ကိုဗစ်ကာလမှာ ပြည်သူတွေကို ကူညီပေးနေတဲ့ မေ့ထားလိုမရတဲ့ ပရဟိတလှုပ်ရှားသူများ

ကိုဗစ်ကာလမှာ ပြည်သူတွေကို ကူညီပေးနေတဲ့ မေ့ထားလိုမရတဲ့ ပရဟိတလှုပ်ရှားသူများ
August 10, 2021 Asian Fame

ကိုဗစ်တတိယလှိုင်းအတွင်း မြန်မာပြည်သူတွေမှာ ပြောင်းလဲခဲ့တဲ့နိုင်ငံရေးအခြေအနေတွေနှင့် အခြားအခက်အခဲတွေကြောင့် ဆေးရုံ ဆေးခန်း သွားဖို့ အခက်အခဲဖြစ်တာတွေ၊ အလုပ်လက်မဲ့နှုန်းများတာကြောင့် ဆေးဝယ်သောက်ဖို့အဆင်မပြေတဲ့အပြင် ထမင်းတနပ် စားဖို့တောင် အခက်အခဲဖြစ်နေသူတွေ ရှိပါတယ်။

ဒါပေမယ့် ပြည်သူမှပြည်သူကိုကူညီပေးနေတဲ့ ပရဟိတအဖွဲ့အစည်းတွေ အပြင် တနိုင်တပိုင်ကူညီပေးနေတဲ့ ပရဟိတ လှုပ်ရှားသူ တွေကြောင့် အခြေခံ ပြည်သူတွေအနေနဲ့ အခက်အခဲအချို့အဆင်ပြေခဲ့ရပါတယ်။

ကိုဗစ်ပထမလှိုင်းနဲ့ ဒုတိယလှိုင်းတွေမှာ အသင်းအဖွဲ့တွေနဲ့ ပရဟိတလုပ်ဆောင်ခဲ့တဲ့အပြင် တနိုင်တပိုင်ပါ ပရဟိတအလုပ်တွေ လှုပ်ရှားခဲ့ သူ ဦးဇော်က ကိုဗစ်တတိယလှိုင်းမှာပါ ကူညီဖြစ်ခဲ့ပုံကို အခုလိုပြောပြထားပါတယ်။

“ခုတတိယလှိုင်းက ပြည်သူတွေအတွက် အငိုက်မိသလို ဖြစ်သွားတဲ့အပြင် ပထမလှိုင်း၊ဒုတိယလှိုင်းတွေလို ကြိုတင်ပြင်ဆင်ထားနိုင်ဖို့ အခြေအနေတွေမပေးခဲ့ဘူး။ဒါ့အပြင် အောက်ဆီဂျင်လိုအပ်တဲ့ အခြေအနေ၊ ဆေးရုံ၊ဆေးခန်းသွားဖို့အခက်အခဲအမျိုးမျိုးကြောင့် အိမ်မှာပဲ ကုကြရတာတွေအပြင် ကုသနည်းမမှန်တာတွေကြောင့် အသေအပျောက်တွေများခဲ့ရတယ်” လို့ပြောပါတယ်။

ကိုဗစ်တတိယလှိုင်းအစမှာ အောက်ဆီဂျင် Concentrator အလုံး ၂၀ ကို မိတ်ဆွေတွေနဲ့အတူ စုပေါင်းမတည် ငှါးရမ်းပေးခဲ့ပြီး အောက်ဆီဂျင် နဲ့ Flow meter တွေကိုပါ လှူဒါန်းပေးခဲ့တဲ့ ဦးဇော်က ပရဟိတလှုပ်ရှားသူတယောက်ရဲ့ အခက်အခဲကို ပြောပြထားပါတယ်။

“ပထမလှိုင်း၊ ဒုတိယလှိုင်းတွေလိုမဟုတ်ပဲ ကူးစက်မှုပြင်းထန်တဲ့ တတိယလှိုင်းမှာ ကိုယ့်ကို ဆက်သွယ်လာသူတွေက အရေးပေါ်တွေ ချည်းပဲ။ အဲ့အရေးပေါ်ကိစ္စတွေကို ကိုင်တွယ်ရတာ စိတ်ပင်ပန်းရတယ်။ကိုယ်ကူညီလိုက်လို့ ကျန်းမာရေးကောင်းမွန်တယ် ဆိုရင် အရမ်း ပီတိဖြစ်ရတယ်။ ဒါပေမယ့် အတတ်နိုင်ဆုံးကူညီပေမယ့် ဖိတ်စင်သွားရတဲ့အခါ စိတ်ထဲမှာ အရမ်းခံစားရပြီး စိတ်ဓာတ်တွေ ကျသွား တာမျိုးတွေ ဒီကာလမှာ ကြုံရတယ်။ ဒီတတိယလှိုင်းမှာ နိုင်ငံအနေ နဲ့ပေးဆပ်ရမှု အရမ်းကြီးမားတဲ့အတွက် စိတ်လည်း မကောင်းဘူး” လို့ ပြောပါတယ်။

ကိုဗစ်တတိယလှိုင်းမှာ အောက်ဆီဂျင် လိုအပ်ချက်နဲ့ အသက်ဆုံးရှုံးခဲ့ရသူများတာကြောင့် ပရဟိတ အသင်းအဖွဲ့တွေဟာ အောက်ဆီဂျင်တွေ လှူဒါန်းဖို့ ကြိုးပမ်းခဲ့ကြသလို အောက်ဆီဂျင် plant တွေကိုပါ တည်ဆောက်ပြီး အောက်ဆီဂျင်တွေ ပိုထုတ်နေဖို့ကို ဆောင်ရွက်နေကြတာပါ။

ဒါ့အပြင် ကိုဗစ်ကုသရေးစင်တာတွေကိုပါ ဖွင့်လှစ်ခဲ့ကြပြီး ကိုဗစ်လူနာတွေကို အပြည့်အဝ ကယ်တင်နိုင်ဖို့ ပူးပေါင်းကြိုးစားလျက် ရှိကြပါတယ်။

ပရဟိတသမားတယောက် အနေနဲ့ ရန်သူ၊မိတ်ဆွေမခွဲခြားပဲ ကိုယ့်ရှေ့မှာ ဒုက္ခရောက်နေသူကို ကူညီပေးနိုင်တဲ့စိတ်ထားရှိဖို့နဲ့ လူကို လူလိုပဲမြင်ပေး ဖို့ကိုလည်း ပရဟိတလှုပ်ရှားသူဦးဇော်က အကြံပြုထားပါတယ်။

ခုဆိုရင် စားဝတ်နေရေး အခက်အခဲဖြစ်နေတဲ့ပြည်သူတွေကို သက်သာတဲ့ဈေးနှုန်းတွေနဲ့ စားသောက်ကုန်တွေရောင်းပေးနေတဲ့ ပရဟိတ အဖွဲ့တွေ ဟာလည်း တိုင်းနဲ့ပြည်နယ်နယ်အနှံမှာ လှူဒါန်းပေးနေကြသလို တနိုင်တပိုင် သူငယ်ချင်းတွေနဲ့ ပေါင်းလုပ်နေတဲ့ ပရဟိတ လှုပ်ရှားသူတွေဟာလည်း အခက်အခဲဖြစ်နေသူတွေကို ကူညီနိုင်ဖို့ အသင့်ရှိနေကြပါတယ်ရှင်။

Comments (0)

Leave a reply

Your email address will not be published. Required fields are marked *

*