ယမန်နေ့က အိမ်ဖြူတော်တွင် ကျင်းပခဲ့သော အစည်းအဝေးနှင့်ပတ်သက်၍ အမေရိကန်သမ္မတက သူ၏ Truth Social အကောင့်တွင် အောက်ပါအတိုင်းရေးသားထားသည်။
“ယူကရိန်းသမ္မတ ဗိုလိုဒီမာ ဇယ်လန်းစကီး၊ ပြင်သစ်သမ္မတ အီမန်နျူရယ် မက်ခရွန်၊ ဖင်လန်သမ္မတ အလက်ဇန္ဒား စတပ်ဘ်၊ အီတလီဝန်ကြီးချုပ် ဂျော်ဂျီယာ မယ်လိုနီ၊ ယူနိုက်တက်ကင်းဒမ်းဝန်ကြီးချုပ် ကီယာ စတာမာ၊ ဂျာမနီဖက်ဒရယ်သမ္မတနိုင်ငံ အဓိပတိ ဖရီးဒရစ်ခ် မာ့ဇ်၊ ဥရောပကော်မရှင်ဥက္ကဋ္ဌ အာဆူလာ ဗွန် ဒါ လေယန်နှင့် နေတိုးအထွေထွေအတွင်းရေးမှူးချုပ် မာ့ခ် ရူတေ တို့အပါအဝင် ဂုဏ်သရေရှိ ဧည့်သည်တော်များနှင့်အတူ အိမ်ဖြူတော်တွင် အလွန်ကောင်းမွန်သော အစည်းအဝေးတစ်ခုကို ကျင်းပခဲ့ပြီး ၎င်းအစည်းအဝေးကို ဘဲဥပုံရုံးခန်း (Oval Office) တွင် နောက်ထပ်အစည်းအဝေးတစ်ခုဖြင့် နိဂုံးချုပ်ခဲ့သည်။
အစည်းအဝေးအတွင်း ယူကရိန်းအတွက် လုံခြုံရေးအာမခံချက်များ ပေးအပ်ရန် ဆွေးနွေးခဲ့ကြပြီး ၎င်းအာမခံချက်များကို ဥရောပနိုင်ငံအသီးသီးမှ ပေးမည်ဖြစ်ကာ အမေရိကန်ပြည်ထောင်စုနှင့်လည်း ပူးပေါင်းညှိနှိုင်းဆောင်ရွက်သွားမည်ဖြစ်သည်။ ရုရှား/ယူကရိန်းအတွက် ငြိမ်းချမ်းရေးရရှိနိုင်မည့် အလားအလာကို လူတိုင်းက အလွန်ပျော်ရွှင်ကြသည်။
အစည်းအဝေးများအပြီးတွင် ကျွန်ုပ်သည် သမ္မတပူတင်ကို ဖုန်းခေါ်ဆိုခဲ့ပြီး သမ္မတပူတင်နှင့် သမ္မတဇယ်လန်းစကီးတို့ တွေ့ဆုံရန်အတွက် နေရာကို ဆုံးဖြတ်ခြင်းအပါအဝင် တွေ့ဆုံဆွေးနွေးပွဲအတွက် စီစဉ်မှုများ စတင်ခဲ့သည်။ ထိုအစည်းအဝေးပြီးနောက်တွင် သမ္မတနှစ်ဦးနှင့် ကျွန်ုပ်အပါအဝင် သုံးပွင့်ဆိုင်တွေ့ဆုံပွဲကို ကျင်းပသွားပါမည်။
ထို့အပြင် ၎င်းသည် လေးနှစ်နီးပါးကြာမြင့်ခဲ့သော စစ်ပွဲတစ်ခုအတွက် အလွန်ကောင်းမွန်သည့် အစောပိုင်းခြေလှမ်းတစ်ခု ဖြစ်ပါသည်။ ဒုတိယသမ္မတ ဂျေဒီ ဗန့်စ်၊ နိုင်ငံခြားရေးဝန်ကြီး မာကို ရူဘီယိုနှင့် အထူးကိုယ်စားလှယ် စတိဗ် ဝစ်တ်ကော့ဖ်တို့သည် ရုရှားနှင့် ယူကရိန်းတို့နှင့် ပူးပေါင်းညှိနှိုင်းဆောင်ရွက်လျက်ရှိသည်။ ဤကိစ္စကို အလေးထားဆောင်ရွက်ပေးမှုအတွက် ကျေးဇူးတင်ပါသည်။”