အိန္ဒိယနိုင်ငံ သြဒိသပြည်နယ်အရှေ့ပိုင်း ဘာလာဆိုမြို့၌ သောကြာနေ့ညပိုင်းက ခရီးသည်တင်ရထားနှစ်စင်းနှင့် ကုန်ပစ္စည်းရထားတစ်စင်းတို့ တိုက်မိရာ လူ ၂၃၀ ကျော် သေဆုံးပြီး ရာနှင့်ချီ ဒဏ်ရာရရှိခဲ့သည်။ လက်ရှိတွင် ရုပ်အလောင်း ၂၃၃ ခုကို ရှာဖွေတွေ့ရှိထားသည်။
လူပေါင်း ၂၃၃ ဦးထက်မနည်း သေဆုံးပြီး ၉၀၀ ကျော် ဒဏ်ရာရရှိခဲ့ကြောင်း ပြည်နယ် အကြီးအကဲ Pradeep Jena က သောကြာနေ့တွင် ပြောကြားခဲ့သည်။
ကြီးမားသော ကယ်ဆယ်ရေး လုပ်ငန်းများ လုပ်ဆောင်နေချိန်တွင် အဖွဲ့များ အနေဖြင့် သေဆုံးသူ ဦးရေ တိုးလာမည်ဟု မျှော်လင့်ကြောင်း Jena က သတင်းစာရှင်းလင်းပွဲတွင် ပြောကြားခဲ့သည်။
ပျက်စီးနေသော ရထားတွဲအတွင်း အသက်ရှင်ကျန်ရစ်သူများကို ကယ်ဆယ်ရေးသမားများက ရှာဖွေရန် ကြိုးပမ်းနေသည့် အခင်းဖြစ်ပွားရာနေရာမှ ဓာတ်ပုံများ အင်တာနက်တွင် ပြန့်နှံ့နေသည်။ ဗီဒီယိုမှတ်တမ်းများတွင် ရထားသံလမ်းတစ်လျှောက် မှောက်ကျနေသော ရထားတွဲများနှင့် ပြိုပျက်နေသော ရထားတွဲပေါ်သို့ တက်နေကြသူများကိုလည်း တွေ့မြင်ရသည်။
သောကြာနေ့ညက ကယ်ဆယ်ရေးလုပ်ငန်းများတွင် အရေးပေါ်လူနာတင်ယာဉ် ၁၁၅ စီးနှင့် မီးသတ်တပ်ဖွဲဝင့်အများအပြား ပါဝင်ကြောင်း ဒေသအာဏာပိုင်များကဆိုသည်။
ထို့အပြင် သွေးလိုအပ်မှုလည်းရှိနေကြောင်း၊ လောလောဆယ်တွင် လက်ကျန်ရှိနေသည့် သွေးယူနစ် ၉၀၀နှင့်အတူ လှူဒါန်းသူများထံမှ တစ်ညလုံး စုဆောင်းထားသည့် သွေးယူနစ် ၅၀၀ ခန့်ရှိကြောင်း ပြည်နယ် အကြီးအကဲ Pradeep Jena က Twitter တွင် ရေးသားခဲ့သည်။
“ဒါက မတော်တဆ ထိခိုက်ဒဏ်ရာရသူတွေကို ကုသရာမှာ အထောက်အကူဖြစ်စေမှာပါ။ မွန်မြတ်တဲ့ရည်ရွယ်ချက်အတွက် သွေးလှူဒါန်းပေးခဲ့ကြတဲ့ စေတနာ့ဝန်ထမ်းအားလုံးကို ကျေးဇူးတင်ရှိပါတယ်” ဟု သူက ရေးသားခဲ့သည်။
သေဆုံး ဒဏ်ရာရသူအရေအတွက်မှာ မြင့်တက်လာဖွယ်ရှိကြောင်း တာဝန်ရှိသူတို့ကပြောသည်။