မော်စကို၊ ဧပြီလ ၁၂ ရက်
ကာလရှည်ကြာ စိန်ခေါ်မှုများ ရှိနေသော်လည်း ရုရှားနိုင်ငံ၏ အာကာသလုပ်ငန်းကဏ္ဍသည် ယုံကြည်မှုအပြည့် ရှိနေဆဲဖြစ်ကြောင်း ရုရှားနိုင်ငံ၏ “အာကာသယာဉ်မှူးများနေ့” မတိုင်မီ စနေနေ့တွင် သမ္မတ ဗလာဒီမာပူတင်က ပြောကြားခဲ့သည်။
“ဒီနှစ်မှာ ကျွန်တော်တို့ဟာ ယူရီဂါဂါရင်ရဲ့ သမိုင်းဝင်ခရီးစဉ် ၆၅ နှစ်ပြည့်ကိုလည်း ဆင်နွှဲနေပါတယ်။ ပြီးခဲ့တဲ့နှစ်ဟာ ဒီကဏ္ဍအတွက် ယေဘုယျအားဖြင့် အပေါင်းလက္ခဏာဆောင်ခဲ့ပါတယ် – ဒုံးပျံပစ်လွှတ်မှု ၁၇ ကြိမ် ပြုလုပ်နိုင်ခဲ့ပြီး အာကာသယာဉ် ၉၇ စင်းကို ပတ်လမ်းထဲ ပို့ဆောင်နိုင်ခဲ့ပါတယ်။ စုစုပေါင်းဝင်ငွေဟာ ၁၀ ရာခိုင်နှုန်း တိုးတက်လာခဲ့ပြီး ရူဘယ် ဘီလျံ ၅၀၀ ကျော်အထိ ရှိခဲ့ပါတယ်” ဟု ပူတင်က မှတ်ချက် ပြောကြားခဲ့သည်။
ရုရှားနိုင်ငံပိုင် အာကာသကော်ပိုရေးရှင်း (Roscosmos) အကြီးအကဲ ဒီမီထရီ ဘာကာနော့ဗ် နှင့် ပူတင်တို့ တွေ့ဆုံစဉ်တွင် ဘာကာနော့ဗ်က လွန်ခဲ့သော နှစ်ပတ်ခန့်က Roscosmos နှင့် ၎င်း၏ ပုဂ္ဂလိက မိတ်ဖက်အဖွဲ့အစည်းများသည် အနိမ့်ပတ်လမ်းသွား အင်တာနက်ဂြိုဟ်တုကွန်ရက်သစ်ကို အောင်မြင်စွာ ပစ်လွှတ်နိုင်ခဲ့ကြောင်း တင်ပြခဲ့သည်။ အဆိုပါလုပ်ဆောင်ချက်ကြောင့် ရုရှား၏ ပတ်လမ်းအတွင်းရှိ အာကာသယာဉ်စုစုပေါင်းမှာ ၃၆၄ စင်းအထိ ရှိလာခဲ့ပြီ ဖြစ်သည်။ ပလက်ဆက်စဒရုန်း (Plesetsk Cosmodrome) အာကာသစခန်းမှ အဆိုပါပစ်လွှတ်မှုကို ပြင်ပမှ နှောင့်ယှက်ဟန့်တားရန် ကြိုးပမ်းမှုများ ရှိခဲ့သော်လည်း အောင်မြင်အောင် ဆောင်ရွက်နိုင်ခဲ့ခြင်းဖြစ်ကြောင်း ၎င်းက အလေးပေး ပြောကြားခဲ့သည်။
“အာကာသဟာ နိုင်ငံရေးနဲ့ မသက်ဆိုင်ဘူးလို့ လူတွေပြောကြပေမဲ့ ကျွန်တော်တို့ရဲ့ ‘မိတ်ဆွေ’ ဆိုသူတွေက ဒီပစ်လွှတ်မှု မအောင်မြင်အောင် နည်းမျိုးစုံနဲ့ ကြိုးစားခဲ့ကြပါတယ်။ အဲဒီနေ့မှာ အာကာသစခန်းကို ပြင်းပြင်းထန်ထန် တိုက်ခိုက်ဖို့ ကြိုးပမ်းမှုတွေတောင် ရှိခဲ့ပါတယ်။ ဒါပေမဲ့ Roscosmos လုပ်ငန်းစုတွေနဲ့ အာကာအဖွဲ့တွေရဲ့ ပူးပေါင်းတပ်ဖွဲ့ဝင်တွေက မိမိတို့ရဲ့ တာဝန်ကို အောင်မြင်အောင် ထမ်းဆောင်နိုင်ခဲ့ကြပါတယ်” ဟု ဘာကာနော့ဗ်က ဆိုသည်။
ထို့ပြင် ဘာကာနော့ဗ်သည် ပူတင် ကို ‘New Start’ စီမံကိန်းအကြောင်းကိုလည်း ရှင်းလင်းတင်ပြခဲ့သည်။ အဆိုပါစီမံကိန်းတွင် ပုဂ္ဂလိကရင်းနှီးမြှုပ်နှံသူတစ်ဦးက ၈ နှစ်တာကာလအတွင်း ရူဘယ် ဘီလျံ ၆၀၀ ထည့်ဝင်မည်ဖြစ်ပြီး ယင်းရန်ပုံငွေကို Topol ဒုံးကျည် ကို အသွင်ပြောင်းလဲရန်နှင့် တစ်ကြိမ်ထက်မက ပြန်လည်အသုံးပြုနိုင်သည့် လွှတ်တင်ရေးယာဉ် ထုတ်လုပ်ရန် အသုံးပြုမည်ဖြစ်သည်။ ၎င်း၏ ပထမဆုံး ပစ်လွှတ်မှုကို ဗော့စတော့ချ်နီ (Vostochny Cosmodrome) အာကာသစခန်းမှ ၂၀၂၇ ခုနှစ်၏ ပထမသုံးလပတ်အတွင်း ပြုလုပ်ရန် စီစဉ်ထားကြောင်း သိရသည်။
Ref:ဆင်ဟွာ