နူးယော့ခ်၊ဖေဖော်ဝါရီ ၅
တောင်ကာရိုလိုင်းနားပြည်နယ်ကမ်းရိုးတန်းအနီးရောက်ရှိလာသော တရုတ်ထောက်လှမ်းရေးမီးပုံးပျံအား အောင်မြင်စွာပစ်ချလိုက်နိုင်ပြီဖြစ်ကြောင်း ကာကွယ်ရေးဝန်ကြီးလွိုက်အော်စတင်က ကြေငြာချက်တစ်ခုထုတ်ပြန်ခဲ့သည်။
အဆိုပါမီးပုံး ကို တရုတ်အနေဖြင့် အမေရိကန်ပြည်ထောင်စု၏ ဗျူဟာမြောက်နေရာများကိုစောင့်ကြည့်ရန် အသုံးပြုခဲ့ခြင်းဖြစ်ကြောင်းလည်း ၎င်းကပြောကြားခဲ့သည်။ဗုဒ္ဓဟူးနေ့တွင် သမ္မတဘိုင်ဒင်က အဆိုပါမီးပုံးပျံသွားရာလမ်းရှိ အမေရိကန်ပြည်သူများမထိခိုက်နိုင်ပါက ချက်ချင်းပစ်ချရန် အမိန့်ထုတ်ပြန်ခဲ့သဖြင့် ယခုကဲ့သို့ ပစ်ချလိုက်ရခြင်းဖြစ်သည်ဟုလည်းဆိုသည်။
ယခုမစ်ရှင်အား ကနေဒါအစိုးရ၏ အကူအညီနှင့် ပူးပေါင်းဆောင်ရွက်ပေးမှုတို့ဖြင့် လုပ်ဆောင်ခဲ့ခြင်းဖြစ်သည်ဟုလည်းဖော်ပြထားသည်။ပစ်ချလိုက်သည့်အရှိန်ကြောင့် အသေးစားပေါက်ကွဲမှုလေးသာဖြစ်ပွားခဲ့ပြီး မီးပုံးပျံပျက်ကျသွားသည်ကိုလည်း မီဒီယာများ၏ဗီဒီယိုဖိုင်များတွင်မြင်တွေ့နိုင်သည်။
ယခုမီးပုံးပျံဖြစ်ရပ်ကြောင့် ပေကျင်းသို့သွားရန်စီစဉ်ထားသည့် အမေရိကန်နိုင်ငံခြားရေးဝန်ကြီး ဘလင်ကန်၏ခရီးစဉ်ကိုလည်းဖျက်သိမ်းလိုက်ပြီး မစ္စတာဘလင်ကန်က တရုတ်နိုင်ငံခြားရေးဝန်ကြီး မစ္စတာဝမ်ယိအား ယခုလုပ်ရပ်သည်လက်ခံနိုင်ဖွယ်မရှိကြောင်းနှင့် အမေရိက၏အချုပ်အခြာ အာဏာကိုထိပါးကာ နိုင်ငံတကာစည်းမျဉ်းကိုချိုးဖောက်ခြင်းဖြစ်ကြောင်းပြောကြားခဲ့သည်။
သို့သော်တရုတ်က မူ ယခုမီးပုံးသည် စစ်ရေးရည်ရွယ်ချက်ဖြင့်အသုံးပြုခြင်းမဟုတ်ပဲ မိုးလေဝသစူးစမ်းရေးအတွက်သာသုံးခြင်းဖြစ်သည်ဟု ပြန်လည်ချေပခဲ့သည်။
မည်သို့ဆိုစေ တရုတ်၏ရည်ရွယ်ချက်အား ရှင်းရှင်းလင်းလင်းမသိရှိရသကဲ့ သို့ အဆိုပါကိစ္စနှင့်နီးစပ်သူများကမူ ယခုလုပ်ရပ်သည်အမေရိက၏ ဗျူဟာမြောက်နေရာများကိုစောင့်ကြည့်ရန်နှင့် ကန်နိုင်ငံ၏စောင့်ကြည့်တုံ့ပြန်နိုင်စွမ်းအား စမ်းသပ်လိုက်ခြင်းလည်းဖြစ်သည်ဟုပြောကြားခဲ့သည်။
Source : Nikkei Asia