ရုရှား GAZ Group က ဖနောင်ပင် မော်တော်ယာဉ်ကဏ္ဍတွင် ရင်းနှီးမြှုပ်နှံရန် စိတ်ဝင်စား

ရုရှားနိုင်ငံ၏ အကြီးဆုံး ကူးသန်းရောင်းဝယ်ရေးယာဉ် ထုတ်လုပ်သူနှင့် တင်ပို့သူများအနက်တစ်ခုဖြစ်သည့် GAZ Group သည် လျင်မြန်စွာ တိုးတက်လျက်ရှိသည့် ကမ္ဘောဒီးယားနိုင်ငံ၏ မော်တော်ယာဉ်ကဏ္ဍတွင် ရင်းနှီးမြှုပ်နှံမှု အခွင့်အလမ်းများကို ရှာဖွေရန် အထူးစိတ်ဝင်စားကြောင်း ထုတ်ဖော်ပြောကြားခဲ့သည်။ ယင်း ကဲ့သို့ စိတ်ဝင်စားမှုသည် ကမ္ဘောဒီးယားနိုင်ငံ၏ စက်မှုကဏ္ဍ ဖွံ့ဖြိုးတိုးတက်ရေး အလားအလာအပေါ် နိုင်ငံတကာ၏ ယုံကြည်မှု ပိုမိုမြင့်မားလာခြင်းကို ပြသနေပေသည်။

ဇွန်လ ၁၈ ရက်က ရုရှားနိုင်ငံ ကာဇန်မြို့တွင် ကျင်းပခဲ့သည့် အာဆီယံ-ရုရှား ဆက်ဆံရေး ၃၅ နှစ်ပြည့် အထိမ်းအမှတ် ထိပ်သီးအစည်းအဝေး ၏ပြင်ပ တွင် GAZ Group ၏ ပို့ကုန်ဆိုင်ရာ ဒါရိုက်တာ ဒိုဂေါ့ဗ် လီယိုနစ် နှင့် ကမ္ဘောဒီးယား ဝန်ကြီးချုပ် ဟွန်မာနက် တို့  တွေ့ဆုံဆွေးနွေး ကြရာတွင် ယခုကဲ့သို့ စိတ်ဝင်စားမှုကို ပြောကြားခဲ့ခြင်းဖြစ်သည်။

အဆိုပါ တွေ့ဆုံမှုတွင် လီယိုနစ်က GAZ Group ၏ လုပ်ငန်းလည်ပတ်မှုများနှင့် နိုင်ငံတကာသို့ ဖြန့်ကြက်ထားရှိမှု အခြေအနေများကို ရှင်းလင်းပြောကြားခဲ့ပြီး၊ မော်တော်ယာဉ်လုပ်ငန်းကဏ္ဍတွင် ကုမ္ပဏီ၏ ကျယ်ပြန့်သော အတွေ့အကြုံများကို အလေးပေး တင်ပြခဲ့သည်။ ၁၉၃၆ ခုနှစ်တွင် စတင်တည်ထောင်ခဲ့ပြီး ရုရှားနိုင်ငံအနောက်ပိုင်း နစ်ဇ်နီ နော့ဗ်ဂိုရော့ဒ်တွင် ရုံးချုပ်စိုက်ထားသည့် GAZ Group သည် မော်တော်ယာဉ် ထုတ်လုပ်ရေးနှင့် အင်ဂျင်နီယာပိုင်းဆိုင်ရာတွင် ဆယ်စုနှစ် ၉ ခုနီးပါး အတွေ့အကြုံရှိသော ကုမ္ပဏီဖြစ်သည်။

လီယိုနစ်၏ ပြောကြားချက်အရ အဆိုပါ ကုမ္ပဏီသည် ရုရှားနိုင်ငံရှိ ဒေသ ၈ ခုတွင် ကုန်ထုတ်လုပ်မှုစက်ရုံ ၁၅ ခု လည်ပတ်နေပြီး အရောင်းကိုယ်စားလှယ် ၂၄၀ ရှိသည့် ကွန်ရက်မှတစ်ဆင့် ကမ္ဘာတစ်ဝန်းရှိ နိုင်ငံပေါင်း ၄၃ နိုင်ငံသို့ ထုတ်ကုန်များ တင်ပို့လျက်ရှိသည်။

၎င်းတို့၏ ထုတ်ကုန်များတွင် အပေါ့စားနှင့် အလတ်စား ကူးသန်းရောင်းဝယ်ရေးယာဉ်များ၊ အလတ်စား ကုန်တင်ကားများ၊ ဘတ်စ်ကားများ၊ လူနာတင်ယာဉ်များ၊ မော်တော်ယာဉ်အင်ဂျင်များ၊ အပိုပစ္စည်းများနှင့် စက်မှုလုပ်ငန်းနှင့် အများပြည်သူဝန်ဆောင်မှု ကဏ္ဍအသီးသီးအတွက် အထူးဒီဇိုင်းထုတ်ထားသည့် အထူးပြုယာဉ် အမျိုးအစားပေါင်း ၅၀၀ ကျော် ပါဝင်သည်။

