အိန္ဒိယအုပ်ချုပ်သော ကက်ရှ်မီးယားတွင် အေ-သအပျောက်များသည့် စစ်သွေးကြွတိုက်ခိုက်မှုကြောင့် အိမ်နီးချင်းနှစ်နိုင်ငံအကြား မြစ်ရေခွဲဝေသုံးစွဲရေးစာချုပ်ကို နူးဒေလီဘက်က ရပ်ဆိုင်းခဲ့ပြီး နောက် တစ်လအကြာ ဖြစ်သော မေလ ၂၂ ရက် နေ့တွင် ပါကစ္စတန်နိုင်ငံအနေဖြင့် အိန္ဒိယနိုင်ငံက စီမံပိုင်ခွင့်ရှိသော မြစ်ကြောင်းများမှ ရေကိုရရှိတော့မည်မဟုတ်ကြောင်း အိန္ဒိယဝန်ကြီးချုပ် နာရင်ဒြာမိုဒီက မေလ ၂၂ ရက် နေ့တွင် ပြောကြားခဲ့သည်။
၁၉၆၀ ပြည့်နှစ်တွင် ကမ္ဘာ့ဘဏ်က ကြားဝင်ညှိနှိုင်းပေးခဲ့သော အင်ဒုစ်မြစ်ရေစာချုပ်ကို ဆိုင်းငံ့လိုက်ခြင်းသည် ဧပြီလ ၂၂ ရက် နေ့က ဟိန္ဒူခရီးသွားအများစုပါဝင်သော အမျိုးသား ၂၆ ဦး ေ-သဆုံးခဲ့သည့် တိုက်ခိုက်မှုဖြစ်ပြီးနောက် ဧပြီလတွင် အိန္ဒိယကကြေညာခဲ့သော ပါကစ္စတန်ကို ဆန့်ကျင်သည့် အစီအမံများထဲမှ တစ်ခုဖြစ်သည်။
တိုက်ခိုက်မှုကို ပါကစ္စတန်က ကျောထောက်နောက်ခံပေးခဲ့သည်ဟု နူးဒေလီက စွပ်စွဲခဲ့သော်လည်း အစ္စလမ်မာဘတ်က ငြင်းဆိုထားပြီး နျူကလီးယားလက်နက်ပိုင် အိမ်နီးချင်းနှစ်နိုင်ငံသည် ဆယ်စုနှစ် သုံးခုနီးပါးအတွင်း ၎င်းတို့၏ အဆိုးဝါးဆုံး စစ်ရေးတိုက်ခိုက်မှုများကိုလုပ်ဆောင်ခဲ့ကြပြီး မေလ ၁၀ ရက် နေ့တွင်မူ အပစ်အခတ်ရပ်စဲရန် သဘောတူညီချက်ရခဲ့ကြသည်။
“အကြမ်းဖက်တိုက်ခိုက်မှုတိုင်းအတွက် ပါကစ္စတန်ဟာ ကြီးကြီးမားမား ပေးဆပ်ရပါလိမ့်မယ်၊ ဒါကို ပါကစ္စတန်စစ်တပ်က ပေးဆပ်ရပါမယ်၊ ပါကစ္စတန်ရဲ့ စီးပွားရေးက ပေးဆပ်ရပါမယ်” ဟု ပါကစ္စတန်နှင့် နယ်စပ် ရာဂျက်စ်သန်ပြည်နယ်တွင် ပြုလုပ်ခဲ့သည့် အခမ်းအနားတစ်ခု၌ မစ္စတာ မိုဒီက ပြောကြားခဲ့သည်။
အစ္စလမ်မာဘတ်နှင့် ဆွေးနွေးမှုမှန်သမျှကိုလည်း သူက ပယ်ချသွားခဲ့ပြီး “ ပါကစ္စတန်နဲ့ ကုန်သွယ်မှု ဒါမှမဟုတ် ဆွေးနွေးမှုတွေ လုပ်မှာမဟုတ်ပါဘူး” ဟု သူက ပြောကြားခဲ့သည်။
အင်ဒုစ်စာချုပ်သည် အိန္ဒိယနိုင်ငံမှ မြစ်ဖျားခံစီးဆင်းသော မြစ်ကြောင်း သုံးခုမှ ပါကစ္စတန်၏ လယ်မြေ ၈၀ ရာခိုင်နှုန်းအတွက် ရေကိုပေးစွမ်းနိုင်သော်လည်း အဆိုပါ ဆိုင်းငံ့မှုသည် ချက်ချင်းလက်ငင်း အကျိုးသက်ရောက်မှုရှိမည်မဟုတ်ကြောင်း ပါကစ္စတန် ဘဏ္ဍာရေးဝန်ကြီးက မေလတွင် ပြောကြားခဲ့သည်။
နှစ်နိုင်ငံအကြား အပစ်အခတ်ရပ်စဲရေး လမ်းစဉ်ကို ထိထိရောက်ရောက်ကိုင်စွဲထားခဲ့ပြီး လက်ရှိတွင် အပြန်အလှန်ပစ်ခတ်မှုများ မရှိဘဲ တပ်ဖွဲ့များ အလိုက်သင့် ပြန်လည်နေရာချထားခြင်းမျိုးသာရှိကြောင်း အိန္ဒိယနိုင်ငံခြားရေးဝန်ကြီး ဆူဘရာ့မန်ယမ် ဂျေးရှန်ကာက ပြောကြားခဲ့သည်။
Ref: သည်စထရိတ်တိုင်းမ်စ်