ဧရာဝတီတိုင်းဒေသကြီး အစားအသောက်နှင့်ဆေးဝါးကွပ်ကဲရေးဦးစီးဌာန(FDA)မှ ဟင်္သာတမြို့ ရေသန့်စက်ရုံများသို့ ရှောင်တခင်စစ်ဆေး

ဧရာဝတီတိုင်းဒေသကြီး အစားအသောက်နှင့်ဆေးဝါးကွပ်ကဲရေးဦးစီးဌာန(FDA)မှ ဟင်္သာတ မြို့ပေါ် ရပ်ကွက်အတွင်းရှိ ရေသန့်စက်ရုံများအား သတ်မှတ်စည်းကမ်းချက်များနှင့်အညီ ထုတ်လုပ်၊ ထုပ်ပိုးရောင်းချခြင်း ရှိ/ မရှိ ရှောင်တခင် လိုက်လံစစ်ဆေးမှု ဇွန်လ ၈ရက်တွင် ဆောင်ရွက်ခဲ့ကြောင်း သိရသည်။

ထိုသို့ FDA မှ ရေသန့်စက်ရုံများကို ရှောင်တစ်ခင်စစ်ဆေးခြင်းနှင့်ပတ်သက်၍ ဒေသခံတစ်ဦးက “မြို့ ပေါ်မှာ ရေသန့်စက်ရုံတွေ ၁၀ ခုလောက်ရှိမယ်ထင်ပါတယ်။ ကျွန်တော်တို့လည်း ရေသန့်ဗူးတွေ ဝယ်သောက်နေတာပါ။ အရင်က တံဆိပ်တစ်မျိုးကို ဝယ်သုံးတာ တစ်နှစ်လောက်ရှိပြီ၊ ဒါပေမယ့် ပြီးခဲ့တဲ့ ၄ လ လောက်တုန်းက ရေတွေဟာ ရေပုတ်နံ့ရလို့ ရေလာချပေးတဲ့ကလေးတွေကို ရေဗူးပြန်လဲခိုင်းတယ်၊ ပြန်လဲပေးတဲ့ ရေကနံတုန်းပဲဆိုတော့ ဆက်မသောက်တော့ဘဲ နောက်ပိုင်း တစ်ခြားတံဆိပ်ကို လဲသောက်တယ်။ ခုလို FDA က ရေသန့်စက်ရုံတွေ ဝင်စစ်ပေးတာကောင်းပါတယ်၊ ဒါကို ကျွန်တော်တို့စားသုံးသူအနေနဲ့ ကြိုဆိုပါတယ်”ဟု ပြောကြားပါသည်။

ဟင်္သာတမြို့ပေါ်တွင် ရေသန့်စက်ရုံများ ရှောင်တစ်ခင်စစ်ဆေးခြင်းကို တိုင်းဒေသကြီး အစားအသောက်နှင့်ဆေးဝါးကွပ်ကဲရေးဦးစီးဌာန(FDA)မှ တိုင်းဦးစီးမှူး ဒေါက်တာမျိုးထွန်းကျော်နှင့်အဖွဲ့ဝင်များ၊ ဟင်္သာတခရိုင် အစားအသောက်နှင့် ဆေးဝါးကွပ်ကဲရေးဦးစီးဌာန(FDA) မှ ခရိုင်ဦစီးမှူး ဦးအောင်မင်းသူနှင့် ပူးပေါင်းအဖွဲ့ဝင်များ ဖြစ်သည့် စားသုံးသူရေးရာဦးစီးဌာန၊ ပြည်သူ့ကျန်းမာရေးဦးစီးဌာန၊ မြို့နယ်ထွေအုပ်၊ ခရိုင် ပြန်/ဆက်၊ မြို့နယ်စည်ပင်သာယာရေးအဖွဲ့၊ မြို့နယ်ရဲတပ်ဖွဲ့ဝင်များ ပါဝင်သောအဖွဲ့မှ ရေသန့်စက်ရုံ ၆ ရုံစက်ရုံသို့ စစ်ဆေးခဲ့ပြီး ရေသန့်နမူနာများကို ဓါတ်ခွဲခန်းပို့ဆောင် စစ်ဆေးသွားမည်ဖြစ်ကြောင်း သိရသည်။

ကျန်စက်ရုံများကို ရှောင်တစ်ခင် ဝင်ရောက်စစ်ဆေးမှုတွေ ဆက်လက်လုပ်ဆောင်သွားရန် ရှိကြောင်းလည်း စစ်ဆေးရေးအဖွဲ့တွင် ပါဝင်သူတစ်ဦးက ပြောသည်။