သံမဏိထုတ်လုပ်ရေးလုပ်ငန်းသည် နိုင်ငံတော်အတွက် မဖြစ်မနေလိုအပ်သည့်လုပ်ငန်းဖြစ်သည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဇွန် ၂၁ ရက်နံနက်ပိုင်းက ရန်ကုန်တိုင်း၊ မှော်ဘီမြို့နယ်ရှိ မြန်မာစီးပွားရေးကော်ပိုရေးရှင်း အမှတ်(၂)သံမဏိစက်ရုံ(မြောင်းတကာ)၌ လုပ်ငန်းဆောင်ရွက်နေမှုများကို ကြည့်ရှုစစ်ဆေးစဥ်မှာကြားခဲ့ခြင်းဖြစ်သည်။
သံမဏိထုတ်လုပ်ရေးလုပ်ငန်းသည် နိုင်ငံတော်အတွက် မဖြစ်မနေလိုအပ်သည့်လုပ်ငန်းဖြစ်၍ စက်ရုံအနေဖြင့် တာဝါတိုင်များ၊ တံတားသံဘောင်များကို စနစ်တကျဆက်လက်ထုတ်လုပ်သွားရန်ပြီး အဓိကအားဖြင့် တည်ဆောက်ရေးလုပ်ငန်းများအတွက် Deformed Bar များလိုအပ်သဖြင့် ပြည်တွင်း၌ လုံလောက်စွာထုတ်လုပ်နိုင်ရေးဆောင်ရွက်ရမည်ဟု မှာကြားသည်။
” ဆောက်လုပ်ရေးသုံး သံမဏိတွေကို ပြည်ပကနေနှစ်စဉ်ဝယ်ယူနေရရင် နိုင်ငံတော်အတွက် ငွေကြေးကုန်ကျမှုများပြားနေအုံးမှာဖြစ်လို့ ပြည်တွင်းမှာ လုံလောက်စွာထုတ်လုပ်နိုင်ဖို့အတွက် ရှိပြီးဖြစ်တဲ့ သံအရင်းအမြစ်တွေကို စနစ်တကျထုတ်ယူအသုံးချသွားဖို့လိုပါတယ်။ ပထမဦးစားပေးအနေနဲ့ Steel Billet တွေထုတ်လုပ်နိုင်ဖို့ အဲဒီကနေတစ်ဆင့် ဆောက်လုပ်ရေးလုပ်ငန်းသုံး Deformed Bar တွေထုတ်လုပ်သွားနိုင်ဖို့လိုပါတယ်”ဟု နစက ဥက္ကဋ္ဌက မှာကြားသည်။
ထို့အတူ ပြည်တွင်း၌ရှိပြီးဖြစ်သည့် သံမဏိစက်ရုံများအဆင့်မြှင့်တင်ခြင်းလုပ်ငန်းများကိုလည်း ဆက်လက်ဆောင်ရွက်ရမည်ဖြစ်ကာ မန္တလေးငလျင်ကြီးလှုပ်ခတ်ခဲ့ချိန်တွင်လည်း အချို့ဆောက်လုပ်ရေးလုပ်ငန်းသုံးသံမဏိများမှာ အရည်အသွေး ပြည့်မီမှုမရှိသည်ကိုစစ်ဆေးတွေ့ရှိခဲ့ရခြင်းသည် မိမိတို့အတွက်သင်ခန်းစာဖြစ်၍ ဆောက်လုပ်ရေးလုပ်ငန်းများတွင် ခိုင်ခံ့စွာတည်ဆောက်နိုင်ရေးအတွက် အရည်အသွေးပြည့်မီသည့် ဆောက်လုပ်ရေးသုံးသံမဏိများကိုထုတ်လုပ်သွားနိုင်ရန်လိုသည်ဟုလည်း နစက ဥက္ကဋ္ဌက မှာကြားခဲ့သည်။
ထို့နောက် နစက ဥက္ကဋ္ဌသည် စက်ရုံအတွင်း တံ တားနှင့် သံထည်ထုတ်လုပ်ရေးလုပ်ငန်းခွင်အတွင်း လုပ်ငန်းဆောင်ရွက်နေမှုများ၊ စက်ရုံ Jetty နေရာတို့ကိုကြည့်ရှုစစ်ဆေးပြီး စက်ရုံဝန်ထမ်းများအတွက် ချီးမြှင့်ငွေများပေးအပ်ခဲ့သည်။
ထို့အတူ နစက ဥက္ကဋ္ဌသည် မြန်မာစီးပွားရေးကော်ပိုရေးရှင်း၏ အမှတ်(၃)သံမဏိစက်ရုံ(ရွာမ)သို့သွားရောက်၍ ကြည့်ရှုစစ်ဆေးပြီး ပြည်တွင်းရှိ ဆောက်လုပ်ရေးလုပ်ငန်းများအတွက် သံမဏိများလိုအပ်လျက်ရှိ၍ ပြည်တွင်းသံမဏိထုတ်လုပ်ခြင်းလုပ်ငန်းများကိုအားပေးရန်လိုကာ အရေအတွက်ပြည့်မီရန်လိုအပ်သကဲ့သို့ အရည်အသွေးအရလည်းပြည့်မီရန်လိုသည်ဟုမှာကြားပြီး စက်ရုံမှထွက်ရှိသည့် သံမဏိများနှင့် ပြည်ပနိုင်ငံများမှထုတ်လုပ်ထားသော သံမဏိများအားအရည်အသွေးနှိုင်းယှဉ်ပြသထားရှိမှုကို ကြည့်ရှုစစ်ဆေးခဲ့သည်။
ထို့ပြင် နစက ဥက္ကဋ္ဌသည် စက်ရုံအတွင်း HRB-500 Steel Billet များထုတ်လုပ်နေမှုလုပ်ငန်းစဉ်အဆင့်ဆင့်အား ကြည့်ရှုစစ်ဆေးပြီး အမှတ်(၃) သံမဏိစက်ရုံ(ရွာမ)မှ ဝန်ထမ်းများအတွက်ချီးမြှင့်ငွေများပေးအပ်ခဲ့သည်။