစစ်ဆေးရန် စုံစမ်းရေးကော်မရှင်က အကြံပြုထားခဲ့သည်။

ထို့အပြင် အခြား အငြင်းပွားကျွန်းငယ်တစ်ခု၏ ပိုင်ဆိုင်မှုဆိုင်ရာနှင့်ပတ်သက်၍လည်း မလေးရှားနိုင်ငံက တရားရုံးထံမှ ရှင်းလင်းချက် တောင်းခံခဲ့သည်ဟု စုံစမ်းရေးအစီရင်ခံစာတွင် ဖော်ပြခဲ့သည်။

နောက်တစ်နှစ်တွင် မဟာသီယာဦးဆောင်သော ညွှန့်ပေါင်းအဖွဲ့ ရွေးကောက်ပွဲအောင်နိုင်ခဲ့အပြီး ၂၀၁၇ ခုနှစ်၌ တရားရေးဆိုင်ရာ လျှောက်ထားချက်နှစ်ခုစလုံးကို ရုပ်သိမ်းခဲ့သည်။

ယခုနှစ်ဇွန်လအတွင်း မဟာသီယာက ပြောဆိုခဲ့ရာ၌ သူသည် အမှုလျှောက်ထားချက်များနှင့် ပတ်သက်၍ ဂရုတစိုက် ပြန်သုံးသပ်သကဲ့သို့ နိုင်ငံတကာဥပေဒကျွမ်းကျင်သူများထံမှ အကြံညဏ်လည်း ရယူခဲ့ကြောင်း ပြောကြားခဲ့သည်။ သူတို့က အမှုသည် အားနည်းချက်ရှိသည်ဟု ထင်မြင်ချက်ပေးခဲ့သောကြောင့် အယူခံကို ရုပ်သိမ်းရန် အစိုးရအဖွဲ့ကို သူ အကြံပြုခဲ့ကြောင်းနှင့် အစိုးရအဖွဲ့ကလည်း သဘောတူခဲ့ကြောင်း မဟာသီယာက ပြောဆိုခဲ့သည်။

ဒီဇင်ဘာ ၁၀ ရက်က သတင်းစာရှင်းလင်းပွဲတွင်မူ စုံစမ်းရေးလုပ်ငန်းစဉ်တွင် ထိုအစိုးရအဖွဲ့ဝန်ကြီးများကို သက်သေအဖြစ် မဆင့်ခေါ်ခြင်းနှင့် အလားတူ စုံစမ်းစစ်ဆေးမှုမခံရခြင်းနှင့် ပတ်သက်၍ မဟာသီယာက မေးခွန်းထုတ်ခဲ့သည်။

“အစိုးရအဖွဲ့အစည်းအဝေးမှာ ဒီလူတွေအားလုံး ရှိနေကြတာပါ၊ ဆုံးဖြတ်ချက်နဲ့ပတ်သက်ပြီး ကန့်ကွက်စရာဖြစ်ဖြစ် စောဒကတက်စရာဖြစ်ဖြစ်ရှိခဲ့ရင် သူတို့ ကန့်ကွက်ပြောဆိုနိုင်တာပဲ။ ဒါပေမဲ့ ဘယ်သူမှ ဘာမှ မပြောခဲ့ကြဘူး” ဟု သူက ပြောကြားခဲ့သည်။

အယူခံလျှောက်ထားချက်များ ရုပ်သိမ်းခဲ့မှုနှင့် ပတ်သက်၍ ပြန်လည်သုံးသပ်ရန် လက်ရှိဝန်ကြီးချုပ် အန်ဝါအီဘရာဟင်က တောင်းဆိုခဲ့ပြီးနောက် ယင်းအငြင်းပွား ကျွန်းငယ်များကိစ္စကို စုံစမ်းရေးလုပ်ခဲ့ခြင်းဖြစ်သည်။

Ref: ဘန်ကောက်ပို့စ်