နစက ဥက္ကဋ္ဌ၊ဗိုလ်ချုပ်မှူးကြီးမင်းအောင်လှိုင်မှ မတ် ၂ ရက်(ယနေ့) တွင်ကျရောက်သည့် တောင်သူ လယ်သမားနေ့အခမ်းအနားသို့ပေးပို့သည့် ဂုဏ်ပြုသဝဏ်လွှာ၌ စားရေရိက္ခာဖူလုံရေးနှင့်ပြည်ပသို့ ပိုမိုတင်ပို့နိုင်ရေးအတွက် သီးနှံစိုက်ပျိုးထုတ်လုပ်မှု တိုးတက်မြင့်မားစေ၍ မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း (၂၀၁၈-၂၀၃၀ ခုနှစ်)ကို အကောင်အထည်ဖော် ဆောင်ရွက်လျက်ရှိကြောင်းပါဝင်သည်။
မြန်မာနိုင်ငံ၏ စီးပွားရေးမူဝါဒ၌ စားရေ ရိက္ခာဖူလုံရေးနှင့်ပို့ကုန်ကဏ္ဍမြှင့်တင်ရေးအတွက် သီးနှံအလိုက် နှစ်စဉ်စီမံကိန်းများပါ ချမှတ်ဆောင်ရွက်လျက်ရှိသည်ဟု ပါဝင်သည်။
ထို့ကြောင့် ၂၀၂၁-၂၀၂၂ ခုနှစ်တွင် တိုင်းနှင့်ပြည်နယ်များ၌ စပါး(၁၇,၂၉၄,၄၅၇) ဧက၊ပဲမျိုးစုံ (၉,၇၆၉,၈၁၉)ဧက၊ဆီထွက်သီးနှံ(၇,၅၄၃,၂၁၇) ဧက၊အစေ့ထုတ်ပြောင်း(၁,၅၀၁,၅၁၄)ဧက၊ဝါသီးနှံ(၃၉၃,၇၈၁)ဧက စိုက်ပျိုးနိုင်ခဲ့သည်။
၂၀၂၂-၂၀၂၃ ခုနှစ်တွင်လည်း စပါး (၁၅,၂၂၃,၃၃၂)ဧက၊ပဲမျိုးစုံ(၉,၅၈၂,၀၁၅)ဧက၊ဆီထွက်သီးနှံ(၇,၈၃၄,၃၇၆)ဧက၊အစေ့ထုတ်ပြောင်း (၁,၄၇၄,၉၅၁)ဧကနှင့်ဝါသီးနှံ(၄၅၈,၃၈၈)ဧက စိုက်ပျိုးဆောင်ရွက်ထားရှိပြီးဖြစ်သည်ဟု ဂုဏ်ပြုသဝဏ်လွှာ၌ဖော်ပြပါရှိသည်။
စပါးအထွက်နှုန်းတိုးတက်ရန် ၂၀၂၂-၂၀၂၃ ခုနှစ်တွင် သိပ္ပံနည်းကျစိုက်နည်းစနစ်ဖြင့် တစ်ကွင်းတစ်စပ်တည်း မိုးစပါးဧက(၁၀၀)စံပြကွက်များ စိုက်ပျိုးခြင်းစီမံကိန်းကို ဆောင်ရွက်လျက်ရှိပြီး တိုင်းနှင့်ပြည်နယ်(၁၂)ခုဖြစ်သည့် နေပြည်တော်၊ကချင်၊ကရင်၊မွန်၊ရခိုင်၊ရှမ်းပြည်နယ်စစ်ကိုင်း၊ပဲခူး၊မကွေး၊မန္တလေး၊ရန်ကုန်၊ဧရာဝတီတိုင်းတို့ရှိ မြို့နယ်(၁၅)မြို့နယ်တွင် (၁၅၀၀)ဧက လျာထားဆောင်ရွက်ခဲ့ရာ(၁၆၀၀)ဧက စိုက်ပျိုးနိုင်ခဲ့ပြီး တစ်ဧကလျှင် ပျမ်းမျှ (၁၁၅ ဒသမ ၇၆)တင်းထွက်ရှိအောင်ဆောင်ရွက်နိုင်ခဲ့ကြောင်းဂုဏ်ပြုရေးသားပြောဆိုခဲ့သည်။
စပါးအထွက်နှုန်းများအား တစ်ဧကချင်းအလိုက် အထွက်နှုန်းတိုးအောင်ဆောင်ရွက်နိုင်ပါက ပြည်တွင်းဆန်ဖူလုံမှု လုံလောက်သည့်အပြင် ပြည်ပသို့ တင်ပို့ရောင်းချနိုင်မည်ဖြစ်၍ တောင်သူလယ်သမားများ၏ လူမှုစီးပွားဘဝဖွံ့ဖြိုးတိုးတက်စေမည်ဖြစ်ပြီး နိုင်ငံအတွက်လည်း အကျိုးဖြစ်ထွန်းမည်ဟု ပြောကြားခဲ့သည်။