မူးယစ်ဆေးဝါးနွံ့ထဲက ဘယ်လို ကျော်ဖြတ်မလဲ ဦးကျော်သူ

မူးယစ်ဆေးဝါးနွံ့ထဲက ဘယ်လို ကျော်ဖြတ်မလဲ ဦးကျော်သူ
May 8, 2017 Asian Fame

kyawthu

ပရဟိတသမားတစ်ယောက်အဖြစ် လူမှုအကျိုးပြုလုပ်ငန်းတွေ မလုပ်ခင် ရုပ်ရှင်မင်းသား ကျော်သူ ဘဝက မူးယစ်ဆေးစွဲခဲ့ဖူးတယ်ဆိုတာကို အင်တာဗျူးတွေမှာ အမြဲ တမ်း ဖြေလေ့ရှိတဲ့ နာရေးကူညီမှု အသင်းဥက္ကဋ္ဌ ဦးကျော်သူကို လူငယ် များနဲ့ မူးယစ်ဆေးဝါးကို အန္တရာယ် အကြောင်းပညာပေးအဖြစ် မေးမြန်း ဖြစ်ခဲ့ပါတယ်။ မူးယစ်ဆေးဝါးကို ၃၊ ၄ နှစ်လောက်သုံးစွဲခဲ့ဖူးသူဦးကျော်သူက သူ မူးယစ်ဆေးဝါးကိုဘယ်လို ဖြတ်ခဲ့သလဲဆိုတာကိုမေးဖြစ်တဲ့အခါ ..

” ကျွန်တော့်တုန်းက အရက်စွဲ တာတော့ ကြာတယ်။ မူးယစ်ကတော့ ၃နှစ်၊ ၄နှစ်လောက် လုပ်ဖူးတယ်။ ကျွန်တော်မင်းသား မလုပ်ခင် ကျွန် တော်တို့ခေတ်တုန်းက တော့ ချောင်း ဆိုးပျောက်ဆေးပေါ့ ဗျာ။ အဲဒါသုံးတယ်။ နောက်ပိုင်းဖြတ် တော့ ဒီလို ဆေးဝါးနဲ့ကုတယ်ဆိုတာ စိတ်ဓာတ်တွေ ကယောင်ချောက်ချား ဖြစ်တာ တို့၊ Depression တွေ ဖြစ်လာတယ်။ ဆရာဝန်တွေကလည်း လူနာတစ်ဦး ချင်းစီတိုင်းကို ဂရုစိုက် ပေးဖို့ သိပ်မလွယ်ဘူး။ ကျွန်တော်တိုက်တွန်းပေးချင်တာက ဘာသာ ရေး လုပ်ပါ။ ဝိပဿနာဆိုလည်း ဝိပဿနာ၊ သမထဆိုလည်း သမထ။ ဒါတွေလုပ်ပြီးပရဟိတ လုပ်တယ် ဆိုရင်ပြီး သွားမှာပဲ။ မန္တလေး ဘက်မှာဆို ၆ယောက်လောက် အရက်ပြတ် သွားပြီ။ ဒါကိုကျွန်တော် ပီတိဖြစ်ရတာပေါ့” လို့ သူကပြောပါတယ်။

မူးယစ်ဆေးဝါးဆိုတာ သုံးစွဲစဉ် ခဏမှာသာ အာရုံတွေ ထွေပြားပြီး ကောင်းတယ်လို့ ထင်ရပေမယ့် တကယ်တမ်း ပြီးဆုံးသွားပြီဆိုရင် သူ့ရဲ့ဘေးထွက်ဆိုးကျိုးတွေက များ ပြားလှပါတယ်။ တကယ်တော့ ဆေးစွဲတယ်၊ အရက်စွဲတယ်ဆိုတာ ပရဟိတအလုပ်ကို လုပ်ကိုင်ရတာ လောက် မစွဲပါဘူးလို့ဆိုတဲ့ ဦးကျော်သူက …

