ယခုနှစ် မိုးဦးရာသီတွင် ပဲတီစိမ်းလျာထားစိုက်ဧက ၅၉၂၁၁ ဧကသတ်မှတ်ထား

0
233

၂၀၂၃-၂၀၂၄ ခုနှစ်၊ မိုးဦးရာသီတွင် ပဲတီစိမ်းလျာထားစိုက်ဧကမှာ ၅၉၂၁၁ ဧက သတ်မှတ်ထားပြီး ဇွန်လ၊ တတိယအပတ်အထိ ဧက (၃၀၀၀၀)ခန့် စိုက်ပျိုးပြီးစီးပြီဖြစ်ကြောင်း စိုက်ပျိုးရေးဦးစီးဌာနမှ သိရသည်။

ပဲတီစိမ်းသည် ပူနွေးခြောက်သွေ့သော ရာသီဥတုကို နှစ်သက်ပြီး အပူချိန် ၃၀ မှ ၃၆ ဒီဂရီ စင်တီဂရိတ်အတွင်းရှိသော ဒေသများတွင် ကောင်းစွာ စိုက်ပျိုးဖြစ်ထွန်းနိုင်ရာ နှစ်စဥ်မိုးရေချိန် ၃၀ လက်မမှ ၃၆ လက်မအတွင်းရှိသော ဒေသများတွင် စိုက်ပျိုးနိုင်ကြောင်းနှင့် ဆားပေါက်သောမြေများမှ လွဲ၍ ကျန်သောမြေအားလုံးတွင် စိုက်ပျိုးနိုင်ရာ အထူးသဖြင့် စနယ်မြေစေး၊ လယ်မြေ၊ နုန်းမြေများတွင် ပို၍စိုက်ပျိုး ဖြစ်ထွန်းနိုင်ကြောင်း သိရသည်။

မြန်မာပြည်အထက်ပိုင်း ဒေသများတွင် မိုးကြိုရာသီစိုက်ပျိုးရာ၌ ဖေဖော်ဝါရီ လလယ်မှ မတ်လလယ်အတွင်း လည်းကောင်း၊ မိုးရာသီ စိုက်ပျိုးရာ၌ မေလလယ်မှ သြဂုတ်လလယ်အတွင်း လည်းကောင်း စိုက်ပျိုးကြကြောင်းနှင့် မြန်မာပြည်အောက်ပိုင်း ဒေသများတွင် ပဲတီစိမ်းကို စပါးရိတ်သိမ်းပြီးချိန်၌ သီးထပ်အနေဖြင့် အောက်တိုဘာလနှင့် နိုဝင်ဘာအတွင်း စိုက်ပျိုးလေ့ရှိသည်။

ပြီးခဲ့သည့် ၂၀၂၂ခုနှစ်တွင် အောင်လံမြို့၌ မိုးဦးကာလစောခဲ့၍ ပဲစိုက်တောင်သူများအနေဖြင့် မေလ၊ ပထမအပတ်တွင် စတင်စိုက်ပျိုးနိုင်ခဲ့ကြောင်း၊ သီးနှံပေါ်ချိန်တွင် ပုံမှန်ထက် တစ်လစော၍ ထွက်ရှိပြီး ဇူလိုင်လတွင် ‌ဈေးကွက်အတွင်း စတင်ရောက်ရှိလာသောဈေးနှုန်းမှာ ပိဿာ( ၂၀) ဝင် (၁)တင်းလျှင် ကျပ်(၄၅၀၀၀)မှ ကျပ်(၅၀၀၀၀)ဖြင့် အရည်အသွေးအလိုက် အရောင်းအဝယ်စတင်ခဲ့ပြီး ရန်ကုန်နှင့် မန္တလေးဈေးကွက်များက ဝယ်ယူမှုများခဲ့ကြောင်း စားသုံးသူရေးရာဦးစီးဌာနမှ သိရသည်။ 

ထို့ပြင် ဩဂုတ်လတွင် ကျပ် (၄၄၀၀၀)မှ ကျပ် (၉၅၁၀၀၀) အတွင်း မန္တလေးဝယ်လက်များမှာ ပိုမိုဝယ်ယူမှုရှိပြီး ရန်ကုန်ဝယ်လက်မှာမူ ပုံမှန်အတိုင်းသာအဝယ်ရှိခဲ့ကြောင်း၊ စက်တင်ဘာလ၊ အောက်တိုဘာလနှင့် ဒီဇင်ဘာလများတွင် ပိဿာ (၂၀)ဝင် (၁)တင်းလျှင် ကျပ်(၄၅၀၀၀)မှ ကျပ်(၅၀၀၀၀)အထိ ဈေးဖွင့်ဝယ်ယူခဲ့ကြကြောင်းနှင့် ယခု ၂၀၂၃ခုနှစ်၊ ဇွန်လတွင် ပိဿာ(၂၀)ဝင် (၁)တင်းလျှင် ကျပ်(၅၅၀၀၀)ဖြင့် အရောင်းအဝယ်ဖြစ်လျက်ရှိကြောင်း စားသုံးသူရေးရာဦးစီးဌာနမှ သိရသည်။


LEAVE A REPLY

Please enter your comment!
Please enter your name here