ပြည်တွင်း၌ လည်ပတ်နေသည့် စက်ရုံအချို့သည် ယခင်လောက်အမှာစာမရရှိသည့်အတွက် ပိတ်နိုင်ချေရှိလာကြောင်း အလုပ်သမားအရေးဆောင်ရွက်သူများထံက သိရသည်။
“ ပိတ်တဲ့စက်ရဲ့တစ်ချို့ကပိတ်တယ်။ ဖွင့်တဲ့စက်ရုံကဖွင့်တယ်။ သိသလောက်ကတော့ စက်ရုံတစ်ချို့က အော်ဒါတွေကျလို့ အရင်လောက်အော်ဒါတွေမရလို့ ပိတ်တာဖြစ်တယ်။ စက်ရုံတစ်ချို့ ပိတ်တာတွေတော့ ဟုတ်တယ်။ အစိုးရကပြောတာကတော့ ၄ သိန်း ၁ သောင်းလောက်လုပ်သားအင်အားရှိတယ်လို့ပြောတယ်။ ကျွန်တော်တို့ကတော့ ပိုတွက်တာပေါ့။ နေ့စားဝန်ထမ်းတွေလည်းရှိသလို အမြဲတမ်းဝန်ထမ်းတွေလည်းရှိတယ်။ လုပ်သားအင်အား ၅ သိန်းဝန်းကျင်လောက်ရှိတာပေါ့။ ကိုဗစ်ဖြစ်ပြီးတဲ့နောက်ပိုင်းမှာ အလုပ်သမား ၂ သိန်းလောက်က အလုပ်လက်မဲ့ဖြစ်သွားတာပေါ့”ဟု အလုပ်သမားအရေးဆောင်ရွက်နေသူတစ်ဦးက ပြောသည်။
လက်ရှိတွင် အထည်ချုပ်စက်ရုံ ၅၀၅ ခု ၊ ဖိနပ်ချုပ်လုပ်ငန်းစက်ရုံ ၄၈ ခု ၊ ဆံပင်တု စက်ရုံ ၈ခု၊ အခြား အိတ်ချုပ်လုပ်ငန်းစက်ရုံ ၊ အားကစား ဝတ်စုံ၊ ဖိနပ်၊ ခြေအိတ်ချုပ်လုပ်ငန်းစသည့် စက်ရုံလုပ်ငန်းများပါဝင်သည့် စက်ရုံ၊အလုပ်ရုံပေါင်းသည် ၁၇၇ ရုံ လုပ်ငန်းလည်ပတ်နေကြောင်း အလုပ်သမားဝန်ကြီးဌာန၏ စာရင်းများအရ သိရသည်။
ပြည်တွင်းရှိ CMP လုပ်ငန်းများတွင် တရုတ် ၊ ထိုင်း၊ ကိုရီးယား၊ ဂျပန်နိုင်ငံ အပါအဝင် တရုတ်(တိုင်ပေ)မှလည်း လာရောက်ရင်းနှီးမြှုပ်နှံမှုပြုလုပ်၍ လုပ်ကိုင်နေကြောင်း သိရသည်။
ယင်းအပြင် အထည်ချုပ်ကဏ္ဍတွင် ထုတ်လုပ်မှုအပိုင်းလျော့နည်းသွားပြီး ယခင်က အမေရိကန်ဒေါ်လာ ၅ ဘီလီယံ ပြည်ပသို့တင်ပို့နိုင်ပြီး ယခုနှစ်များတွင် ထို့လောက်တင်ပို့နိုင်ခြင်းမရှိသေးကြောင်း သိရသည်။
“အမှာစာအခြေအနေအရစက်ရုံအချို့ယာယီရပ်ဆိုင်းမယ်ဆိုတာတော့ကြားနေရပါတယ်။အများကြီးတော့မဟုတ်ဘူး။ ဝယ်သူတဦးတည်းအပေါ်အလုံးစုံတည်မှီနေရတဲ့လုပ်သားများတဲ့စက်ရုံလိုမျိုးကတော့အခက်အခဲရှိနိုင်ပါတယ်။ နာမည်ကြီးကုန်အမှတ်တံဆိပ်အော်ဒါတွေလက်ခံထားတဲ့စက်ရုံတချို့ကတော့မေလအထိလောက်တော့အမှာစာ ရှိတယ်ကြားတယ်”ဟု ဇုံထဲကစက်ရုံပိုင်ရှင်တစ်ဦးကဆိုသည်။
အောက်ခြေ အလုပ်သမားတွေရဲ့ဘဝကိုစောင့်ရှောက်မြှင့်တင်ပေးချင်ရင် တိုင်းပြည်ကိုသီးခြားကျဥ်ထားခြင်းမျိုးနဲ့ မလုပ်ပေးနိုင်ဘူးဆိုတာကို အတော်များများကသိကြပါတယ်ဟု စီးပွားရေးလေ့လာသုံးသပ်သူတစ်ဦးကပြောသည်။