အထူးစီးပွားရေးဇုန်များ ပိုမိုဖွံ့ဖြိုးတိုးတက်မှသာ နိုင်ငံတော်၏ စီးပွားရေးဖွံ့ဖြိုးတိုးတက်မှုကို အထောက်အကူပြုမည်ဖြစ်ကြောင်း မြန်မာအထူးစီးပွားရေးဇုန်ဆိုင်ရာ ဗဟိုအဖွဲ့ဥက္ကဋ္ဌ၊ နစက ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်းက ပြောကြားလိုက်သည်။
အောက်တိုဘာ (၁၂) ရက် နေ့လယ် (၁) နာရီကကျင်းပသည့် မြန်မာအထူးစီးပွားရေးဇုန်ဆိုင်ရာဗဟိုအဖွဲ့ အစည်းအဝေး (၁/၂၀၂၃) တွင် ပြောကြားခဲ့ခြင်း ဖြစ်သည်။
အလားတူ အထူးစီးပွားရေးဇုန်များ ပိုမိုဖွံ့ဖြိုးတိုးတက်လာပါက ဒေသခံများအတွက် အလုပ်အကိုင်အခွင့်အလမ်းများပိုမိုတိုးတက် ရရှိလာမည်ဖြစ်သည့်အပြင် လူနေမှုအဆင့်အတန်းများ တိုးတက်မှုရှိလာမည် ဖြစ်ကြောင်းလည်း ၄င်းက ပြောသည်။
ထို့ကြောင့် အထူးစီးပွားရေးဇုန်များ အောင်မြင်တိုးတက်ရန် သက်ဆိုင်ရာစီမံခန့်ခွဲမှု ကော်မတီများအနေဖြင့် ဥပဒေ၊လုပ်ထုံးလုပ်နည်းများနှင့်အညီ ယခုထက် ပိုမိုကြိုးပမ်းဆောင်ရွက်ရမည်ဟုလည်း မှာကြားခဲ့သည်။
အထူးစီးပွားရေးဇုန်များတွင် ငွေကြေးဆိုင်ရာဆွဲဆောင်မှု၊လုပ်ထုံးလုပ်နည်း၊ စည်းမျဉ်းစည်းကမ်းများ ပိုမိုလွယ်ကူမြန်ဆန်စွာဆောင်ရွက်ခွင့်ရှိသည့် ဆွဲဆောင်မှု၊ ရေ၊ မီး၊ လမ်းတံတား စသည့်အခြေခံအဆောက်အဦများ ပြည့်စုံကောင်းမွန်အောင် ဆောင်ရွက်ပေးသည့် ဆွဲဆောင်မှုများကို ခွင့်ပြုဆောင်ရွက်ပေးနေခြင်းများကို တွေ့ရမည်ဟုလည်း ၎င်းကဆိုသည်။
ထို့အပြင် အထူးစီးပွားရေးဇုန်များသည် အလုပ်အကိုင်အခွင့်အလမ်းများရရှိရေးအတွက် အထောက်အကူပေးနိုင်ပြီး စက်မှုဆိုင်ရာမူဝါဒများ၏ ဖြစ်ပေါ်တိုးတက်မှုအသစ်များဖြစ်ကာ နိုင်ငံတကာရင်းနှီး မြှုပ်နှံမှုများကိုလည်း ပိုမိုဆွဲဆောင်နိုင်မည်ဖြစ်ကြောင်း အထူးစီးပွားရေးဇုန်ဆိုင်ရာ ဗဟိုအဖွဲ့ဥက္ကဋ္ဌက ထည့်သွင်း ပြောကြားသွားသည်။
လက်ရှိတွင် နိုင်ငံတော်အတွင်း၌ အထူးစီးပွားရေးဇုန် (၃) ခုကို အကောင်အထည်ဖော်ဆောင်ရွက်လျက်ရှိပြီး သီလဝါအထူးစီးပွားရေးဇုန်ကို ၂၀၁၃ ခုနှစ်မှ စတင်ကာ အကောင်အထည်ဖော်ဆောင်ရွက်လျက်ရှိပြီး ကျောက်ဖြူ အထူးစီးပွားရေးဇုန်နှင့် ထားဝယ်အထူးစီးပွားရေးဇုန်တို့ကိုလည်း နှစ်အလိုက်အကောင်အထည်ဖော်ဆောင်ရွက်လျက်ရှိနေသည်။