၄ နှစ်ကျော်ကြာရပ်နားထားသည့် အမှတ်(၂) သံမဏိစက်ရုံ(ပင်းပက်)အားပြန်လည်ဖွင့်လှစ်လုပ်ကိုင်မည်

0
43

၂၀၁၆ ခုနှစ်၊ အောက်တိုဘာလမှစတင်၍ ရုရှားပညာရှင်များအကူအညီဖြင့် ကွန်ပျူတာထိန်းချုပ်စနစ်
မပါဝင်ဘဲ ၇၂ နာရီကြာစမ်းသပ်လည်ပတ်ခဲ့ပြီး ၄ နှစ်ကျော်ကြာရပ်နားထားသည့် အမှတ်(၂)သံမဏိစက်ရုံ(ပင်းပက်)အားပြန်လည်ဖွင့်လှစ်လုပ်ကိုင်သွားမည်ဖြစ်သည်။

ထိုသို့ ပြန်လည်ဖွင့်လှစ်နိုင်ရန် စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းမှ ဇန်နဝါရီ ၂၃ ရက်နံနက်ပိုင်းက စက်ရုံအားကြည့်ရှုစစ်ဆေးခဲ့သည်။

နိုင်ငံတော်အတွက်လိုအပ်သည့် သံနှင့်သံမဏိထုတ်လုပ်ရေး စီမံကိန်းလုပ်ငန်းများကိုဆောင်ရွက်နေခြင်းဖြစ်၍ လုပ်ငန်းတာဝန်များကို အလေးထားဆောင်ရွက်ရန် ပြည်ထောင်စုဝန်ကြီးကမှာကြားခဲ့သည်။

ထို့နောက် ပြည်ထောင်စုဝန်ကြီးသည် စက်ရုံအတွင်းရှိ သံရည်ကျိုလုပ်ငန်းတွင်အသုံးပြုမည့်စက်မှုလုပ်ငန်းသုံးရေစစ်ကန်၊ အဝင်ဓာတ်အားလိုင်းလက်ခံဖြန့်ဖြူးခွဲရုံတည်ဆောက်ပြီးစီးမှု၊ ကျောက်မီးသွေးကြိတ်ခွဲ ပြုပြင်ရေးအလုပ်ရုံ၊ သံသတ္တုရိုင်းအခြောက်ခံအလုပ်ရုံ၊ သံသတ္တုရိုင်း ပြုပြင်ရေးအလုပ်ရုံ၊ အလိုအလျောက်မီးငြှိမ်းသတ်ရေးအလုပ်ရုံတို့အား ကြည့်ရှုစစ်ဆေးခဲ့သည်။

ထို့ပြင် အမှတ်(၂)ပန့်အလုပ်ရုံ၊ ရေပြန်လည် အအေးခံပေးပို့သည့်အလုပ်ရုံ၊ သန့်စင်ပြီးကုန်ကြမ်းများသိုလှောင်အလုပ်ရုံ၊ စွန့်ပစ်အပူသုံးဘွိုင်လာ၊ ဓာတုပစ္စည်းဖြင့်ရေပြုပြင်အလုပ်ရုံ၊ စွန့်ပစ်အပူသုံးလျှပ်စစ်ဓာတ်အားပေးအလုပ်ရုံ၊ စက်မှုလုပ်ငန်းသုံးရေသန့်စင်အလုပ်ရုံ၊ အောက်ဆီဂျင်အလုပ်ရုံ၊ သံစိမ်းတုံးပုံလောင်းအလုပ်ရုံ၊ ဖိအားမြင့်လေထုတ်အလုပ်ရုံ၊ ဒုတိယအဆင့် ရေတွန်းအလုပ်ရုံ၊ သောက်သုံးရေသန့်စင်အလုပ်ရုံ၊ တန် ၁၀၀ အထိ ခြင်တွယ်နိုင်သည့် ကတ္တား၊ သံသတ္တုရိုင်း ပထမအဆင့်ကြိတ်ခွဲအလုပ်ရုံနှင့်စက်ပစ္စည်းများအား ဝန်မပါစမ်းသပ်မောင်းနှင်နေမှုတို့ကိုလည်း ကြည့်ရှုစစ်ဆေးခဲ့သည်။

အမှတ်(၂) သံမဏိစက်ရုံ(ပင်းပက်)၌ သဘာဝ သယံဇာတကုန်ကြမ်းများဖြင့် သံရည်ကျိုမည့် သံရည်ကျိုအလုပ်ရုံအပါအဝင် အလုပ်ရုံခွဲ ၂၂ ရုံရှိပြီး အလုပ်ရုံခွဲ ၁၉ ရုံအား ဝန်မပါစမ်းသပ်လည်ပတ်ခဲ့သည်။

ထို့အတူ ကျန်ရှိသည့်အလုပ်ရုံခွဲ ၃ ရုံအား ရုရှားနိုင်ငံမှပညာရှင်များ၊ မြန်မာပညာရှင်များနှင့်စက်ရုံဝန်ထမ်းများပူးပေါင်း၍ စစ်ဆေးပြုပြင်စမ်းသပ်လည်ပတ်ခြင်းများကို ဆက်လက်ဆောင်ရွက်လျက်ရှိပြီး ကုန်ထုတ်လုပ်မှုများအားတစ်ပြိုင်တည်းဆောင်ရွက်သွားမည်ဖြစ်ကြောင်း သိရသည်။


LEAVE A REPLY

Please enter your comment!
Please enter your name here