” ကျွန်တော်ကတော့ ဒီဟာတွေ ကျွန်တော်ဖြတ်သန်းခဲ့ရတဲ့ဟာတွေ။ ကျွန်တော်လည်းလုပ်ခဲ့ဖူးတာပဲ။ ဒီဟာကို ကျွန်တော်တို့ကတော့ ဆရာဝန်တွေဘာတွေနဲ့ ဖြတ်တာကို မကြိုက်ဘူး။ ကိုယ်ကစွဲလမ်းနေတဲ့ အချိန်မှာ ဒါမျိုးကို အချုပ်အနှောင်တွေနဲ့ ဖြတ်တာကို မကြိုက်ဘူး။ ကျွန်တော်ဘာနဲ့ ဖြတ်သလဲဆိုတော့ ဘာသာရေးနဲ့ ဖြတ်ခဲ့ရတယ်။ ကျွန်တော်အခု ပရဟိတလုပ်တဲ့ နေရာမှာ နယ်တွေသွားတယ်။ မန္တ လေးမှာ ကျွန်တော့်ရဲ့ Documentary ဖြစ်တဲ့ Walking A Fine Line’ကိုပြတယ်။ ကလေးမိဘတွေ အယောက် ၄ဝ လောက် ကျွန်တော့်ဆီကိုရောက်လာတယ်။ သူတို့သားသမီးတွေ ဆေးစွဲနေတာ။ အရက်စွဲနေတာရှိတယ်။ အဲဒါကို ဖြတ်ပေးပါဆိုတော့ ကျွန်တော်ဒီ အတိုင်းပဲ ပြောလိုက်တယ်။ ကျွန်တော့်တုန်းကတော့ ဆေးတွေ ဘာတွေ၊ ဆရာဝန်တွေနဲ့ ဖြတ်တာ မဟုတ်ဘူး။ ကျွန်တော်ဘာသာရေး လုပ်တယ်။ ဘာသာရေးလုပ်ပြီး အဓိဋ္ဌာန်တွေ၊ ပုတီးစိပ်တာတွေ လုပ်တယ်။ လုပ်ပြီးတော့ ပရဟိတကို လုပ်လိုက်တဲ့အချိန်မှာ ယတိပြတ်သွားတယ်။ မူးယစ်ဆေးစွဲတာတို့၊ အရက်စွဲတာတို့ထက် ပရဟိတကို တကယ်စိတ်ပါလက်ပါနဲ့ နှလုံးသား ထဲကနေ လုပ်တယ်ဆိုရင် ဒါတွေ အားလုံးပြီးသွားမှာ။ ပြတ်သွားမှာပါ” လို့ နယ်တွေသွားတိုင်းလည်း သူဖြတ်သန်းခဲ့ရဖူးတဲ့ မူးယစ်ဆေးဝါး သုံးစွဲမှုအကြောင်းကို လူငယ်တွေလမ်းမှားမရောက်စေဖို့ အမြဲတမ်း ပြောပြလေ့ရှိတဲ့ ဦးကျော်သူက ….

” ကျွန်တော်က တောက်လျှောက်လုပ်နေတာပဲ။ နယ်သွားတယ်ဆို နယ်မှာဟောပြောပွဲဆို ဟောပြောပွဲ၊ အသင်းအဖွဲ့တွေနဲ့ တွေ့တယ်ဆို အသင်းအဖွဲ့။ ဒီဟာတွေနဲ့ပဲ ကျွန်တော်ပြောနေတာ။ ကျွန်တော် ကတော့ ဘာမှမချန်ဘူး။ ကိုယ်ဖြတ် သန်းခဲ့တာကို တည့်ပြောတာပဲ။ အခု ဟာက လူငယ်တွေက လုပ်စရာ ဘာမှ မရှိဘူးဖြစ်နေတယ်။ ဘဝအ တွက် ရပ်တည်မှု ဘာမှလုပ်ပိုင်ခွင့် တွေမရှိဘူး။ မရှိတဲ့အတွက် ဒီဟာတွေ လုပ်တဲ့အပိုင်းတွေ ဖြစ်သွားတယ်။ တချို့ကကျတော့လည်း ပိုက်ဆံချမ်းသာတယ်။ ပိုက်ဆံချမ်း သာပြီး ဘာလုပ်ရမှန်းမသိဘူး။ ဒါနဲ့ပဲ သွားတာပဲ။ ကိုယ်တွေက လူ့လောက ရောက်လာတယ်ဆိုတာ လူသားအကျိုးပြု လုပ်ငန်းတစ်ခုခု လုပ်မှ လူဖြစ်ရကျိုးနပ်မှာ။ အဲဒီ အသိတရားလေးရဖို့ အရေးကြီးတာ။ အခုကလည်း မူးယစ်ကို သေသေချာချာ လုပ်မှရမယ်။ မိပြီဆိုရင် ပစ္စည်း တွေ အကုန်လုံး မီးရှို့ပစ်၊ လမ်းကြိတ် စက်နဲ့ ကြိတ်ပစ်။ ဒါမျိုးလုပ်နေရုံနဲ့ မရဘူး။ အဓိကက ဘယ်ကနေ ထွက် တာလဲ။ ထွက်တာကို အပြီးလုပ်မှရမယ်” လို့ ဦးကျော်သူက ပြောပါတယ်။

မျိုးမောင်

Comments (0)

Leave a reply

Your email address will not be published. Required fields are marked *

*