GAZ Group အနေဖြင့် အာဆီယံဈေးကွက် အချို့တွင် အခြေစိုက်ထားပြီးဖြစ်ကာ ကမ္ဘောဒီးယားနိုင်ငံ၏ စဉ်ဆက်မပြတ် စီးပွားရေးဖွံ့ဖြိုးတိုးတက်မှု၊ ပိုမိုကောင်းမွန်လာသော စီးပွားရေးပတ်ဝန်းကျင်နှင့် ဒေသတွင်း မဟာဗျူဟာမြောက် တည်နေရာတို့ကြောင့် ကမ္ဘောဒီးယားနိုင်ငံကို ရှေ့လာမည့် ရင်းနှီးမြှုပ်နှံမှုများအတွက် ဆွဲဆောင်မှုရှိသော နေရာတစ်ခုအဖြစ် ရှုမြင်ကြောင်း လီယိုနစ်က ဆိုသည်။

“ကျွန်တော်တို့ အာဆီယံဒေသတွင်းမှာ အခြေစိုက်ထားပြီးဖြစ်တာရယ်၊ ကမ္ဘောဒီးယားရဲ့ ကြံ့ကြံ့ခံနိုင်တဲ့ စီးပွားရေး တိုးတက်မှု အခြေအနေတွေကြောင့် ဒီနိုင်ငံရဲ့ မော်တော်ယာဉ်ကဏ္ဍမှာ ပူးပေါင်းဆောင်ရွက်မှုနဲ့ ရင်းနှီးမြှုပ်နှံမှုတွေ လုပ်ဖို့ အလားအလာကောင်းတွေ ရှိနေတာကို တွေ့ရပါတယ်” ဟု လီယိုနစ်က ဆွေးနွေးပွဲတွင် ပြောကြားခဲ့သည်။

ယင်းအပေါ် ဝန်ကြီးချုပ် ဟွန်မာနက်က ကုမ္ပဏီ၏ စိတ်ဝင်စားမှုကို ကြိုဆိုခဲ့ပြီး၊ ကမ္ဘောဒီးယားနိုင်ငံအနေဖြင့် နိုင်ငံခြားရင်းနှီးမြှုပ်နှံမှုများကို မူဝါဒဆိုင်ရာ မက်လုံးများနှင့် စီးပွားရေးလုပ်ငန်းများအတွက် အဆင်ပြေစေမည့် လုပ်ထုံးလုပ်နည်းများစွာဖြင့် ပံ့ပိုးကူညီသွားရန် ကတိပြုထားကြောင်း ထပ်လောင်း အတည်ပြုခဲ့သည်။

အစိုးရအနေဖြင့် စက်မှုကဏ္ဍ ဖွံ့ဖြိုးတိုးတက်ရေး၊ စီးပွားရေးကဏ္ဍစုံ ပျိုးထောင်ရေးနှင့် ဒေသတွင်းနှင့် ကမ္ဘာလုံးဆိုင်ရာ ထောက်ပံ့ရေးကွင်းဆက်များအတွင်း ပါဝင်ချိတ်ဆက်ရေးတို့ကို ဆက်လက် ဦးစားပေးလုပ်ဆောင်နေကြောင်း ၎င်းက အလေးပေးပြောကြားခဲ့သည်။

ဝန်ကြီးချုပ်က GAZ Group အနေဖြင့် အရှေ့တောင်အာရှတွင် ရှိနှင့်ပြီးသား ၎င်းတို့၏ ကုန်ထုတ်လုပ်မှုကွန်ရက်ကို ပံ့ပိုးပေးနိုင်မည့် ရင်းနှီးမြှုပ်နှံမှု အခွင့်အလမ်းများအတွက် ဖြစ်မြောက်နိုင်စွမ်းလေ့လာမှုများ ပြုလုပ်ရန် တိုက်တွန်းခဲ့သည်။ အထူးသဖြင့် ကမ္ဘောဒီးယားနိုင်ငံ၏ ‘Plus 1 Strategy’ မူဝါဒမှ ရရှိနိုင်မည့် အကျိုးကျေးဇူးများကို မီးမောင်းထိုးပြခဲ့ပြီး၊ အဆိုပါ မူဝါဒသည် ထုတ်လုပ်သူများအနေဖြင့် ဒေသတွင်းရှိ နေရာအမြောက်အမြားတွင် ၎င်းတို့၏ ထောက်ပံ့ရေးကွင်းဆက်လုပ်ငန်းများကို တိုးချဲ့ပြီး ကဏ္ဍစုံ ဖော်ဆောင်နိုင်ရန် အားပေးထားခြင်း ဖြစ်သည်။

ထို့အပြင် မစ္စတာ ဟွန်မာနက်က အဆိုပါ ရုရှားမော်တော်ယာဉ်ထုတ်လုပ်ရေးကုမ္ပဏီအနေဖြင့် ကမ္ဘောဒီးယားနိုင်ငံ၏ တိုးတက်နေသော မော်တော်ယာဉ်လုပ်ငန်းကဏ္ဍမှ ထွက်ပေါ်လာမည့် အခွင့်အလမ်းများကို အသုံးချကာ သင့်လျော်သော ရင်းနှီးမြှုပ်နှံမှုစီမံကိန်းများ ဖော်ထုတ်နိုင်ရန်အတွက် သက်ဆိုင်ရာ ကမ္ဘောဒီးယားဝန်ကြီးဌာနများ၊ အဖွဲ့အစည်းများနှင့် နီးကပ်စွာ ဆက်သွယ်ဆောင်ရွက်သွားရန် တိုက်တွန်းခဲ့သည်။

Ref ခမာတိုင်းမ်စ်