မြောက်ကိုရီးယား ဒုံးကျည်ပစ်လွှတ်မှူအပေါ် အမေရိကန် အင်ဒို-ပစိဖိတ် စစ်ဌာနချုပ် ကြေညာချက်ထုတ်ပြန်

မြောက်ကိုရီးယားနိုင်ငံသည် ဗုဒ္ဓဟူးနေ့တွင် ဘောလစ်စတစ်ဒုံးကျည် အမြောက်အမြားကို ထပ်မံပစ်လွှတ်ခဲ့ပြီး၊ ၎င်းမှာ ယခင်နေ့က ပစ်လွှတ်မှုအပေါ် ထပ်တိုးလုပ်ဆောင်ခြင်းဖြစ်ကြောင်း တောင်ကိုရီးယားစစ်တပ်က ပြောကြားခဲ့သည်။ ယခုကဲ့သို့ ဆက်တိုက်စမ်းသပ်မှုများကြောင့် တင်းမာမှုများ လျော့ပါးလာစေရေးအတွက် တောင်ကိုရီးယား၏ မျှော်လင့်ချက်များအပေါ် ဖိအားများဖြစ်ပေါ်စေခဲ့သည်။

တောင်ကိုရီးယား ပူးတွဲစစ်ဦးစီးချုပ်များအဖွဲ့ ၏ ထုတ်ပြန်ချက်အရ မြောက်ကိုရီးယားသည် ဗုဒ္ဓဟူးနေ့ နေ့လယ် ၂ နာရီ မိနစ် ၂၀ ခန့် (ဂရင်းနစ်စံတော်ချိန် ၀၅:၂၀) တွင် ဝမ်ဆန်(Wonsan) ဒေသမှနေ၍ ၎င်း၏ အရှေ့ဘက်ကမ်းလွန်ပင်လယ်ပြင်သို့ အမျိုးအမည်မသိရသေးသော ဒုံးကျည်တစ်စင်းကို ထပ်မံပစ်လွှတ်ခဲ့ကြောင်း သိရသည်။

ယင်း ဒုံးကျည်ပစ်လွှတ်မှုအပေါ် အမေရိကန် အင်ဒို-ပစိဖိတ် စစ်ဌာနချုပ်(USINDOPACOM) ကလည်း ကြေညာချက်တစ်ခု ထုတ်ပြန်ခဲ့ရာ အပြည့်အစုံမှာ အောက်ပါအတိုင်းဖြစ်သည်။

“မြောက်ကိုရီးယားနိုင်ငံ(DPRK) သည် ၂၀၂၆ ခုနှစ်၊ ဧပြီလ ၇ ရက်နေ့နှင့် ၈ ရက်နေ့တို့တွင် ဘောလစ်စတစ်ဒုံးကျည် အမြောက်အမြားကို ပစ်လွှတ်ခဲ့သည်။ ကျွန်ုပ်တို့သည် ထိုဒုံးကျည်ပစ်လွှတ်မှုများကို သိရှိထားပြီးဖြစ်ကာ ကျွန်ုပ်တို့၏ မဟာမိတ်များ၊ မိတ်ဖက်များနှင့် အနီးကပ် တိုင်ပင်ဆွေးနွေးလျက်ရှိပါသည်။ လက်ရှိအကဲဖြတ်ချက်များအရမူ ယင်းဖြစ်စဉ်သည် အမေရိကန် ဝန်ထမ်းများ သို့မဟုတ် အမေရိကန်ပိုင်နက်နယ်မြေများအပြင် ကျွန်ုပ်တို့၏ မဟာမိတ်များအတွက်ပါ တိုက်ရိုက်ခြိမ်းခြောက်မှုတစ်စုံတစ်ရာ မရှိကြောင်း တွေ့ရှိရပါသည်။ အမေရိကန်ပြည်ထောင်စုအနေဖြင့် မိမိတို့၏ မိခင်နိုင်ငံနှင့် ဒေသတွင်းရှိ မဟာမိတ်များ၏ ကာကွယ်ရေးအတွက် ဆောင်ရွက်ရန် ဆက်လက် သန္နိဋ္ဌာန်ချထားဆဲဖြစ်ပါသည်”